თბილისის საქალაქო სასამართლომ სტალინის გამოსახულებიანი მატრონას ხატისთვის საღებავის შესხმის საქმეზე აქტივისტ ნატა ფერაძეს 5-დღიანი ადმინისტრაციული პატიმრობა შეუფარდა. ამის შესახებ ინფორმაციას აქტივისტი თავის პირად Facebook გვერდზე ავრცელებს. ინფორმაცია მედია აპრილს საქართველოს ახალგაზრდა იურისტთა ასოციაციამაც (საია), რომელიც ფერაძის ინტერესებს იცავს, დაუდასტურა.
შსს-ს ადმინისტრაციულ სამართალდარღვევათა კოდექსის 166-ე, წვრილმანი ხულიგნობის მუხლით ჰქონდა დაწყებული წარმოება. ეს მუხლი ითვალისწინებს ჯარიმას 500 ლარიდან 1000 ლარამდე ან ადმინისტრაციულ პატიმრობას 15 დღემდე. დღეს გავრცელებული ინფორმაციის თანახმად კი, მოსამართლე ნინო შჩერბაკოვმა ფერაძე სამართალდამრღვევად ცნო და 5-დღიანი ადმინისტრაციული პატიმრობა გამოიყენა.
როგორც ნატა ფერაძემ პირად Facebook გვერდზე გაშვებული ლაივის მსვლელობისას განაცხადა, ის სასამართლოს გადაწყვეტილების გასაჩივრებას გეგმავს, ხოლო გადაწყვეტილება სამართალდარღვევად შეფასებული ფაქტის პროპორციული არ არის.
2024 წლის იანვარში გავრცელდა ინფორმაცია, რომ თბილისში, სამების საკათედრო ტაძარში გამოფინეს ხატი ფოტოკოლაჟით, რომელიც რუსეთში წმინდანად შერაცხილ მატრონას ეძღვნება. მატრონა მოსკოველის პიროვნება ოკუპანტ ქვეყანაშიც კი საკამათოა, თუმცა მის სადიდებელ ხატს კიდევ უფრო საკამათოს იქვე მიხატული საბჭოთა დიქტატორი, იოსებ სტალინი ხდის.
9 იანვარს ხატზე საღებავის შესხმის შესახებაც გახდა ცნობილი. ინფორმაცია თავად აქტივისტმა ნატა ფერაძემ სოციალური ქსელის მეშვეობით გაავრცელა, რასაც ფერაძის მიმართ აგრესიული კამპანია და მუქარები მოჰყვა.
► წაიკითხეთ მეტი: მოძალადეები ნატა ფერაძის წინააღმდეგ, მატრონას და სტალინის დასაცავად