გუშინ, 13 ნოემბერს ევროპარლამენტში საქართველოში მიმდინარე მოვლენების შესახებ იმსჯელეს. არჩევნებში გამოვლენილი დარღვევების გარდა, მკაცრი კრიტიკის საგანი გახდა ქართული ოცნების მიერ მიღებული ადამიანის უფლებების შემზღუდავი რუსული სტილის კანონები, კერძოდ, ე.წ. გამჭვირვალობისა და ანტი-ლგბტ კანონი.
კანონები არაერთმა ევროპარლამენტარმა გააკრიტიკა, მათ შორის ევროკომისიის ვიცეპრეზიდენტმა, მარგარიტის სხინასმა. როგორც მან აღნიშნა, ამ კანონებით შეუძლებელი იქნება, საქართველომ ევროკავშირში გაწევრიანების გზაზე პროგრესს მიაღწიოს.
“ნებისმიერი სამომავლო თანამშრომლობის განახლება საქართველოს ხელისუფლებასთან მკაფიო და მკაცრი პირობებით იქნება გამყარებული, რომელიც ასევე ასახულია ჩვენს გაფართოების ანგარიშში. მთავრობამ ხელახლა უნდა დაადასტუროს ერთგულება რეფორმების დღის წესრიგის მიმართ, მათ შორის შეასრულოს ევროკომისიის მიერ განსაზღვრული 9 ნაბიჯი. მან ასევე, უნდა შეწყვიტოს დეზინფორმაცია, ყალბი ამბების გავრცელება და ევროკავშირის წინააღმდეგ სიძულვილის რიტორიკა; უნდა გაუქმდეს უცხოური გავლენისა და ე.წ. ოჯახური ღირებულებების შესახებ კანონები. ამისა და დემოკრატიული რეფორმების განხორციელების გარეშე საქართველოსთვის ევროკავშირიში გაწევრიანების გზაზე პროგრესი შეუძლებელი იქნება. პირობები ცნობილია და ცხადია — რაც უფრო მალე იქნება ეს გააზრებული თბილისში, მით უკეთესი”, — განაცხადა ევროკომისიის ვიცეპრეზიდენტმა.
ამ კანონის გაუქმების მნიშვნელობაზე ისაუბრა ევროპარლამენტარმა ჯორჯო გორიმ. მან კანონებს რუსეთისგან შთაგონებული უწოდა.
“კანონები, რომლებიც ცალსახად არის შთაგონებული რუსეთისგან, როგორებიცაა “კანონი უცხოური გავლენის შესახებ” ან “ოჯახის ღირებულებების დაცვის შესახებ”, ასევე საარჩევნო კოდექსში შეტანილი ცვლილებები არ აკმაყოფილებენ იმ სტანდარტებსა და ღირებულებებს, რომლებიც ფუნდამენტურია ევროკავშირისთვის და ეს აშორებს საქართველოს ევროკავშირისგან, იმ გზისგან, რომელიც საქართველომ შარშან დაიწყო”, — აღნიშნა ევროპარლამენტარმა.
დღეს ევროპარლამენტში გამართული დებატების ამ ნაწილს თბილისის მერი კახა კალაძე გამოეხმაურა. მან ჰომოფობიურ, დისკრიმინაციულ, ცენზურის დამაწესებელ კანონზე საუბრისას იმის მტკიცება დაიწყო, თითქოს ის ადამიანის უფლებებს არ შეზღუდავს. თბილისის მერი ირწმუნება, რომ ამით მხოლოდ “ლგბტ პროპაგანდის” აკრძალვა სურთ, რაც სიმართლეს არ შეესაბამება, რადგან ე.წ. ლგბტ პროპაგანდა არ არსებობს და ადამიანები არანაირი ინფორმაციის მიწოდების შედეგად არ იცვლიან იდენტობას.