სარეკლამო სააგენტო ლიმონში პოლიცია შევიდა და ჩხრეკას ატარებს. თანამშრომლებისთვის მიზეზი უცნობია. იმ დროს, როცა პოლიცია მივიდა, გადაღება მიმდინარეობდა, რომელშიც ბავშვებიც მონაწილეობენ და რომლებიც ამ დროს ადგილზე იმყოფებოდნენ.
თანამშრომლები და მეგობრები სოციალურ ქსელში წერენ, რომ ვერ უკავშირდებიან კომპანიის დირექტორ გიორგი ოკმელაშვილს. ვრცელდება დაუზუსტებელი ინფორმაცია მისი დაკავების შესახებაც, თუმცა შსს ამ დრომდე დუმს.
“შოკში ვართ. უცებ შემოვარდნენ. პასუხსაც არ გვცემენ, რა ხდება. ეს არის ვიდეო საწარმო, ვიღებთ კლიპებს კომპანიებისთვის, კორპორატიული კლიენტებისთვის”, — ამბობს ადგილზე მყოფი ერთ-ერთი თანამშრომელი TV პირველთან.
სხვა თანამშრომლის ინფორმაციით, პოლიციას მიზეზი არ განუმარტავს და ამ ეტაპზე ჩხრეკას ესწრება კომპანიის ერთი თანამშრომელი.
ადგილზე მყოფი პოლიცია ჟურნალისტებს სტანდარტულად პასუხობს:
“საგამოძიებო მოქმედებები მიმდინარეობს და პრესცენტრს მიმართეთ”.
მედია აპრილმა პრესცენტრს მიმართა, თუმცა უწყება ამ დროისთვის ინფორმაციას არ ავრცელებს.
გარდა ამისა, ვრცელდება ინფორმაცია კიდევ რამდენიმე სარეკლამო და კრეატიულ სააგენტოში პოლიციის შესვლის შესახებ. მედია აპრილი ცდილობს ამ ინფორმაციის გადამოწმებას.