მართალია, უმეტესობამ კარგად ვიცით ცნობილი „პრაიდის დროშა“, იგივე „ცისარტყელას დროშა“, რომელიც უკვე წლებია LGBTQ+ თემის სიმბოლოა და სიმბოლიზირებს სექსუალობის, მიზიდულობისა და გენდერული იდენტობების მრავალფეროვნებას ქვიარ თემში. თუმცა, ამ დროშის გარდა, ცალკეული იდენტობების აღსანიშნად კიდევ ბევრი ქვიარ დროშა არსებობს და მათ შორისაა ლესბოსელების დროშაც.
► ტერმინი „ლესბოსელი“ აღნიშნავს ქალს, რომელსაც სექსუალურად იზიდავენ ქალები. თუმცა, ამ ტერმინს ბევრი არაბინარული ადამიანიც იყენებს საკუთარი თავის აღსანიშნავად.
თუკი იკითხავთ, „რა არის ლესბოსელების დროშის ფერები?“ — ერთ კონკრეტულ პასუხს ვერ მიიღებთ, რადგან არსებობს ლესბოსელების 5 პოპულარული დროშა, რომლებსაც შეიძლება წააწყდეთ ინტერნეტსა თუ ქვიარ სივრცეებში. მათ უმეტესობაში ვარდისფრის, წითლისა და ნარინჯისფრის ტონალობებია, თუმცა პირველი დროშა, სინამდვილეში, მუქი იისფერი იყო.
ლესბოსელების პირველი დროშა, „ლაბრისის ლესბოსელების დროშა“, 1999 წელს შეიქმნა. დროშაზე მუქ იისფერ ფონზე გამოსახულია ამოტრიალებული შავი სამკუთხედი, რომლის ცენტრშიც მოთავსებულია თეთრი ლაბრისი — ძველბერძნული ორპირა ნაჯახი.
ლაბრისს ჯერ კიდევ 1970-იანებში ფემინისტი ლესბოსელები იყენებდნენ, როგორ გაძლიერების სიმბოლოს. რაც შეეხება სამკუთხედს, ამოტრიალებული ვარდისფერი სამკუთხედი დიდი ხნის განმავლობაში გეი ემბლემა იყო — აღებული გეი კაცების აღმნიშვნელი სიმბოლოდან, რომელსაც ჰოლოკოსტის დროს საკონცენტრაციო ბანაკებში იყენებდნენ. ამ პერიოდში ლესბოსელი ქალები იყვნენ იმ ჯგუფში, რომელსაც ამოტრიალებული შავი სამკუთხედით აღნიშნავდნენ. ამ ჯგუფში შედიოდნენ „ასოციალური“ თუ „არამომუშავე“ პატიმრები — რომას ხალხი, ალკოჰოლიკები, ლესბოსელები, უსახლკაროები და სხვები. რაც შეეხება იისფერ ფონს, იისფერი დიდი ხნის განმავლობაში ლესბოსელებთან დაკავშირებული ფერი იყო.
პირველი „თანამედროვე“ ლესბოსელების დროშა 2010 წელს შეიქმნა — ე.წ. „ტუჩსაცხიანი ლესბოსელების დროშა“. დროშა შედგებოდა შვიდი ზოლისგან — მათ შორის იყო ვარდისფრისა და წითლის 3-3 ტონალობა, შუაში კი თეთრი ზოლი — დროშის ზედა მარცხენა კუთხეში კი წითელი ტუჩსაცხით კოცნის ანაბეჭდი იყო გამოსახული.
თუმცა, ეს დროში უფრო მეტად „ფემ“ (ინგლ. Femme) ლესბოსელების აღმნიშვნელი იყო — ანუ იმ ლესბოსელების, რომლებსაც უფრო მეტად ფემინური თვითგამოხატვა ჰქონდათ. ტერმინი „ტუჩსაცხიანი ლესბოსელიც“ (ინგლ. Lipstick lesbian) სწორედ ამას აღნიშნავდა. თუმცა, ეს ტერმინი ყოველთვის კონტროვერსიული იყო, ვინაიდან ის უკავშირდებოდა 1980-იანი წლების პორნოგრაფიაში კაცების თვალით დანახულ და კაცების სიამოვნებაზე მორგებულ კონცეფციას, რომელშიც ტუჩსაცხიან ქალებს ერთმანეთთან ჰქონდათ სექსი. 90-იან წლებში ლესბოსელებმა ეს ტერმინი დაიბრუნეს, თუმცა დროშა მაინც კონტროვერსიული დარჩა, რადგან მისი შემქმნელი, ნატალი მაკკრეი, რასისტული, ბიფობიური და ტრანსფობიური რიტორიკით გამოირჩეოდა.
იმისთვის, რომ ლესბოსელების დროშა უფრო მეტად ინკლუზიური გამხდარიყო — ვინაიდან „ტუჩსაცხიანი ლესბოსელების დროშა“ გამორიცხავდა მასკულინური თვითგამოხატვის ლესბოსელებსა თუ ნებისმიერ ლესბოსელს, რომელიც ფემინურად არ იცვამდა ან არ იდენტიფიცირდებოდა — დროშას ტუჩსაცხის ანაბეჭდი მოშორდა და ასე შეიქმნა ე.წ. „ვარდისფერი ლესბოსელების დროშა“. ეს დროშა დიდი ხნის განმავლობაში იყო პოპულარული და ჯერ კიდევ ხშირად გამოიყენება, თუმცა პრობლემური წარსულის და იმის გამო, რომ ის კვლავ არასაკმარისად ასახავდა უფრო მეტად მასკულინურ ლესბოსელებს, „ვარდისფერი ლესბოსელების დროშა“ ნელ-ნელა წარსულს ჩაბარდა.
ამგვარად, მოვდივართ ლესბოსელების დროშის უახლეს ვარიანტამდე — „ნარინჯისფერ-ვარდისფერი ლესბოსელების“ დროშა, იგივე „მზის ჩასვლის ლესბოსელების დროშა“ (ინგლ. Sunset Lesbian Flag). ეს დროშა 2018 წელს ემილი გვენმა შექმნა, არაბინარულმა ლესბოსელმა Tumblr ბლოგერმა. ამ დროშაში აღებულია „ტუჩსაცხიანი ლესბოსელების დროშის“ შვიდი ზოლი, თუმცა ფერები შეცვლილია და დამატებულია უფრო მეტი ნარინჯისფერი, თითოეულ ზოლს კი თავისი მნიშვნელობა აქვს.
ახალი დროშის ფერებს შემდეგი მნიშვნელობები აქვთ (ზემოდან ქვემოთ):
- გენდერული არაკონფორმულობა.
- დამოუკიდებლობა.
- თემი.
- ურთიერთობები, რომლებიც უნიკალურად ქალებისთვისაა დამახასიათებელი.
- სიმშვიდე და სიწყნარე.
- სიყვარული და სექსი.
- ფემინურობა.
დროშა დებიუტიდან მალევე გავრცელდა და გახდა პოპულარული მისი პროგრესულობის, ინკლუზიურობისა და მრავალფეროვნების გამო. დღესდღეობით ის ყველაზე ხშირად გამოიყენება ლესბოსელების აღსანიშნავად, მის უფრო გამარტივებულ, 5-ფერიან ვერსიასთან ერთად.
წყარო: Queer in the World, Parade