“მე და თეკლას გვაკავშირებს ოჯახური ურთიერთობები. ჩემი ცხოვრება არ მახსოვს თეკლას გარეშე, სულ იყო. ალბათ 25 წლის ვიქნებოდი, როცა ათინა მოვიდა ჩვენს ცხოვრებაში და მაშინვე დავმეგობრდით”, — გვიყვება სოფო და სიცილით ამატებს: “და იმის მერე მოვდივართ ასე ხელიხელჩაკიდებულები”.
სოფო ბუაძე, ათინა ბრეგვაძე და თეკლა თევდორაშვილი GrlzWave-ის თანადამფუძნებლები არიან. ეს არის პლატფორმა, რომელიც მუშაობს ქალებისა და ქვიარების უფლებებზე, ამ მიმართულებით ცნობიერების ამაღლებაზე მარტივი ენით გადმოცემული მასალების საშუალებით.
Curated by girls, კოლექტივი ბერლინიდან გახდა მათი პირველი ინსპირაცია, რომ მსგავსი პლატფორმა საქართველოშიც შეექმნათ. მსჯელობდნენ, როგორ აკლია ჩვენს ქვეყანას მსგავსი სივრცეები და შექმნაზე ფიქრიც დაიწყეს. თავდაპირველად უფრო ხელოვნების მიმართულებით მუშაობას განიხილავდნენ, თუმცა მას შემდეგ, რაც იმსჯელეს, ყველაზე მეტად სად იყო ამის საჭიროება და როგორ მიეწოდებინათ ინფორმაცია აუდიტორიისთვის, ქვიარ და ფემინისტურ კონტენტზე შეჩერდნენ.
“თავიდან ბევრი ვიფიქრეთ, რის გაკეთება შეგვიძლია და როგორ. მერე იმაზე წავიდა ფიქრი, რა საჭიროებაა უფრო მეტად და ჩვენ რა გამოცდილება, ცოდნა და უნარ-ჩვევები გვაქვს. თეკლა ვიდეო მიმართულებით სწავლობდა და მუშაობდა, მე ჟურნალისტიკის, სოფო მარკეტინგის და როცა შევაჯერეთ ეს ყველაფერი და შევუერთეთ ქვიარ ფემინისტურ აქტივიზმს, რაშიც ისედაც ჩართულები ვიყავით და გვაინტერესებდა, გაჩნდა GrlzWave”, — ამბობს ათინა.
სოფო აღნიშნავს, რომ ამ თემებზე მუშაობა ორგანულად მოხდა და დიდი ხნით ადრე არ დაუგეგმავთ, რა იქნებოდა მათი პლატფორმის შინაარსი.
“არ იყო მსგავს თემებზე ჩვეულებრივ, მარტივ ენაზე ნაწერი “ცანცარა” კონტენტი, რომელსაც ჩვენც გავიგებდით და ჩვენი თანატოლებიც, განსაკუთრებული ძალდატანების გარეშე, რომ აი, ახლა ვიმეცადინოთ ფემინიზმი კი არა, ჩვეულებრივად, თავისით რომ მოგეწოდება ინფორმაცია”, — ამბობს ის.
პლატფორმის სახელზე ბევრი იფიქრეს. თავდაპირველად მხოლოდ ქართულენოვან ვარიანტებს განიხილავდნენ, მათ შორის იყო “ტალღა”. ამბობენ, არ ვიცით, რანაირად მივედით GrlzWave-მდე, მაგრამ წლებია ხუმრობის თემაა ის, რომ ჩვენს სახელს თითქმის ყველა არასწორად წერსო.
“ჩვენი ძირითადი ფოკუსი ქალთა და ქვიარ უფლებებია, მაგრამ, ფემინიზმის ინტერსექციურობიდან გამომდინარე, ყველაფერს მოიცავს, განსაკუთრებით მარგინალიზებული ჯგუფების უფლებებისა და პრობლემების შესახებ ინფორმაციის გავრცელებას. ვცდილობთ, გავავრცელოთ ინფორმაცია და გავზარდოთ ცნობიერება სხვადასხვა საკითხზე და, რაც მთავარია, ეს ყველაფერი გავაკეთოთ მარტივი და ადამიანური ენით, მეგობრული დამოკიდებულებით”, — გვეუბნება თეკლა.
მისი თქმით, GrlzWave-სთვის ტაბუირებული თემა არ არსებობს და თუ სხვა ორგანიზაცია ან მედია პლატფორმა შეიძლება მოერგოს რაღაც ჩარჩოს, მათთვის წითელი ხაზი მხოლოდ ეთიკურობაზე გადის და არა ტაბუზე. თეკლა აღნიშნავს, რომ ეს ძალიან ეამაყება, “განსაკუთრებით ახლა და განსაკუთრებით ქართულ კონტექსტში”.
ქალთა ფონდი იყო პირველი, ვინც მათ იდეას ფინანსურად მხარი დაუჭირა და როგორც ამბობენ, დაიჯერა მათი. სამივე აღნიშნავს, რომ ეს მხარდაჭერა ძალიან მნიშვნელოვანი იყო, რადგან თუ იქამდე აქტივიზმში მოხალისეობრივად იყვნენ ჩართულები, ამან საკუთარი თავის რწმენა შემატა და მეტი მოტივაციაც მისცა, გაუხსნა გზა მომავალში სხვა პარტნიორების მოძიებისკენ.
“გამოგვზარდა”, — დასძენს თეკლა, ათინა კი აღნიშნავს: “შოკი იყო. პროექტის წერაც არ ვიცოდით წესიერად. მართლა არაფერი ვიცოდით კონტენტის კეთების გარდა და ქალთა ფონდმა ძალიან ბევრი რამ მოგვცა და გვასწავლა”.
GrlzWave-ის ძირითადი საქმიანობა სხვადასხვა ფორმატის საგანმანათლებლო მასალების მომზადებაა, იქნება ეს პოსტები სხვადასხვა სოციალურ ქსელში თუ ვიდეოები.
“გვაქვს პრიორიტეტული თემები, მაგალითად, ქვიარ უფლებები, მენტალური ჯანმრთელობა, სილამაზის სტანდარტები და ზოგადად ყველაფერი, რაც ჩვენ გვიკავშირდება და გვეხება. არის ისეთი თემებიც, რომლებიც შეიძლება ჩვენთან პირდაპირ კავშირში არ იყოს, მაგრამ ვფიქრობთ, რომ იმ ქვეყანაში და იმ პოლიტიკურ კლიმატში, სადაც ვართ და როგორც ვართ, ამ ყველაფერზე საუბარი მნიშვნელოვანია, რომ ამ ყველაფერზე ვისაუბროთ”, — ამბობს ათინა.
გარდა ამისა, აქვთ მურალები საქართველოს სხვადასხვა ქალაქში — ამ დროისთვის ჯამში 10.
GrlzWave აორგანიზებს ფიზიკურ შეხვედრებსაც, რომელიც სხვადასხვა საკითხს ეხება. მათ შორის შეიძლება იყოს, მაგალითად, იოგას სესია, ასევე, გამოფენები.
სოფოს თქმით, GrlzWave-ში სჯერათო, რომ განათლება, იქნება ეს ფორმალური თუ არაფორმალური, არის ჩვენი ყოფის საფუძველი და იმ თემებზე, რომლებზეც ისინი მუშაობენ, სკოლაში არაფერი ისწავლება, არადა, მნიშვნელოვანია, რომ ადამიანს საკუთარ ჯანმრთელობაზე პატარა ასაკშივე ჰქონდეს ინფორმაცია.
“მგონია, რომ ამ ინფორმაციის მიწოდება უმნიშვნელოვანესია მარტო იმიტომ, რომ ვიყოთ ჯანმრთელები და უფრო კარგი, ხარისხიანი ცხოვრება გვქონდეს ყველას ერთად”.
ათინა ამატებს, რომ ეს ინფორმაცია განსაკუთრებით მნიშვნელოვანია GrlzWave-ის ძირითადი აუდიტორიისთვის, 16-დან 25 წლამდე ქალებისთვის.
“ამ ასაკში განსაკუთრებით მნიშვნელოვანია იცოდე, რომ იმ რაღაცებში, რასაც ცხოვრებაში გადიხარ, მარტო არ ხარ და ერთადერთი არ ხარ, რომელსაც რაღაც დაბრკოლებები, წინაღობები ხვდება, ცუდად გრძნობს თავს და ა.შ. მგონია, რომ ამ სივრცეს რაღაცნაირად ქმნის და ავსებს GrlzWave, აუდიტორიისგანაც მიგვიღია მსგავსი უკუკავშირი, რომ ეს უსაფრთხო სივრცეა, სადაც შეუძლიათ რაღაცები თავადაც გააზიარონ და რაღაცები მიიღონ კიდეც”, — ამბობს ის, სოფო კი ამატებს: “მნიშვნელოვანია იმის ცოდნა, რომ თანამოაზრეები გყავს, რომ სადაც მარტო გეგონა თავი, თურმე მარტო არ ხარ. მერე უფრო ადვილი ხდება ხოლმე პატარ-პატარა ბრძოლები”.
სოფოც, თეკლაც და ათინაც პარალელურად სხვა საქმიანობებშიც არიან ჩართულები, მაგრამ ძირითად დროსა და რესურსებს GrlzWave-ს უთმობენ.
“საკუთარ თავს ვაიდენტიფიცირებ როგორც არტივისტს. ძალიან მომწონს ეს ტერმინი, რადგან ხელოვნებისა და აქტივიზმის გადაკვეთაა და რეალურად გამოხატავს ჩემს საქმიანობას. მაგალითად, მუსიკასაც ვაკეთებ, დიჯეი ვარ და ჩემი აქტივისტური მხარე აქ ის არის, რომ რომელიმე ღონისძიებაზე შემიძლია კონკრეტული განცხადება გავაკეთო, კონკრეტული მესიჯი ჩავაქსოვო. ეს ტერმინი მაგიტომ მომწონს, რომ ორივეს აერთიანებს”, — დასძენს თეკლა.
გვიყვებიან, GrlzWave სამმა ადამიანმა დავიწყეთ, მაგრამ ხალხი ნელ-ნელა შემოგვემატა და უკვე 10-მდე ვართო.
“პატარა გუნდი ვართ, მაგრამ ძაან საყვარლები ვართ”, — ამატებს სოფო.
ათინას აღნიშნავს, რომ ნელ-ნელა ძალიან გაიზარდნენ და თუ თავიდან პატარები და გამოუცდელები იყვნენ, ახლა უკვე GrlzWave გახდა ვიღაცებისთვის ის სივრცე, სადაც თავიანთ პირველ ნაბიჯებს დგამენ, რაც მისთვის სასიხარულო და საამაყოა.