ჩვენ მკითხველს უკვე ვუამბეთ სერიალებზე, სადაც სხვა სიუჟეტურ ხაზთან ერთად ლგბტქია+ ადამიანების ყოველდღიურ ცხოვრებაზე, სიყვარულზე, წარმატებისა და წარუმატებლობის ისტორიებზე გვიყვებიან. ამ შოუებში გავიცანით თინეიჯერები, რომლებიც თვითგამორკვევის პროცესში არიან და ზრდასრულებიც, რომლებსაც ჰომოფობიური და სტერეოტიპული გარემოს გამო საკუთარი თავის დამალვა უწევდათ. ვნახეთ, რამხელა ძალა აქვს მხარდაჭერას და დისკრიმინაციისგან თავისუფალ გარემოს.
იქნება ეს დრამა, კომედია, სამეცნიერო ფანტასტიკა თუ შაბლონური მელოდრამა, პოპულარულ შოუებში ქვიარ პერსონაჟების გამოჩენა ხილვადობის გაზრდაში მნიშვნელოვან როლს ასრულებს. გარდა ამისა, ჰომოფობიურად განწყობილ საზოგადოებას ეხმარება დაინახოს, რომ ადამიანის გენდერსა და სექსუალობაზე არანაირი “ლგბტ პროპაგანდა” არ მოქმედებს.
თუ მცირეოდენი სპოილერებისთვის მზად ხართ, ამ სტატიაში კიდევ რამდენიმე სერიალზე მოგიყვებით.
Never Have I Ever
სერიალი გარდატეხის ასაკში მყოფი გოგოსა და მისი დაქალების ცხოვრებაზე გვიამბობს, რომლებიც სოციალურ დაყოფას განიცდიან და პოპულარულობა სურთ. შოუში გაიცნობთ გეი, ლესბოსელ და ბისექსუალ პერსონაჟებს, რომლებიც ერთმანეთს თვითგამორკვევაში ეხმარებიან.
აქ ნაჩვენებია, რა ზიანი შეიძლება მიადგეთ თინეიჯერებს სექსუალურ ცხოვრებაზე არასწორი წარმოდგენების გამო და რამდენად მნიშვნელოვანია, რომ გადაწყვეტილებების მიღებისას ინფორმირებულები იყვნენ.
Ginny & Georgia
ჯინი და ჯორჯია დედა-შვილის ურთიერთობაზე გადაღებული სერიალია, რომელიც ოჯახში ძალადობის მსხვერპლ ქალზე და მისი გადარჩენის ისტორიაზე გვიამბობს. ფილმში ვიცნობთ თინეიჯერებს, რომლებსაც ოჯახის წევრების გავლენისგან გათავისუფლება სურთ და მშობლებს, რომლებიც ცდილობენ, ისინი მათ ახალგაზრდობაში დაშვებულ შეცდომებს აარიდონ.
ერთ-ერთი პერსონაჟი, ჯინის საუკეთესო მეგობარი, მაქსი ლესბოსელი გოგოა. ის ერთი შეხედვით მუდმივად მხიარული და თავისუფალია, თუმცა დროთა განმავლობაში ვხედავთ, როგორ განიცდის პირად ცხოვრებაში დაბრკოლებებს. მაქსის პერსონაჟი თინეიჯერი ქვიარების გრძნობების აღქმაში გვეხმარება.
Brooklyn Nine-Nine
კომედიური სერიალი ბრუკლინის 99-ე განყოფილების გამომძიებლებზე გვიყვება, რომლებიც მძიმე საქმეებზე მუშაობის პარალელურად, ოფისში ერთობიან. მათი წარმოდგენით ყველაფერი იცვლება, როცა ახალ, წესების მოყვარულ და მკაცრ კაპიტანს დაუნიშნავენ. თუმცა, მალევე ვხედავთ, რომ კაპიტანი ჰოლტი რთულად, მაგრამ მაინც ეგუება თანამშრომლების ხასიათს.
თავად ჰოლტი გეი კაცია და სერიალში ქმართან მის თანაცხოვრებასაც ვხედავთ. ამავე განყოფილებაში მუშაობს ბისექსუალი გამომძიებელი როზა, რომლის შოუში ქამინგაუთი მსახიობის ქამინგაუთის შემდეგ გადაწყდა.
Elite
ამ სერიალს უფრო მეტი უარყოფითი გამოხმაურება აქვს, ვიდრე დადებითი. ისტორია საჯარო სკოლიდან პრესტიჟულ სასწავლებელში თინეიჯერების გადასვლით იწყება, რომლებიც სოციალურ უთანასწორობას აწყდებიან.
ძირითადი ნაწილი კრიმინალურ პრობლემებსა და ახალგაზრდების სექსუალურ ცხოვრებაზეა. შეიძლება ითქვას, რომ სიუჟეტში უფრო მეტი დრო სექსუალურ გამოცდილებებს და მათ განხილვას ეთმობა, ვიდრე მოვლენების განვითარებას.
აქაც არაერთი ლესბოსელი, გეი და ბისექსუალი პერსონაჟი გვხვდება. სერიალის პლუსად შეიძლება ხილვადობის გაზრდა და სექსუალობაზე ინფორმირებულობა ჩავთვალოთ.
Orphan Black
ეს კრიმინალური დრამის ელემენტების მქონე სამეცნიერო ფანტასტიკაა, რომელიც რამდენიმე კლონის ცხოვრებასა და გადარჩენისთვის ბრძოლაზე გვიყვება. წლების შემდეგ ისინი ერთმანეთის შესახებ გაიგებენ და საბოლოოდ, ერთ ძლიერ ოჯახად იქცევიან.
მიუხედავად იმისა, რომ დები იდენტურები არიან, შოუში ვხედავთ, რომ თითოეულ მათგანი ინდივიდუალური და განსაკუთრებულია. მათ შორის, არიან ბისექსუალი კოსიმა და ტრანსგენდერი ტონი. ეს პერსონაჟები გვაჩვენებენ, რომ გენდერი და სექსუალობა ადამიანის ცხოვრების განუყოფელი ნაწილია.
ამავე თემებზე შეგიძლიათ წაიკითხოთ: