შინაგან საქმეთა სამინისტროს ყოფილ მაღალჩინოსანს, იოსებ სიგუას, ცოლი სოფია სიგუა ძალადობაში, სიცოცხლის მოსპობის მუქარასა და მკვლელობის მცდელობაში ადანაშაულებს. ამის შესახებ ქალმა TV პირველის ინტერვიუში, გადაცემა შაბათის ეთერში 4 ივლისს ისაუბრა. ამ დროს სოსო სიგუა თბილისის პოლიციის დეპარტამენტის დეტექტივების სამმართველოს უფროსის თანამდებობას იკავებდა.
“ბავშვები ტირიან, რომ დედა მოგკლავს? ეს ყველაფერი ხომ მათაც იციან და ეშინიათ, რომ დედა არ მოუკლას მამამ, მამამ, რომელიც პოლიციელია. […] როგორ შეიძლება, ჩინოვნიკმა დაჩაგროს ცოლი. ჩვეულებრივი ძალადობის მსხვერპლი ვიყავი მუდამ და ვიყავი ჩუმად.
ადამიანი ცოლს რომ ასეთი სისასტიკით ექცევა, ის გარეთ რას იზამს?! მე ის მინახავს აგრესიული ღონისძიებებზე და მე ეს ძალიან კარგად ვიცი, იმიტომ რომ ჩემთან ისეთი არაადეკვატური სასტიკი სახით იბრძოდა და ისე მისწორდებოდა, სულ ვეუბნებოდი — დაკავებული ხომ არ ვარ, ასე რატომ მექცევი”.
“წაგიყვან, კადრში ჩაგდებ და დაგმარხავ, უგზო-უკვლოდ დაკარგულად გამოგაცხადებ. ყოველთვის თავს იზღვევდა, ამ ყველაფერს როცა აკეთებდა, ტელეფონს მართმევდა, ჯიბეში თვითონ იდებდა და მერე იწყებოდა რინგი. მე არასოდეს დაზიანება სახეზე არ მქონია. როგორც დაკავებულს, თავში მირტყამდა მუშტს”.
ქალი ინტერვიუში ამბობს, რომ ადგილი ჰქონდა მკვლელობის მცდელობასაც.
“ყოველთვის მემუქრებოდა – იქნები გაუხსნელი მკვლელობა, ეგ ხომ იცი, ჩემზე უკეთ არავის გამოსდის. სხვათა შორის, მცდელობა ჰქონდა, აივანზე დამსვა მოაჯირზე და მაგდებდა. ამის კადრებიც მქონდა, თუმცა თვითონ წამიშალა. უბრალოდ, რომ გახედა და დღის შუქი იყო და ბევრი სხვა მეზობელი, წინ კორპუსი იყო, მიხვდა, რომ არასარფიანი დრო შეარჩია”.
გარდა ამისა, როგორც სოფია სიგუა ჰყვება, ქმარი მას ფსიქიატრიულ საავადმყოფოში მოთავსებითაც ემუქრებოდა.
“[მითხრა] შენ თუ მე ახლა ოდესმე მიჩივლებ და ამ ყველაფერს გადაიტან სამართლებრივ ჭრილში, წაგიყვან საგიჟეთში [სტილი დაცულია], გაგიკეთებენ ისეთ წამალს, სანამ შენ ალტერნატიულ ექსპერტიზას მოითხოვ, ისეთი ნივთერება გექნება, ექსპერტიზა დაადასტურებს რომ ხარ შეურაცხადი და ამით მოგიშორებო”.
სიუჟეტის მიხედვით, სამართლებრივი ბრძოლა ქალმა 2026 წლის თებერვალში დაიწყო, 21 თებერვალს კი სიგუას შემაკავებელი ორდერი გამოუწერეს. ქალის თქმით, გაიმართა სასამართლო სხდომაც, სადაც მოსამართლემ მასზე ძალადობის ფაქტები მოისმინა — ძალადობაზე აცნობა გენერალურ ინსპექციასაც. სოფია სიგუას თქმით, ამის შემდეგ მის იმჟამინდელ ადვოკატზე მუქარა და ზეწოლა დაიწყო, რომელსაც შინაგან საქმეთა მინისტრის მოადგილე, რონი მესხი ხელმძღვანელობდა. TV პირველთან მესხი ბრალდებებს უარყოფს და კითხვებს ასე პასუხობს — “ოჯახური კონფლიქტი აქვთ ორივეს”.
TV პირველის სიუჟეტში ასევე ნაჩვენებია შემაკავებელი ორდერის გამოწერიდან რამდენიმე დღეში, 4 მარტით დათარიღებული შეთანხმების დოკუმენტი. სიუჟეტის თანახმად, დოკუმენტში ნათქვამია, რომ თუ ქალი პოლიციელი ქმრის წინააღმდეგ პროკურატურაში შეტანილ სარჩელს გამოიტანს და შემაკავებელი ორდერის გაუქმებას მოითხოვს, ქორწინებაში შეძენილი ქონების თანამესაკუთრე გახდება. სოფია სიგუას თქმით, გარიგებაზე იძულებითა და ზეწოლით დაითანხმეს. ტელეკომპანიის ცნობით, 3 თვეში სოსო სიგუამ შეთანხმების გაუქმება მოითხოვა, უარი თქვა შვილებისთვის ალიმენტის გადახდაზე და სარჩელით სოფია სიგუას მშობლების ქონების დაყადაღება მოითხოვა.
ამ სიუჟეტის გასვლიდან რამდენიმე დღეში სოსო სიგუა დააწინაურეს და ის ცენტრალური კრიმინალური პოლიციის დეპარტამენტის ორგანიზებულ დანაშაულთან ბრძოლის მთავარი სამმართველოს უფროსად დანიშნეს. 11 ივლისს ცნობილი გახდა, რომ გამოძიების დაწყების შემდეგ, სიგუას ელექტრონული სამაჯური გაუკეთეს, რის შემდეგად მან ახალი თანამდებობა დატოვა.
გუშინ, 13 ივლისს ორგანიზაცია საფარმა, რომელიც საქმეში სოფია სიგუას წარმომადგენელია, განცხადება გამოაქვეყნა, სადაც ქრონოლოგიურად მიმოიხილავს საქმის დეტალებს. მათი ცნობით, საფარს სოფია სიგუამ 8 ივლისს მიმართა, საქმეში ორგანიზაციის იურისტი ჩაერთო და პროკურატურამ სისხლის სამართლის გამოძიება დაიწყო. საფარის ინფორმაციით, სიგუა 112-ს დაუკავშირდა და შემაკავებელი ორდერის გამოცემა მოითხოვა, თუმცა რეაგირება არ მომხდარა: “მეტიც, გაირკვა, რომ ორდერის მოთხოვნაზე უკვე თავად იოსებ სიგუამაც გაიგო”.
საფარის ცნობითვე, სოსო სიგუა და მისი ადვოკატები მიზანმიმართულად ავრცელებენ ინფორმაციას, თითქოს საქმე ქონებრივ დავას ეხება.
“ამგვარი ცრუ ნარატივით დაცვის მხარე ცდილობს დაჩრდილოს და მეორეხარისხოვანი გახადოს მსხვერპლის 13-წლიანი ძალადობრივი გამოცდილება, რაც სოფია სიგუას დისკრედიტაციას და საზოგადოების შეცდომაში შეყვანას ისახავს მიზნად. მოვუწოდებთ მედია საშუალებებს, გადაამოწმონ ინფორმაცია და თავი შეიკავონ ცალმხრივი გაშუქებისგან”, — აღნიშნავენ ისინი.