დეკემბერში საქართველო კიდევ ერთი მნიშვნელოვან გადაწყვეტილებას ელის — ამჯერად ევროპულ საბჭოზე, ევროკავშირის წევრი ქვეყნების ლიდერებმა უნდა გადაწყვიტონ, მივიღებთ თუ არა კანდიდატის სტატუსს. ევროპული მომავლის მხარდასაჭერად ქვეყანაში არაერთი აქტივობა იმართება, რაშიც მნიშვნელოვან როლს თამაშობენ აქტივისტები, არასამთავრობო ორგანიზაციები, ბიზნესის წარმომაგენლები და სხვადასხვა სფეროში დასაქმებული მოქალაქეები.
ამჯერად 165-მა პროფესორ-მასწავლებელმა ევროპულ საბჭოს ღია წერილით მიმართა და მოუწოდა, საქართველოს კანდიდატის სტატუსი მიანიჭოს.
ევროპული მომავლის მხარდამჭერი აქტივობები გრძელდება. 9 დეკემბერს დაგეგმილია მარში, რომელიც რესპუბლიკის მოედნიდან- ევროპის მოედნამდე გაიმართება და ევროკავშირის დროშა გაიშლება.
2021 წელს, საქართველო, უკრაინა და მოლდოვა ასოცირებული ტრიოს წევრები გახდნენ. მემორანდუმი ევროპასთან ინტეგრაციის გზაზე ძალების გაერთიანებას ისახავდა მიზნად. 2022 წელს უკრაინამ და მოლდოვამ ევროკავშირის წევრობის კანდიდატის სტატუსი მიიღეს, საქართველომ კი – გაწევრიანების პერსპექტივა, თან 12 რეკომენდაციის შესრულება დაევალა. 2023 წლის ივნისში ევროკომისიამ დასკვნა გამოაქვეყნა, რომლის მიხედვით, საქართველოს 12 რეკომენდაციიდან მხოლოდ 3 ჰქონდა სრულად შესრულებული.
გავლენიანი ორგანიზაციების კვლევებით, საქართველოს მოსახლეობის უმრავლესობა ევროკავშირში გაწევრიანებას უჭერს მხარს. ამის ფონზე წევრობის განაცხადის შეტანის შემდეგ ხელისუფლების მხრიდან გადადგმულ ნაბიჯებს პროტესტი მოჰყვა, რადგან მათი ნაწილი ეწინააღმდეგებოდა რეკომენდაციებს და ევროკავშირის ღირებულებებს. მაგალითად: აქტივისტების ცარიელი ფურცლებისთვის დაკავება; რუსული კანონის ინიციირება, რასაც მრავალათასიანი პროტესტი და პოლიციის მიერ ძალადობრივი დარბევა მოჰყვა; რუსეთის მოქალაქეების და რუსული ფულის შემოდინების ზრდა; სანქცირებული პირების წინააღმდეგ უმოქმედობა; პოლიტიკური თანამდებობის პირების მხრიდან ადამიანის უფლებებისა და უფლებადამცველების წინააღმდეგ გაჟღერებული ფრაზები თუ ძალადობრივი, პრორუსული ჯგუფების წინააღმდეგ უმოქმედობა და მათი დაუსჯელობა.
ამ მოვლენების შემდეგ, 2023 წლის ნოემბერში ევროკომისიისიამ კანდიდატის სტატუსის მინიჭების რეკომენდაცია გასცა. თუმცა, იმ დათქმით, რომ გარკვეული რეფორმები გატარდება. ევროკომისია წერდა, რომ სრულ მხარდაჭერას უცხადებს საქართველოს მოქალაქეების აბსოლუტური უმრავლესობის გულწრფელ მისწრაფებას, რომ ევროკავშირში გაწევრიანდეს.
ამავე თემაზე: