“ინკლუზიური განათლება ქვეყნის პრიორიტეტი აღარაა!” — შშმ თემი, მშობლები და სფეროს სპეციალისტები

შეზღუდული შესაძლებლობის მქონე მოქალაქეთა თემმა, მშობლებმა და სფეროს სპეციალისტებმა განცხადება გაავრცელეს, რომელშიც ნათქვამია, რომ ინკლუზიური განათლება ქვეყნის პრიორიტეტი აღარაა. ასე გამოეხმაურნენ განათლებისა და მეცნიერების სამინისტროს გადაწყვეტილებას, გაეუქმებინა ინკლუზიური განათლების განვითარების სამმართველო, როგორც ცალკე სტრუქტურული ერთეული. შემდგომში სამინისტრომ გაავრცელა განცხადება, რომ აღნიშნული სამმართველო სტრატეგიული დაგეგმვის სამმართველოსთან გააერთიანეს.

თემი და მშობლები კი განცხადებაში წერენ, რომ “გადაწყვეტილება მიღებულია თემის ჩართულობის, შშმ პირთა საკითხებზე მომუშავე ორგანიზაციებთან კონსულტაციისა, და საზოგადოების ინფორმირების გარეშე და არ ასახავს საერთაშორისო ვალდებულებებს, რომელსაც სახელმწიფო გაეროს კონვენციითა და საქართველოს კანონმდებლობით აღიარებს”.

მათი განცხადებით, განათლების სამინისტრო რეორგანიზაციაზე საუბრობს, როცა ინკლუზიური განათლების კუთხით მთელი რიგი საკითხები ჯერ კიდევ გადაუჭრელია, მათ შორის, უმაღლესი განათლების მიმართულებით მუშაობა ჯერაც არაა დაწყებული.

“უმაღლესი განათლება შშმ პირებისთვის კვლავ რჩება ფაქტობრივად მიუწვდომელ სივრცედ — ინფრასტრუქტურა, პროგრამები, მხარდაჭერის სერვისები და პოლიტიკა ან არ არსებობს, ან მხოლოდ ფორმალურად ფიქსირდება. იმის ნაცვლად, რომ განათლების სამინისტროს შეექმნა სისტემა, რომელიც უზრუნველყოფდა სპეციალური საგანმანათლებლო საჭიროების მქონე მოსწავლის და სტუდენტის ხარისხიან წვდომას უმაღლეს განათლებაზე, აუქმებს იმ სამმართველოს, რომელსაც უნდა ემუშავა ამ საკითხებზე. ინკლუზიური განათლება ის ფუნდამენტური უფლებაა, რომელიც სახელმწიფომ უნდა დაიცვას. სამმართველოს გაუქმება კი ნიშნავს, რომ განათლების სისტემიდან გაქრა ის რგოლი, რომელიც პასუხისმგებელი იყო სპეციალური საგანმანათლებლო საჭიროებების მქონე ბავშვების უფლებების დაცვაზე”.

განცხადებაში განათლების სამინისტროს პოზიცია, რომ ეს ნაბიჯი რეორგანიზაციაა ეჭვქვეშ არის დაყენებული და აღნიშნულია, რომ რეალურად სისტემიდან პროფესიონალების განდევნას, პასუხისმგებლობის დეინსტიტუციონალიზაციასა და იმ ცოდნის მოშლას ვხედავთ, რაც წლების განმავლობაში იქმნებოდა. შეზღუდული შესაძლებლობის მქონე მოქალაქეთა თემი, მშობლები და სფეროს სპეციალისტები ითხოვენ:

• “დაუყოვნებლივ აღდგეს ინკლუზიური განათლების განვითარების სამმართველო;
• აღდგეს ყველა პოზიცია, რომელიც უზრუნველყოფდა ინკლუზიური განათლების პოლიტიკის შემუშავებას და ზედამხედველობას;
• სამინისტრომ უზრუნველყოს ანგარიშვალდებულება და თემის ჩართულობა ამ და მსგავს გადაწყვეტილებებში”.

აღნიშნულ განცხადებასთან ერთად, ხვალ 14:00 საათზე განათლებისა და მეცნიერების სამინისტროსთან აქციაც დაიგეგმა.