შინაგან საქმეთა სამინისტრო ადასტურებს გავრცელებულ ინფორმაციას იმის შესახებ, რომ რუსთაველის გამზირზე “სპეციალური საშუალება” გამოიყენა. პარლამენტის მიმდებარე ტერიტორიაზე მობილიზებულია სპეცდანიშნულების რაზმი, ხოლო თავისუფლების მოედანზე მიიყვანეს წყლის ჭავლის მანქანა.
შსს ამტკიცებს, რომ აქციამ მიიღო “ძალადობრივი ხასიათი”. რამდენიმე წუთის წინ რუსული კანონის მოწინააღმდეგე მოქალაქეებმა პოლიციას მიმართეს, ქართული ოცნების მიერ დამონტაჟებულ სცენაზე აეშვათ მედროშეები, რომლების სცენაზე აღმართავდნენ საქართველოსა და ევროკავშირის დროშებს. მათ ამის საშუალება არ მიეცათ და ადგილზე შსს-ის წარმომადგენლების რაოდენობა გაიზარდა.
“თბილისში, რუსთაველის გამზირზე, პარლამენტის შენობის მიმდებარე ტერიტორიაზე მიმდინარე საპროტესტო აქციამ მიიღო ძალადობრივი ხასიათი. აქციის მონაწილეები სიტყვიერად და ფიზიკურად უპირისპირდებიან ადგილზე მყოფ სამართალდამცველებს. მიუხედავად სამართალდამცველების არაერთი მოწოდებისა, აქციის მონაწილეებმა არაერთხელ სცადეს პოლიციის კორდონის გარღვევა. პოლიციამ, წესრიგის აღდგენის მიზნით კანონით დადგენილი სპეციალური საშუალება გამოიყენა. კიდევ ერთხელ მოვუწოდებთ აქციის ორგანიზატორებს, პოლიტიკური პარტიის ლიდერებს და მონაწილეებს, დაემორჩილონ სამართალდამცველების კანონიერ მოთხოვნებს და არ გასცდნენ პროტესტის გამოხატვის კანონით დადგენილ ნორმებს”, — აცხადებს შსს.
მანამდე აქციის მონაწილეებმა გაავრცელეს განცხადება, რომლის მიხედვით, საქართველოს პარლამენტის მიერ რუსული კანონის მიღება არის ხელისუფლების გასვლა კონსტიტუციური ჩარჩოდან.
“ჩვენ ვიცით, რომ 29 აპრილს ილუზორული მხარდაჭერის სადემონსტრაციოდ ხელისუფლებას იძულებით მოჰყავს ჩვენი თანამოქალაქეები, რომელთა დიდ ნაწილსაც არ სურს “რუსული კანონის” მიღება; ჩვენ ვიცით, რომ 29 აპრილს ხელისუფლების მიერ ორგანიზებულ აქციაზე მდგარი ჩვენი მოქალაქეების უმრავლესობა მხარს უჭერს ჩვენ მოთხოვნებს – “კი ევროპას, არა რუსულ კანონს”; ჩვენი მოთხოვნების სამიზნე არის ხელისუფლება და არა ხალხი, ამიტომ, ჩვენ არ გადავდგამთ არც ერთ ნაბიჯს, რათა მტრის გეგმას შევუწყოთ ხელი და საზოგადოებრივი დაპირისპირების არარსებული სურათი დაიხატოს; ჩვენ 29 აპრილს დილის 9 საათიდან გავაპროტესტებთ “რუსული კანონის” მეორე საკომიტეტო მოსმენას, მაგრამ არ ვაპირებთ დაპირისპირებაში შესვლას ჩვენ თანამოქალაქეებთან, რომლებსაც ხელისუფლება საღამოს საათებში შეკრებს პარლამენტთან; კატეგორიულად მოვუწოდებთ ხელისუფლებას, ხვალ, 29 აპრილს არ ჩანიშნოს პლენარული სხდომა კანონის მეორე მოსმენის გასამართად; ხვალ, 29 აპრილს თუ პარლამენტი მოულოდნელად ჩანიშნავს “რუსული კანონის” მეორე მოსმენას პლენარულ სხდომაზე, ეს იქნება კონსტიტუციის საწინააღმდეგო თვითნებობა ხელისუფლების მხრიდან, რასაც წინ აღვუდგებით. საზოგადოებრივი ჯგუფები მოვუწოდებთ მოქალაქეებს, ხელი შევუშალოთ ანტიკონსტიტუციური კანონის მიღებას”, — აღნიშნულია განცხადებაში.
განცხადებაში ასევე ეწერა, რომ აქციის მონაწილეები შემოარტყამენ წრეს საქართველოს პარლამენტს და შეკრავენ ჯაჭვს, როგორც სიმბოლოს საქართველოს მოქალაქეთა ერთობის;
განახლება: თბილისის მერიამ გაავრცელა განცხადება, რომელშიც უწყება 28 აპრილის შეკრებას “არასანქცირებულს” უწოდებს, მიუხედავად იმისა, რომ საქართველოს კანონმდებლობით, აქციის ჩატარებას სანქცია ან ნებართვა არ სჭირდება. მერიის ინფორმაციით, მათ 22 აპრილს მიმართა ქართულმა ოცნებამ 29 აპრილს დაგეგმილ აქციასთან დაკავშირებით და რომ “თბილისის მერიამ დილითვე გაავრცელა განცხადება, სადაც აღნიშნული იყო, რომ 29 აპრილს დაგეგმილ ღონისძიებასთან დაკავშირებით შეიზღუდება ტრანსპორტის გადაადგილებაც”. მედია აცხადებს, რომ “შესაბამისად, აქციის იმ მონაწილეების, შეკრება, რომლებიც ახლა პარლამენტის მიმდებარე ტერიტორიაზე იმყოფებიან, არის არასანქცირებული. მოვუწოდებთ მათ, თავი შეიკავონ პროვოკაციებისგან და მისცენ 29 აპრილს დაგეგმილი ღონისძიების ორგანიზატორებს სამუშაოების ჩატარების შესაძლებლობა”.