საქართველოს პრემიერმინისტრი, ირაკლი კობახიძე პლატფორმა X-ზე ამერიკის შეერთებული შტატების სახელმწიფო მდივნის, ენტონი ბლინკენის მდივანს, დერეკ შოლეს პასუხობს და აშშ-ის ყოფილ ელჩს ადანაშაულებს “რევოლუციის ორი მცდელობის” მხარდაჭერაში, სახდეპის წარმომადგენლების კრიტიკას კი “ცრუ განცხადებებს” უწოდებს. ასე ეხმაურება ის ბლინკენის მრჩევლის განცხადებას “ხელისუფლების მტრული რიტორიკისა და არადემოკრატიული კანონმდებლობის მხარდაჭერის გამო”.
პრემიერმინისტრი კობახიძე ავრცელებს ანტიდასავლურ პროპაგანდას, თითქოს აშშ-ის ყოფილი ელჩის განცხადებები “ემსახურებოდა უცხოეთიდან დაფინანსებული აქტორებისგან მხარდაჭერილ ძალადობასა და რევოლუციური პროცესების განვითარებას”.
გარდა ამისა, კობახიძის თქმით, ბლინკენის მრჩეველს “განუმარტა”, რომ “ამ ფონზე ურთიერთობების განახლებას განსაკუთრებული ძალისხმევა სჭირდება, რაც სამართლიანი და პატიოსანი მიდგომის გარეშე შეუძლებელია”.
“ველაპარაკე მრჩეველს და გამოვთქვი ჩემი გულწრფელი იმედგაცრუება 2020-2023 წლებში, აშშ-ის ყოფილი ელჩის მიერ მხარდაჭერილი რევოლუციის ორი მცდელობის შესახებ, რომელსაც გარე წყაროებიდან დაფინანსებული არასამთავრობო ორგანიზაციები ასრულებდნენ. ეს მცდელობები წარმატებული რომ ყოფილიყო, საქართველოში მეორე ფრონტის ხაზი გაიხსნებოდა.
გარდა ამისა, ავუხსენი ბატონ შოლეს, რომ აშშ-ის სახელმწიფო დეპარტამენტის ჩინოვნიკების მიერ გაკეთებული ცრუ განცხადებები, გამჭვირვალობის კანონპროექტსა და ქუჩის აქციებთან დაკავშირებით, აშშ-ის ყოფილი ელჩის 2020-2023 წლებში გაკეთებულ მსგავს ცრუ განცხადებებს მოგვაგონებს, რაც ემსახურებოდა უცხოეთიდან დაფინანსებული აქტორებისგან მხარდაჭერილ ძალადობასა და რევოლუციური პროცესების განვითარებას.
ასევე, ბატონ შოლეს განვუმარტე, რომ ამ ფონზე ურთიერთობების განახლებას განსაკუთრებული ძალისხმევა სჭირდება, რაც სამართლიანი და პატიოსანი მიდგომის გარეშე შეუძლებელია.
ბატონ შოლესთან მე არ გამომითქვამს შეშფოთება ნიუ-იორკში სტუდენტების საპროტესტო აქციის სასტიკი ჩახშობის შესახებ”, — წერს კობახიძე X-ზე.
ენტონი ბლინკენის მრჩეველმა 2 მაისს პლატფორმა X-ზე დაწერა, რომ ესაუბრა პრემიერმინისტრ კობახიძეს და შეშფოთებულია საქართველოს ამჟამინდელ ტრაექტორიასთან დაკავშირებით.
“პრემიერმინისტრ ირაკლი კობახიძეს დღეს კიდევ ერთხელ განვუმარტე ჩვენი შეშფოთება საქართველოს ამჟამინდელი ტრაექტორიის შესახებ — მთავრობის მტრული რიტორიკა და ანტიდემოკრატიული კანონმდებლობის მხარდაჭერა საქართველოს ევროატლანტიკურ მომავალს რისკის ქვეშ აყენებს. ამერიკის შეერთებული შტატები მოუწოდებს საქართველოს მთავრობას, დააბრუნოს საქართველო ევროატლანტიკური მომავლის გზაზე, რომელიც ქართველების აბსოლუტურ უმრავლესობას სურს“, — დაწერა აშშ-ის სახელმწიფო მდივნის მრჩეველმა X-ზე.