“ვულოცავ ქართველ ხალხს ქვეყნისთვის და ევროკავშირისთვის ისტორიულ დღეს. ჩვენ გავიგონეთ თქვენი ხმა და თქვენი ევროპული მისწრაფებები და დღეს საქართველო ამაყობს, რომ მიენიჭა ევროკავშირის კანდიდატის სტატუსი. ეს ნიშნავს იმედს”, — წერს ევროპარლამენტის პრეზიდენტი რობერტა მეცოლა და კანდიდატის სტატუსის მიღებას გვილოცავს.
ის აღნიშნავს, რომ ეს მომენტი საამაყოა ევროპისთვის, უკრაინისა და მოლდოვისთვის. ასევე, ყველასთვის, ვინც იბრძვის საერთო ღირებულებებისთვის.
“ჩვენ ისტორია შევქმენით. ახლა ჩვენ ერთად დავწერთ მომავალს”, — დაწერა მეცოლამ.
ევროკავშირის 27 წევრი ქვეყნის გადაწყვეტილებით, საქართველოს ევროკავშირის წევრობის კანდიდატის სტატუსი მიენიჭა, უკრაინასა და მოლდოვასთან კი გაწევრიანების მოლაპარაკებები დაიწყება. ეს გადაწყვეტილება ქვეყნებს უკვე მიულოცეს საერთაშორისო პარტნიორებმა.
“ეს არის სტრატეგიული გადაწყვეტილება და დღე, რომელიც ჩვენი კავშირის ისტორიაში დარჩება. ვამაყობთ, რომ შევასრულეთ ჩვენი დანაპირები და მოხარულები ვართ ჩვენი მეგობრებისა და პარტნიორების გამო”, — განაცხადა ევროკომისიამ და პრეზიდენტმა ურსულა ფონ დერ ლაიენმა.
“საქართველოს კანდიდატის სტატუსი მიენიჭა. ამ ისტორიულ დღეს, ევროკავშირსა და წევრ ქვეყნებს ერთი გზავნილი აქვთ საქართველოს მოსახლეობისთვის: გილოცავ საქართველო”, — თქვა ევროკავშირის ელჩმა პაველ ჰერჩინსკმა მისალოც ვიდეოში, რომელშიც ყველა ევროკავშირის წევრი სხვა ქვეყნების ელჩებიც მონაწილეობენ.
მილოცვა, უფრო ზუსტად ერთი სიტყვა “გილოცავთ” დაპოსტა პრემიერმინისტრმაც. ამის გარდა მის ფეისბუქგვერდზე მხოლოდ ის წერია, რომ სტატუსი მოგვანიჭეს. თუმცა X-ზე (ყოფილ ტვიტერზე) ღარიბაშვილმა მადლობა გადაუხადა ევროკავშირის ლიდერებს ქართველების ისტორიული არჩევანის აღიარებისთვის და აღნიშნა, რომ მოუთმენლად ელიან წინსვლას ინტეგრაციის გზაზე. მოგვიანებით მან ბრიფინგი გამართა, სადაც მოქალაქეებს და ქართულ ოცნებას მიულოცა. მადლობების სიაში, ტრადიციულად, ღარიბაშვილს არც ბიძინა ივანიშვილი გამორჩენია.