“მოგესალმებით, როგორც ჩანს პრემიერმა დამასწრო, თუ დასწრებაზე არის… გუშინ საქართველომ კიდევ ერთხელ აჩვენა მსოფლიოს და გვიჩვენა ჩვენ ყველას, ძლიერად, მშვიდობიანად, დამაჯერებლად, რომ არ დაუშვებს ევროპული მომავლის კითხვის ქვეშ დაყენებას და არ დაუშვებს რუსულ კანონს”, — ასე დაიწყო პრეზიდენტმა ბრიფინგი, რომელიც პრემიერმინისტრის გამოსვლიდან ერთ საათში გაიმართა.
“ეს არის და ეს, ამას ვერაფერი ვეღარ შეცვლის ვერანაირი გათვლა, თუ გადათვლა. ძალიან სასაცილო არის, როცა პოლიტიკოსები, ვითომ სერიოზულები, მაღალი IQ-თი ითვლიან და ვეღარ ითვლიან, თუ რამდენი ადამიანი იყო. არაფერი დათვლა არ არის საჭირო, ყველას წინაშე წარდგა საზოგადოება, რომელიც ნამდვილად ამზადებს ხვალინდელ დღეს”, — თქვა პრეზიდენტმა და ასე მამუკა მდინარაძესა და ირაკლი კობახიძეს უპასუხა, რომლებიც ბოლო დღეებში ციფრებით მანიპულირებენ და “მაღალი IQ-თი” ტრაბახობენ.
პრეზიდენტმა აღნიშნა, რომ ხელისუფლებამ აჩვენა დაბნეულობა და ისიც, რომ ამ რაოდენობის ხალხთან არანაირი სტრატეგია არ აქვთ, გარდა ტყუილისა და მანიპულაციისა, რომ გაუგებრობა შეიქმნას.
“ტყუილს მიჩვეული ვართ. ვიცით, რომ ერთხელ უკვე ეს რუსული კანონი გაიწვიეს, დაგვიფიცეს, რომ არა აღარ იქნება, არასდროს არ შემოვიტანთო. არამხოლოდ ჩვენ, ჩვენს უცხოელ პარტნიორებსაც [მოატყუეს] და დააყენეს ეს საკითხი, რომელიც რეალურად არავის, არც თვითონ სჭირდებოდათ. […]
მანიპულაცია, როცა ერთი ხელით საუბრობ რაღაც დიალოგზე, ცვლილებებზე და მეორე ხელით ის, რაც ახლაც გავიგეთ პრემიერის სიტყვებით — ძალადობა, დაშინება, ტერორი, დაპატიმრება სრულიად უდანაშაულო ადამიანების. ვერავის ვერ დაარწმუნებთ იმაში, რომ ეს ახალგაზრდები რაღაცა დიდ კონსპირაციებს აწყობდნენ, თქვენ თვითონაც არ გჯერათ. შანტაჟები და წარმოუდგენელი შეურაცხყოფა”, — განაცხადა პრეზიდენტმა.
მანვე აღნიშნა, რომ რცხვენია, როცა პარლამენტის წევრებისგან და ძველი ნაცნობებისგან კითხულობს ასეთ სიტყვებს. მისივე შეფასებით, ეს მხოლოდ იმის ნიშანია, რომ შინაგანად არიან დაშინებულები და ეს ამის საშინელი გამოხატულებაა.
“ისიც ვერ გაიგეთ, როგორც ჩანს, რომ აქ კი რუსულ კანონზე არის საუბარი. ის კანონი არის რუსული და ვერანაირი კითხვა — “აბა, რა არის რუსული ამ კანონში” — ამას ვერ შეცვლის. თქვენ იკითხეთ და წერეთ. ეს კანონი არის რუსული, მაგრამ კიდევ უფრო შემაშფოთებელია ის, რომ დღეს უკვე ეს კანონი სიმბოლო გახდა, წაიღებთ-არ წაიღებთ, შეცვლით-არ შეცვლით.
რეალურად, თქვენივე ქმედებები, თქვენივე სიტყვები, თქვენივე ძალადობა საზოგადოებაზე არის რუსული. ეს არის ის მეთოდები, რომელიც გვეგონა, რომ წარსულს ჩაბარდა და რომელსაც აცოცხლებთ”, — თქვა პრეზიდენტმა სახელისუფლებო პროპაგანდაზე და ძალადობრივ ქმედებებზე საუბრისას.
ზურაბიშვილმა ისევ გაუსვა ხაზი, რომ პრემიერმა “დაასწრო ბრიფინგის ჩატარება” და დამატა, რომ კობახიძის გამოსვლაც რუსული იყო და ამ რუსულ მდგომარეობაში ქვეყანაში არავინ აღარ დაბრუნდება. შეგახსენებთ, რომ ბრიფინგზე კობახიძემ, ტრაიდიცულად, აქციის მონაწილეების დისკრედიტაცია სცადა და კონსპირაციის თეორიებზე ისაუბრა, თითქოს ისინი ძალადობრივ ქმედებებს გეგმავენ. გარდა ამისა, საზოგადოებრივი კვლევის შედეგებით მანიპულაცირებდა და ამტკიცებდა, რომ მათი დაკვეთით ჩატარებული კვლევით, მოსახლეობის 80% მხარს უჭეს NGO-ების გამჭვირვალობას, ხოლო 60% — უშუალოდ რუსულ კანონს. თუმცა არ დაასახელა, რომელმა ორგანიზაციამ ჩაატარა კვლევა და არც სხვა დეტალები, რაც კვლევის სანდოობის გასაგებად არის საჭირო. ასევე, პრემიერმა ისაუბრა პრეზიდენტის ვეტოზე და შეწყალების ფუნქციაზეც და ნიშნისმოგებით თქვა, რომ აქციებზე ძალადობრივი ქმედებებისთვის დაკავებულებს შესაძლოა ზურაბიშვილის მხრიდან შეწყალება აღარ მოუწიოთ.
“რაც შეეხება პრეზიდენტის ვეტოს, უცებ გაახსენდათ პრეზიდენტი და მისი ვეტო. გაახსენდათ ის პრეზიდენტი, რომელსაც პრემიერი… სრულიად წარმოუდგენელია ეს ნებისმიერ ცივილიზებულ სახელმწიფოში, დაანებეთ თავი ცივილიზებულ, ზოგადად სახელმწიფოში, პრემიერმა ეძახა პრეზიდენტს მოღალატე საკუთარი ჯარის წინაშე, ამ ქვეყნის ჯარის წინაშე. ამაზე წარმოუდგენელი გადატრიალება არ ყოფილა. ამ პრეზიდენტს ეუბნებიან, რომ მოდით ვეტო წარმოგვიდგვინეთ, შიგნით რაღაცები ჩაწერეთ, თქვენ ვერ წერთ, მაგრამ დაგიწერენ სხვები, უცხოელები, ან აქაური NGO-ები, არ ვიცი ვინ და შეიძლება დავფიქრდეთო.
იფიქრეთ თქვენ და იყავით, მე ნამდვილად ვეტოს წარმოვადგენ, მაგრამ არცერთ ასეთ მანიპულაციაში არ შევალ და არ დავიწყებ ამ თამაშებს, რამეთუ ამას აქვს მხოლოდ ერთი მიზეზი და მიზანი — ხალხში რაღაცა გაუგებრობა და დაუდგენლობა შემოიტანოს. გინდათ რამე შეცვალოთ ამ კანონში, თქვენი ნებაა, ან გაიწვიეთ, ან დააბრუნეთ მეორე მოსმენაზე და მოუსმინეთ პარლამენტში ოპოზიციას, რომელი დარწმუნებული ვარ, რაღაც შენიშვნებს და ცვლილებებს შემოგთავაზებთ”, — განაცხადა პრეზიდენტმა.
მან მესამე ვერსიაც შესთავაზა ხელისუფლებას და ეს კანონის ამოქმედების ვადის გადატანაა. კერძოდ, პირველი ნოემბრისთვის, არჩევნების შემდეგ, რომ ხელისუფლებაში ვინც მოვა, იმან გადაწყვიტოს კანონი რუსულია, თუ სხვა კანონების “გადამღერება”.
“ჩემი იმედი, ყოველ შემთხვევაში ნუ გექნებათ, რომ მე შევალ ამ თამაშში, რომ გავაპატიოსნოთ ეს კანონი. არის რუსული, დარჩება რუსული და სამწუხაროდ, თქვენც ამ კანონთან ერთად”, — თქვა მან.
პრეზიდენტმა აღნიშნა, რომ პრემიერის სიტყვებში მუქარა იგრძნობოდა, ამიტომაც სამართალდამცავ უწყებებს მიმართა: “არ გაბედოთ რეპრესიები, ძალადობა, კონსპირაციების მოგონება იმისთვის, რომ დააშინოთ ის საზოგადოება, რომელმაც მთელ მსოფლიოს აჩვენა რამდენიმე კვირაა, რამდენად მშვიდობიანი, რამდენად შეგნებული, რამდენად შემართებული და რამდენად პროვოკაციაზე არწამსვლელები არიან. ასე რომ ვერავის ვერ დააჯერებთ ვერაფერს. მხოლოდ იმას დააჯერებთ და იმას აჩვენებთ მსოფლიოს, რომ თქვენ არ იქცევით დემოკრატიულად, თქვენ კანონს არ ემორჩილებით. ამიტომ გირჩევთ, თავი შეიკავეთ ამისგან, იმიტომ, რომ რაც არ უნდა მოხდეს, როგორც არ უნდა მოხდეს, პასუხისმგებლობა არის თქვენი”.
ბრიფინგის დასასრულს პრეზიდენტმა მომიტინგეებსაც მიმართა. გააფრთხილა, რომ მათ წინააღმდეგ პროვოკაციული გეგმებია შემუშავებული და სიფრთხილისკენ მოუწოდა.
“ეს არ არის შიში, მაგრამ არის სიფრთხილე, რომ არავინ არ გამოგიწვიოთ თქვენ ამ პროვოკაციებში. ვიცი, ჩანს და უკვე ვნახეთ, თუ რამდენად შეგნებული იყო ყველა მშვიდობიანი გამოსვლა. ეს არის საქართველოს საზოგადოება, ეს არის ის საზოგადოება, რომ ჩვენ ვართ რელსი თავისუფალი, დემოკრატიული, ევროპული მომავლის”.