მედიის განცხადებით, რომლის ხელმომწერი მედია აპრილიც არის, “ნებისმიერი ჟურნალისტის და მათი ოჯახის წევრების მიმართ დანაშაულებრივ ქმედებებზე პასუხისმგებლობას მთლიანად ვაკისრებთ ხელისუფლებას”.
“ქართულ ოცნებას” რუსული კანონი ჯერ არ მიუღია და თავისუფალი მედიისა და საზოგადოებრივი ორგანიზაციების წინააღმდეგ უკვე აამოქმედა რეპრესიული მეთოდები, რაც მიზნად ისახავს დამოუკიდებელი ჟურნალისტებისა და აქტივისტების მიმართ ძალადობას. ხელისუფლება ცდილობს დააშინოს და გააქროს ის მოქალაქეები და ორგანიზაციები, რომლებიც მას ვამხელთ მასშტაბურ კორუფციაში, ნეპოტიზმში, გაუმჭვირვალობაში, რუსული გავლენების გაზრდაში, სისტემური დანაშაულების გამოუძიებლობაში და ა.შ.
შექმნილი ვითარება – ხელისუფლების მხრიდან მუქარისა და ძალადობისკენ საჯაროდ მოწოდების შემცველი ქმედებები ხელს გვიშლის ჟურნალისტური საქმიანობის განხორციელებაში”, — ნათქვამია განცხადებაში.
განცხადებას ხელს აწერენ: ნეტგაზეთი / ბათუმელები; სტუდია „მონიტორი“; პუბლიკა; მთის ამბები / საქართველოს ამბები; საქართველოს ჟურნალისტური ეთიკის ქარტია / მედიაჩეკერი; ტაბულა; OC-media; Jam-news; On.ge; Chai-khana; kutaisipost.ge; qartli.ge; გამომძიებელ ჟურნალისტთა გაერთიანება “აი, ფაქტი”; მედია აპრილი; სამხრეთის კარიბჭე; პროექტი 64; სათემო რადიო “მარნეული”.
ბოლო კვირების განმავლობაში, საქართველოს მოქალაქეები რუსულ კანონს აპროტესტებენ და თბილისსა და სხვადასხვა ქალაქებში აქციებს მართავენ. მიუხედავად, მასშტაბური სახალხო პროტესტისა და დასავლელი პარტნიორების კრიტიკული პოზიციისა, “ქართული ოცნება” კანონის მიღებას მაინც აპირებს და ორშაბათს, 13 მაისს, დილის 09:00 საათზე მესამე და ბოლო საკომიტეტო მოსმენა ჩაინიშნა. სამართალდამცავმა უწყებებმა საპროტესტო აქციების დასაშლელად გამოიყენეს წიწაკის სპრეი, ცრემლსადენი გაზი, წყლის ჭავლი, რეზინის ტყვიები (ფოტოებისა და დაზიანებების ამსახველი მასალების მიუხედავად, რეზინის ტყვიების გამოყენებას უარყოფენ). ხშირად აღნიშნულ ზომებს წინასწარი გაფრთხილების გარეშე იყენებდნენ, თანაც მშვიდობიანი პროტესტისას. აქციებზე დააკავეს ათობით ადამიანი, სცემეს მოქალაქეებს, ჟურნალისტებს, პოლიტიკოსებს.
ამასთან, უცნობი პირები ფიზიკურად უსწორდებიან აქციის მონაწილეებს, გარდა ამისა, დაფარული ნომრებით რეკავენ პროტესტის მონაწილე ადამიანებთან და მათ შეშინებას მუქარითა და გინებით ცდილობენ. დღეს “ქართული ოცნების” თავმჯდომარე შალვა პაპუაშვილმა დააანონსა რეესტრის შექმნაც, სადაც, შესაძლოა, ადამიანები კრიტიკული აზრის გამო აღმოჩნდნენ. 8 მაისს, საღამოს საათებში კი, ფიზიკურად გაუსწორდნენ პოლიტიკოსებსა და იმ მოქალაქეებს, რომლებიც აქციებში აქტიურად არიან ჩართული.