საბერძნეთი გახდა პირველი მართლმადიდებელი ქვეყანა, რომელშიც ერთი და იმავე სქესის წყვილებს შორის ქორწინება დაკანონდა. გუშინ, 15 თებერვალს, ათენის პარლამენტში ამ კანონს 176-მა წევრმა დაუჭირა მხარი. რეფორმის მოწინააღმდეგეებს შორის 76 დეპუტატი იყო, 2-მა ხმის მიცემისგან თავი შეიკავა, ხოლო 46 კენჭისყრაზე არ იმყოფებოდა.
„ამას წლების განმავლობაში ველოდით. ეს ისტორიული მომენტია და ბევრ ჩვენგანს არც კი სჯეროდა, რომ ის ოდესმე დადგებოდა“, — განაცხადა ცნობილმა გეი აქტივისტმა, სტელა ბელიამ.
ეს კანონი ერთი და იმავე სქესის წყვილებს არა მხოლოდ სამოქალაქო ქორწინებაში შესვლის, არამედ ასევე ბავშვების აყვანის უფლებას აძლევს.
კენჭისყრას წინ უძღოდა ორდღიანი ცხარე დებატები, მანამ კი რამდენიმეკვირიანი საჯარო აღშფოთება. რეფორმას მხარდამჭერებმა „თამამი“ და „დიდი ხნის დაგვიანებული“ უწოდეს, თუმცა მოწინააღმდეგეების, მათ შორის მართლმადიდებელი ეკლესიის, აზრით, ის „ანტისოციალური“ და „არაქრისტიანულია“.
საკუთარი პარტიის მხრიდანვე მნიშვნელოვანი წინააღმდეგობის მიუხედავად, პრემიერმინისტრი კირიაკოს მიცოტაკისი კანონს მხარს უჭერდა. მისი თქმით, კონსერვატიზმი არ უნდა აგვერიოს მოძველებულ წარმოდგენებში, რომლებიც აღარ შეესაბამება თანამედროვე საზოგადოებას.
„რეფორმა, რომელსაც დღეს ვაკანონებთ, ჩვენი ბევრი თანამოქალაქის ცხოვრებას ბევრად უკეთესს გახდის ისე — და ამას ხაზგასმით ვამბობ — რომ სანაცვლოდ არაფერს დააკლებს სხვებს“, — თქვა მიცოტაკისმა და დაამატა, რომ ახალი კანონი ერთი და იმავე სქესის წყვილებს ასევე მშობლობის სრულ უფლებას მიანიჭებდა.
კანონს სამმა ოპოზიციურმა პარტიამ დაუჭირა მხარი, მათ შორის მთავარმა მემარცხენე ოპოზიციურმა პარტია „სირიზამ“, რომლის სათავეშიც სტეფანოს კასილაკისია — საბერძნეთის პირველი გეი პოლიტიკური ლიდერი. მიუხედავად ამისა, რეფორმა მომხრეების მხრიდან კრიტიკის საგანიც გახდა და მას „არასრული“ უწოდეს, რადგან ეს ცვლილება მაინც არ აძლევს ერთი და იმავე სქესის წყვილებს სუროგაციის გზით მშობლობის უფლებას.
კანონის მიღების შემდეგ საბერძნეთის პრემიერმინისტრმა X-ზე დაწერა: „კანონი მიღებულია: დღეიდან საბერძნეთი ამაყად ხდება ევროკავშირის მე-16 ქვეყანა, რომელშიც თანასწორი ქორწინება დაკანონდა. ეს მნიშვნელოვანი მიღწევაა ადამიანის უფლებებისთვის და ის თანამედროვე საბერძნეთს ასახავს — პროგრესულ და დემოკრატიულ ქვეყანას, რომელიც ერთგულია ევროპული ღირებულებების“.
წყარო: The Guardian