სერიალი Heated Rivarly (გაცხარებული მეტოქეობა) ამავე სახელწოდების წიგნის ეკრანიზაციაა. შოუ სულ 6 სერიისგან შედგება და ჰოკეის ორი მოთამაშის 10-წლიან ქვიარ სასიყვარულო ურთიერთობაზე ჰყვება. მისი ფინალური ეპიზოდი მაყურებელმა 2025 წლის 25 დეკემბერს იხილა.

გამოსვლიდან მალევე სერიალმა მთელი მსოფლიოს მასშტაბით დიდი პოპულარობა მოიპოვა. ყოველდღიურად იზრდება მთავარი როლების შემსრულებლების, ქონორ სთორისა და ჰადსონ უილიამსის ცნობადობაც — აქამდე, ფაქტობრივად, უცნობი მსახიობები 12 იანვარს ოქროს გლობუსის ცერემონიალზეც კი ვიხილეთ.

სერიალის მე-5 ეპიზოდმა თითქმის მოხსნა რეიტინგების რეკორდი და IMDB-ზე 9.9-ქულიანი შეფასება დაიმსახურა. მე-6, ფინალურმა ეპიზოდმა, სადაც მთავარი პერსონაჟები ზაფხულის ერთად გასატარებლად კოტეჯში წასვლას გადაწყვეტენ, სოციალურ ქსელებში ახალ ტრენდს დაუდო სათავე — გულშემატკივრები ხუმრობენ, რომ იქ მათთან ერთად წავიდნენ; რომ კოტეჯის დატოვება არ უნდათ და სხვა. ამით ისინი სერიალის დასრულების გამო სინანულსა და შოუთი აღტაცებას გამოხატავენ.

2027 წელს მაყურებელი Heated Rivarly-ის მეორე სეზონის გამოსვლას ელის. წინ, სულ მცირე, ერთი წელია, ამიტომ, იქამდე, რამდენიმე ქვიარ სერიალსა და ფილმს გირჩევთ, რომლებიც ამ დანაკლისის შევსებაში დაგეხმარებათ.

Skam (სირცხვილი)

ეს ნორვეგიული სერიალი 2015 წელს გამოვიდა. ის სკოლის მოსწავლეების ყოველდღიურ ცხოვრებას, მეგობრობას, სიყვარულსა და საკუთარ თავთან ბრძოლას ეხება. Heated Rivarly-ის ფანების ყურადღებას, სავარაუდოდ, სერიალის მესამე სეზონი მიიპყრობს, სადაც მთავარი პერსონაჟების — ისაკისა და ევენის ურთიერთობას ვეცნობით.

ისაკი თინეიჯერი ბიჭია, რომელსაც საზოგადოებრივი სტიგმებისა და შიშის გამო, ჯერ საკუთარი სექსუალური იდენტობა მიღებული არ აქვს — ამაზე არც მისმა ოჯახმა და მეგობრებმა იციან.

სკოლის ახალი მოსწავლე, მშვიდი და თავდაჯერებული ივენი კი თავის ემოციებსა და გრძნობებს არ მალავს და ისაკისთვის ხდება პირველი ადამიანი, რომელიც საკუთარ თავთან გულწრფელობას ასწავლის.

სერიალის ეს სეზონი მხოლოდ რომანტიკული ისტორია არ არის — ის მოგვითხრობს თინეიჯერული ასაკის გამოწვევებზე, თვითგამორკვევასა და მიმღებლობაზე. მთავარი პერსონაჟები სწავლობენ, რომ სიყვარული დამალვას არ იმსახურებს და გულწრფელობა საკუთარ თავთან, ყველაზე ძლიერი ძალაა.

Heartstopper (გულის გამჩერებელი)

Heartstopper ნეტფლიქსის პოპულარული სერიალია. სცენარი 27 წლის ქვიარ ავტორს, ალის ოსმანს ეკუთვნის. ის ორი ბრიტანელი თინეიჯერი ბიჭის მეგობრობის ამბავს გვიამბობს, რომელთა ურთიერთობაც რომანტიკულ სიყვარულში გადაიზრდება.

ჩარლი სპრინგი მგრძნობიარე ბიჭია, რომელიც ბულინგსა და მენტალური ჯანმრთელობის პრობლემებს ებრძვის. ნიკ ნელსონი კი პოპულარული მორაგბეა. ნიკის მიერ საკუთარი სექსუალური იდენტობის მიღება და გზა ქამინგაუთამდე სიუჟეტის ერთ-ერთი მთავარი ხაზია.

მთავარი გმირების გარდა, სერიალში ვეცნობით ჩარლის ახლო მეგობარს, ტრანსგენდერ გოგოს, რომელიც ახალ სკოლაში საკუთარი ადგილის პოვნისთვისაც იბრძვის; ნიკის დედას, როგორც მხარდამჭერ მშობელს, რომელიც საკუთარი შვილისთვის უსაფრთხო სივრცის შექმნას ცდილობს და სხვა.

სერიალი ისეთ საკითხებს ეხება, როგორიცაა პირველი სიყვარული, მეგობრობა, იდენტობა, თვითგამორკვევა, მენტალური ჯანმრთელობა და ა.შ. ამ დროისთვის შოუს სამი სეზონია გამოსული და მაყურებელი მოუთმენლად ელის გაგრძელებას. თუ უბრალოდ სილამაზითა და სითბოთი სავსე სერიალს ეძებ, შეგიძლია ეს შოუ ახლავე ჩართო.

სერიალი Young Royals (ახალგაზრდა მონარქები) შვედური დრამაა. სიუჟეტი შვედეთის ელიტურ სკოლაში ვითარდება, სადაც განათლებას მდიდარი, გავლენიანი ოჯახების შვილები იღებენ — მათ შორის, სამეფო ოჯახის წარმომადგენლებიც.

ვილჰემი შვედეთის პრინცია, რომელიც სასწავლებლად სწორედ ამ სკოლაში გადადის. მას საზოგადოებრივი მოლოდინები და სამეფო ოჯახის მკაცრი წესები ზღუდავს და ხშირად იძულებულია, საკუთარი თავი დამალოს.

სიმონი, ვილჰემისგან განსხვავებით, პრივილეგირებული ოჯახიდან არ არის. ის დედასთან და დასთან ერთად ცხოვრობს და საკუთარ იდენტობას არ მალავს.

სერიალი გვიჩვენებს მათ შორის განვითარებულ ურთიერთობას, გულწრფელ სიყვარულს და იმ დაბრკოლებებს, რომელთა გადალახვაც ამ გზაზე უწევთ.

In From The Side (გვერდიდან)

In From The Side 2022 წლის ბრიტანული რომანტიკული დრამაა და ის, Heated Rivarly-ის მსგავსად, ორი სპორტსმენის რომანზე გვიამბობს. მთავარი პერსონაჟები ლონდონის რაგბის კლუბის წევრები არიან, რომელიც საერთაშორისო ტურნირისთვის ემზადება.

მარკს შეყვარებული ჰყავს. წყვილის ცხოვრება გარედან სტაბილურად გამოიყურება, თუმცა მაყურებელი მალევე ხვდება, რომ ეს მხოლოდ ერთი შეხედვით ჩანს ასე. ის ურთიერთობას იწყებს თავდაჯერებულ და მომხიბვლელ უორენთან, რომელიც გუნდის ახალი წევრია.

ფილმი არ ცდილობს იდეალური სიყვარულის ჩვენებას — ის მოგვითხრობს შეცდომებით, ტკივილით, პასუხისმგებლობებითა და ემოციური გაურკვევლობით სავსე ურთიერთობაზე.

Red, White & Royal Blue (წითელი, თეთრი & სამეფო ლურჯი)

2023 წლის ეს რომანტიკული კომედიური დრამა Red, White & Royal Blue წიგნის ეკრანიზაციაა.

სიუჟეტი მოგვითხრობს ამერიკის შეერთებული შტატების პრეზიდენტის შვილისა და ბრიტანეთის პრინცის ურთიერთობაზე, რომელიც თავდაპირველად დაძაბულობით იწყება, ნელ-ნელა კი ღრმა და საიდუმლო სიყვარულში გადაიზრდება.

ალექსი ჭკვიანი და ამბიციური ახალგაზრდაა, ხოლო პრინცი ჰენრი — თავშეკავებული და მორცხვი.

ბრიტანეთის სამეფო ღონისძიებაზე შეხვედრისას მათი დაპირისპირება მედიის ყურადღების ცენტრში ექცევა. პოლიტიკური სკანდალის თავიდან ასაცილებლად, ახალგაზრდები იძულებულნი არიან, “მეგობრების” როლი მოირგონ. ტყუილით დაწყებული ურთიერთობა თანდათან ნამდვილ სიყვარულში გადაიზრდება.

Fellow Travelers (თანამგზავრები)

ეს 2023 წელს გამოსული ისტორიული დრამა მინი სერიალია, სადაც, მთავარი პერსონაჟების — ჰოკინსისა და ტიმოთის ამბავს ვეცნობით. სიუჟეტი 1950-იანი წლებიდან იწყება — ეპოქიდან, როცა შტატების უმრავლესობაში ქვიარ ურთიერთობები კრიმინალიზებული იყო.

ჰოკინსი ჭკვიანი, გავლენიან წრეებთან დაახლოებული კაცია, რომელიც ყველაფერს აკეთებს ძალაუფლებისთვის, ტიმოთი კი ახალგაზრდა და იდეალისტია.

მათი ურთიერთობა თავიდან ვნებით იწყება, თუმცა ნელ-ნელა სიყვარულში გადაიზრდება. რისკების მიუხედავად, ჰოკინსი და ტიმოთი წყვილი ხდებიან, თუმცა ამის დამალვა ახლობელი ადამიანებისგანაც კი უწევთ.

სერიალი გვიყვება, თუ როგორ ვითარდებოდა მათი ურთიერთობა ათწლეულების განმავლობაში ისეთ ეპოქაში, როცა სიყვარული, შესაძლოა, რეპუტაციის შელახვად, კარიერის დაკარგვად ან დაპატიმრებადაც კი დასჯდომოდათ.