ევროპული მომავლის მხარდასაჭერად სამოქალაქო საზოგადოების აქტივობები გრძელდება. საქართველოს მარნების 178-მა წარმომადგენელმა ევროპულ საბჭოს და ევროკავშირის ელჩს, პაველ ჰერჩინსკის ღია წერილით მიმართა და მოუწოდა, ქვეყანას კანდიდატის სტატუსის მიანიჭოს.
“მოგმართავთ საქართველოს მარნების წარმომადგენლები, ის ადამიანები, ვინც ვემსახურებით და ვინარჩუნებთ ღვინის სამშობლოს მევენახეობა-მეღვინეობის რვაათასწლოვან გამოცდილებას და ვქმნით როგორც ჩვენი ქვეყნისთვის ყველა დროში ეკონომიკურად ყველაზე ღირებულ პროდუქტს, ისე — საქართველოს ეროვნული და კულტურული იდენტობის მთავარ სიმბოლოს — ქართულ ღვინოს”,— ვკითხულობთ წერილში.
მეღვინეები აცხადებენ, რომ ათწლეულების მანძილზე, საბჭოთა და პოსტსაბჭოთა საქართველოს მევენახეობა-მეღვინეობა სავალალოდ იყო დამოკიდებული რუსეთის დიდ, არასტაბილურ და დაბალი სამომხმარებლო კულტურის ბაზარზე და ყალიბდებოდა დაბალი ხარისხის, იაფფასიან პროდუქტად. აღნიშნავენ, რომ რუსული ემბარგოს შემდეგ, როცა სახელმწიფომ ბუნებრივად დაიწყო ზრუნვა წარმოების ხარისხის გაუმჯობესებაზე, ამ საქმეში მათ გვერდით იდგნენ ღვინის ევროპელი პროფესიონალები, გავლენიანი მედია, ევროპული ორგანიზაციები და ფონდები.
“სწორედ მათმა მხარდაჭერამ ახალი სული შთაბერა საქართველოს მევენახეობის რეგიონებში მეღვინეობის უძველესი ტრადიციების გაცოცხლებას. განსაკუთრებით აღსანიშნავია, რომ მიკრო და მცირე მეწარმეებს, ვისაც მანამდე შეზღუდული ჰქონდა ფინანსებზე წვდომა, ევროპული ფონდების დახმარებით მიეცათ შესაძლებლობა, მამა-პაპათა საქმიანობისთვის ეკონომიკური ღირებულება მიენიჭებინათ. ტრადიციული ღვინის შექმნაში დაოსტატებულმა არაერთმა ოჯახმა საქართველოს პატარა სოფლებიდან წარმატებით გამოიყენა ეს შესაძლებლობა და მათმა ქვევრის ღვინომ ღირსეული ადგილი დაიმკვიდრა ევროპის სხვადასხვა ქალაქში არაერთი მაღალი კლასის რესტორნისა თუ სასტუმროს ღვინის ბარათში, აღიარება მოიპოვა პროფესიულ საზოგადოებაში ღვინის საერთაშორისო კონკურსებზე. ასე გავაცანით მსოფლიოს ქართული ვაზის ბიომრავალფეროვნება, ღვინის რეგიონები, ქარვისფერი ღვინის უნიკალური სტილი და სპეციფიკური ტერუარები დასავლეთ თუ აღმოსავლეთ საქართველოდან”, — წერენ მეღვინეები.
ხელმომწერები განმარტავენ, რომ სამოცდაათწლიანი საბჭოთა რეჟიმისა და პოსტსაბჭოთა პერიოდის შემდეგ ქართული ღვინო ახალი იდენტობის ძიებისა და განვითარების ახალ, გარდამტეხ საფეხურზე გადასვლის პროცესშია. ამისათვის კი სჭირდება დამოუკიდებელ სახელმწიფოში სტაბილური, მშვიდობიანი და მდგრადი განვითარების პირობები — დარგის მიკრო, მცირე და საშუალო მოთამაშეთათვის ფინანსებზე წვდომის თანასწორი შესაძლებლობები, ხარისხიანი განათლება და კოოპერაციული კულტურის გამომუშავება მეწარმეების გაძლიერების მიზნით. ასევე, ოკუპანტი ქვეყნის ბაზარზე დამოკიდებულების თანმიმდევრული შემცირება და სანაცვლოდ ექსპორტის გაზრდა სტაბილური ეკონიმიკისა და ღვინის მაღალი სამომხმარებლო კულტურის ქვეყნებში.
“ჩვენი თხოვნაა, მიიღოთ საქართველოსთვის ესოდენ მნიშვნელოვანი გადაწყვეტილება ევროკავშირის კანდიდატის სტატუსის მინიჭებასთან დაკავშირებით, რომ როგორც საქართველოს უახლეს ისტორიაში ქართულმა ღვინომ გაიკვალა გზა თავის ბუნებრივ ეკოსისტემაში — ევროპაში, სწორედ ასე დაიმკვიდროს დამოუკიდებელმა საქართველომ, როგორც სახელმწიფომ თავისი ადგილი თავისუფალი სამყაროს ევროპულ ოჯახში”, — ვკითხულობთ წერილში.
9 დეკემბერს სამოქალაქო საზოგადოების ორგანიზებით დაგეგმილია მარში, რომელიც რესპუბლიკის მოედნიდან- ევროპის მოედნამდე გაიმართება და ევროკავშირის დროშა გაიშლება.
2021 წელს, საქართველო, უკრაინა და მოლდოვა ასოცირებული ტრიოს წევრები გახდნენ. მემორანდუმი ევროპასთან ინტეგრაციის გზაზე ძალების გაერთიანებას ისახავდა მიზნად. 2022 წელს უკრაინამ და მოლდოვამ ევროკავშირის წევრობის კანდიდატის სტატუსი მიიღეს, საქართველომ კი – გაწევრიანების პერსპექტივა, თან 12 რეკომენდაციის შესრულება დაევალა. 2023 წლის ივნისში ევროკომისიამ დასკვნა გამოაქვეყნა, რომლის მიხედვით, საქართველოს 12 რეკომენდაციიდან მხოლოდ 3 ჰქონდა სრულად შესრულებული.
გავლენიანი ორგანიზაციების კვლევებით, საქართველოს მოსახლეობის უმრავლესობა ევროკავშირში გაწევრიანებას უჭერს მხარს. ამის ფონზე წევრობის განაცხადის შეტანის შემდეგ ხელისუფლების მხრიდან გადადგმულ ნაბიჯებს პროტესტი მოჰყვა, რადგან მათი ნაწილი ეწინააღმდეგებოდა რეკომენდაციებს და ევროკავშირის ღირებულებებს. მაგალითად: აქტივისტების ცარიელი ფურცლებისთვის დაკავება; რუსული კანონის ინიციირება, რასაც მრავალათასიანი პროტესტი და პოლიციის მიერ ძალადობრივი დარბევა მოჰყვა; რუსეთის მოქალაქეების და რუსული ფულის შემოდინების ზრდა; სანქცირებული პირების წინააღმდეგ უმოქმედობა; პოლიტიკური თანამდებობის პირების მხრიდან ადამიანის უფლებებისა და უფლებადამცველების წინააღმდეგ გაჟღერებული ფრაზები თუ ძალადობრივი, პრორუსული ჯგუფების წინააღმდეგ უმოქმედობა და მათი დაუსჯელობა.
ამ მოვლენების შემდეგ, 2023 წლის ნოემბერში ევროკომისიისიამ კანდიდატის სტატუსის მინიჭების რეკომენდაცია გასცა. თუმცა, იმ დათქმით, რომ გარკვეული რეფორმები გატარდება. ევროკომისია წერდა, რომ სრულ მხარდაჭერას უცხადებს საქართველოს მოქალაქეების აბსოლუტური უმრავლესობის გულწრფელ მისწრაფებას, რომ ევროკავშირში გაწევრიანდეს.
ამავე თემაზე:
- რას ამბობს ევროკომისიის ანგარიში ადამიანის უფლებებთან დაკავშირებულ საკითხებზე
- “ვულოცავ საქართველოს მოსახლეობას, რომელიც მტიცედ და თანმიმდევრულად უჭერს მხარს ევროპულ გზას” — ჰერჩინსკი
- ღარიბაშვილის მილოცვა ხალხს და არაერთი მადლობა ქართულ ოცნებას