“გილოცავთ, თქვენ პირველ რიგში. არ მინდოდა ამ მოლოცვისას მარტო ვყოფილიყავი და ადმინისტრაციის ნაწილი, ვინც აქ იყო ამ საღამოს, ჩემთან არიან”, — ასე მიულოცა ხალხს ევროკავშირის კანდიდატის სტატუსის მიღება საქართველოს პრეზიდენტმა, რომელიც ბრიფინგზე თანამშრომლებთან ერთად წარსდგა.
“მინდა მივულოცო სრულიად საქართველოს, ვიცი რომ დღეს ყველას უხარია, ვისაც სჯეროდა, არ სჯეროდა, ნაკლებად სჯეროდა. დღეს ყველა არის გახარებული, იმიტომ, რომ ყველამ იცის, რომ ეს არის ჩვენი მომავალი და ამ მომავლისკენ ჩვენ გადავდგით დღეს ძალიან დიდი და სერიოზული ნაბიჯი”, — განაცხადა ზურაბიშვილმა და ქართველი ხალხის ბრძოლის მნიშვნელობას გაუსვა ხაზი.
პრეზიდენტმა მადლობა გადაუხადა ევროპული საბჭოს ლიდერს, შარლ მიშელს და ხაზი გაუსვა მის წვლილს ამ გადაწყვეტილების მიღებაში. აღნიშნა, რომ მისგან პირადად მიიღო მილოცვა და ქართველი ხალხის მადლობა გადასცა.
“მადლობა ქართველ ხალხს, იმიტომ, რომ ქართველი ხალხის გარეშე არ იქნებოდა ეს დიდი მიღწევა და ეს არის ყველას, ჩვენი საერთო მიღწევა. ეს არ არის სიტყვები იმაზე, რომ ერთად ვიყოთ და ერთსულოვნად. ეს მართლაც ასე არის. რომ არა ერთობა, ვერაფერს მივაღწევდით, ვერც დამოუკიდებლობას, ვერც დღეს ამ ნაბიჯს და ვერ ხვალ ევროკავშირში გაწევრიანებას.
ჩვენ ამას ვიგებთ ასეთ ისტორიულ დღეებში და მერე გვავიწყდება ეგრევე. ჩვენ ეს უნდა შევიგნოთ ბოლომდე და გავატაროთ ყოველდღიურად, რომ ერთიანობა, ერთობა არის ჩვენი უდიდესი ძალა. სხვა დიდი ძალა არ გაგვაჩნია, მაგრამ ეს არის უდიდესი ძალა, რომელიც ყველაფერს მიგვაღწევინებს”, — თქვა პრეზიდენტმა.
ზურაბიშვილმა მადლობა გადაუხადა უკრაინის პრეზიდენტს, ვოლოდიმირ ზელენსკის და აღნიშნა, რომ ეს მისი ხალხის ძალიან დიდი დამსახურებაა. ასევე, მოლდოვის პრეზიდენტს, მაია სანდუს და მისი ბრძოლისუნარიანობის მნიშვნელობას გაუსვა ხაზი.
“დღეს რაც ხდებოდა ბრუსელში, ეს არ მოხდებოდა, რომ არა უკრაინელი ხალხის ბრძოლა, თავდადება და ეს 2-წლიანი უსასტიკესი ომი. ამისთვის დიდი მადლიერება უნდა გამოვხატოთ. ეს გვევალება როგორც ქართველებს, თუ ვიცით, რას ნიშნავს ქართველობა.
მინდა მოვულოცო მაია სანდუს. უძლიერესი ქალია დღევანდელ დღეს, რომელმაც გაუძლო უდიდეს შეტევებს, უდიდეს სირთულეებს ამ პერიოდში, მაგრამ შეძლო და მისი ქვეყანა მიიყვანა იქ, სადაც არავის სჯეროდა, რომ მიიყვანდა”, — აღნიშნა ზურაბიშვილმა.
დასასრულს პრეზიდენტმა განაცხადა, რომ შეუერთდება პრემიერმინისტრის ინიციატივას და 15 დეკემბერს, 5 საათზე თავისუფლების მოედანზე საზეიმო ღონისძიებაზე მივა.
“მე ვუერთდები ამ ზეიმს, თქვენც უნდა შემოუერთდეთ. ყველანი ერთად უნდა ვიდგეთ ხვალ, რადგან ეს იქნება საქართველოს ზეიმი. მე მზად ვარ, რომ ყველაფერში მივიღო მონაწილეობა, თუ ტრიბუნაზე მომიწვევენ კარგი, თუ არა ხალხში ვიქნები და ერთად ვიზეიმებთ ხვალინდელ დღეს, რომელიც არ არის უკანასკნელი დღე. ამით იწყება საქართველოს დიდებული, ევროპული მომავალი”, — ასე დაასრულა სიტყვა ზურაბიშვილმა.
ამავე თემაზე:
- ელჩები: ამ ისტორიულ დღეს ერთი გზავნილი გვაქვს საქართველოს მოსახლეობისთვის — გილოცავ
- ეს არის სტრატეგიული გადაწყვეტილება და დღე, რომელიც ისტორიაში დარჩება — ევროკომისია
- მეცოლა: ვულოცავ ქართველ ხალხს ქვეყნისთვის და ევროკავშირისთვის ისტორიულ დღეს
- ღარიბაშვილმა სტატუსის მიღება მიულოცა ხალხს, პარტიას და ტრადიციულად ივანიშვილსაც