მედიის თავისუფლების კოალიციის (MFC) ხელმომწერი 25 ქვეყანა განცხადებით ეხმაურება რუსულ კანონს და შეშფოთებას გამოთქვამს საქართველოში მედიის თავისუფლების მდგომარეობის გაუარესების გამო. მათი აზრით, კანონი გავლენას იქონიებს ბევრ მედია საშუალებასა და არასამთავრობო ორგანიზაციაზე, რომლებიც სამოქალაქო ჩართულობაში, ადამიანის უფლებებისა და კარგი მმართველობის მხარდაჭერაში, საქართველოს ევრო-ატლანტიკური ინტეგრაციის ადვოკატირებაში მნიშვნელოვან როლს ასრულებენ.
“ამგვარი „უცხოური აგენტის“ იარლიყი, შესაძლო მკაცრ ფინანსური ჯარიმებთან ერთად, სერიოზულად შეარყევს მათ საქმიანობასა და უარყოფითად იმოქმედებს გამოხატვის თავისუფლებაზე. ეს განსაკუთრებით შემაშფოთებელია საქართველოს დემოკრატიის მომავლისთვის, მათ შორის მოახლოებული საქართველოს საპარლამენტო არჩევნებისთვის. დამოუკიდებელი, კრიტიკული ჟურნალისტიკა თავისუფალი, ინკლუზიური და დემოკრატიული საზოგადოების აუცილებელი საფუძველია […]
გარდა ამისა, ჩვენ ღრმა შეშფოთებას გამოვხატავთ საქართველოში მომუშავე ჟურნალისტებისა და სამოქალაქო საზოგადოების წარმომადგენლების მიმართ განხორციელებული მუდმივი მუქარების, ფიზიკური თავდასხმებისა და ქონების განადგურების გამო”, — ნახსენებია განცხადებაში და აღნიშნულია ისიც, რომ მედიის თავისუფლების კოალიციის წევრი ქვეყნები ყოველთვის დაიცავენ გამოხატვისა და მედიის თავისუფლებას.
ასევე წაიკითხეთ: რა მოხდება რუსული კანონის ძალაში შესვლის შემდეგ?
მიუხედავად ფართომასშტაბიანი პროტესტებისა, ქართულმა ოცნებამ დაამტკიცა რუსული კანონი, რომლის მსგავსმა კანონმა ავტორიტარულ ქვეყნებში გააქრო თავისუფალი მედია და ყველა დემოკრატიული ინსტიტუტი. ორი თვის განმავლობაში, ფაქტობრივად, არ დარჩენილა სფერო, რომლის წარმომადგენლებმაც კანონპროექტის საწინააღმდეგო პოზიცია არ გამოთქვეს. კრიტიკულია ქვეყნის პარტნიორების განცხადებებიც, მათ შორის, შეჩერდა საქართველოს ევროკავშირში ინტეგრაციის პროცესი.
აღსანიშნავია, რომ ფართომასშტაბიან აქციებზე შეკრებილი მშვიდობიანი მოქალაქეების წინააღმდეგ ხელისუფლებამ არაერთხელ გამოიყენა როგორც უხეში ფიზიკური ძალა, ასევე ცრემლსადენი გაზი, წიწაკის სპრეი თუ წყლის ჭავლი. ფიზიკურად გაუსწორდნენ ჟურნალისტებს და აქციის არაერთ მონაწილეს. გარდა ამისა, მოქალაქეებს, რომლებიც რუსულ კანონს აპროტესტებენ, ფარული ნომრებიდან ურეკავდნენ, ემუქრებოდნენ და აგინებდნენ. რამდენიმე ადამიანს უცნობი პირები სახლებთან დახვდნენ და ფიზიკურად გაუსწორდნენ. ადამიანების შეშინების კიდევ ერთი მეთოდი იყო საცხოვრებელ სახლებთან თუ ოფისებთან შეურაცხმყოფელი და სიძულვილის წარწერების გაკეთება, პლაკატების გაკვრა.