სპეციალურმა საგამოძიებო სამსახურმა 20 წლის კაცი დააკავა, რომელმაც მეგობრის ყოფილი შეყვარებულის ინტიმური შინაარსის ფოტოები და ვიდეოჩანაწერები უკანონოდ მოიპოვა და დაზარალებულს მათი გავრცელებით ემუქრებოდა, თუ მისგან უსიტყვო მორჩილებასა და კონკრეტული ქმედებების შესრულებას ვერ მიიღებდა.
“ბრალდებული სოციალურ ქსელ Facebook-ის ყალბი გვერდის გამოყენებით დაუკავშირდა დაზარალებულს და ინტიმური შინაარსის ფოტოსურათებისა და ვიდეო ჩანაწერების გავრცელების მუქარით, უსიტყვო მორჩილება და კონკრეტული ქმედებების შესრულება, მათ შორის, ინტიმური შინაარსის ფოტოსურათების გადაგზავნა და დაზარალებულის სოციალურ ქსელ Facebook-ის პაროლის გადაცემა მოსთხოვა. გარდა ამისა, იგი პირადად უკავშირდებოდა დაზარალებულს და სთხოვდა ჰქონოდათ სასიყვარულო ურთიერთობა, ხოლო უარის მიღების შემდეგ, დაზარალებული ქალის დაკნინების მიზნით, სოციალურ ქსელ Facebook-ის ყალბ გვერდზე ინტიმური შინაარსის ვიდეოჩანაწერები საჯაროდ განათავსა”, — აღნიშნულია განცხადებაში.
დაზარალებულმა სპეციალურ საგამოძიებო სამსახურს მიმართა. ბრალდებულის მობილური ტელეფონის ჩხრეკისას მიაგნეს და ამოიღეს ინტიმური შინაარსის მასალა, რის შემდეგაც ის დააკავეს. დანაშაული 7 წლამდე თავისუფლების აღკვეთას ითვალისწინებს.