საფრანგეთის პარლამენტმა მხარი დაუჭირა ცვლილებას, რომელიც ქალებს აბორტის უფლებას კონსტიტუციით ანიჭებს. ამ ცვლილებით საფრანგეთი მსოფლიოში პირველი ქვეყანა გახდა, რომელიც ქალებს აბორტზე გარანტირებული თავისუფლებას აძლევს.
გადაწყვეტილებას საფრანგეთის პარლამენტში ფეხზე წამოდგომითა და ოვაციებით შეხვდნენ, თუმცა ცვლილებას მხარს არ უჭერენ და მწვავედ აკრიტიკებენ აბორტის მოწინააღმდეგეები, მათ შორის, ვატიკანი.
ახალ ჩანაწერს საფრანგეთის პრეზიდენტმა, ემანუელ მაკრონმა საფრანგეთის სიამაყე უწოდა. იცოდნენ რა, რომ ვერსალის სასახლეში ისტორიულ გადაწყვეტილებას იღებდნენ, არაერთმა პოლიტიკოსმა ქალთა უფლებებზე სიტყვაც წარმოთქვა და ფრანგ ქალებს, რომლებიც აბორტის უფლებებისთვის იბრძოდნენ, პატივი მიაგო.
კენჭისყრის შემდგომ, პარიზში, ეიფელის კოშკი საზეიმოდ განათდა წარწერით: “ჩემი სხეული ჩემი არჩევანია”.
1958 წლის კონსტიტუციის გადახედვასა და მასში ცვლილების შეტანას 902 პარლამენტარს შორის, 780-მა მხარი დაუჭირა, 72 იყო წინააღმდეგი, ხოლო 50-მა თავი შეიკავა. საფრანგეთის კონსტიტუციაში ეს 25-ე, ხოლო 2008 წლის შემდგომ — პირველი ცვლილებაა.
“საფრანგეთი აჩვენებს, რომ აბორტის უფლება აღარ არის შესაძლებლობა, ეს ჩვენი დემოკრატიის პირობაა”, — განაცხადა მელანი ვოგელმა, მწვანეთა პარტიის სენატორმა და კანონპროექტის ერთ-ერთმა ინიციატორმა.
აბორტი საფრანგეთში 1975 წლიდანაა ლეგალური და მას შემდეგ კანონმდებლობა 9-ჯერაა განახლებული, თითოეულ ჯერზე აბორტზე წვდომის გაფართოების მიზნით. როგორც გამოკითხვები აჩვენებს, რეფორმას საზოგადოების დაახლოებით 85% მხარს უჭერს. საფრანგეთის პრემიერმინისტრის, გაბრიელ ატალის მოსაზრებით, აბორტის უფლება საფრთხეში იყო.
“ჩვენ ვუგზავნით მესიჯს ყველა ქალს: შენი სხეული შენ გეკუთვნის და ვერავინ მიიღებს გადაწყვეტილებას შენ ნაცვლად”, — დასძინა ატალმა კენჭისყრის დაწყების წინ.