მოქალაქეებისა და აქტივისტების დისკრედიტაციისთვის ქართული ოცნება მორიგი ბაზის შექმნას აპირებს. ბაზაში ხალხს ჩაწერენ ისეთ ქმედებებზე საჯაროდ პოზიციონირებისთვისაც, რასაც ხელისუფლება “ძალადობას” და “მუქარას” არქმევს. ასეთ მაგალითად შალვა პაპუაშვილმა ბოლოდროინდელი მშვიდობიანი პროტესტიც მოიყვანა, რომლის მონაწილეებიც შანტაჟსა და შტურმის მცდელობაში დაადანაშაულა. პარლამენტის თავმჯდომარის თქმით, ეს მონაცემთა ბაზა განთავსდება სპეციალურ ვებგვერდზე და იქნება საჯარო და “გამჭვირვალე”. აღსანიშნავია, რომ ვინც რუსული კანონის საწინააღმდეგო პოზიციას აფიქსირებს, ეს ისედაც საჯაროა, რადგან თავად ეს ადამიანები თუ ორგანიზაციები არ მალავენ თავიანთ დამოკიდებულებას.
პაპუაშვილი ამტკიცებს, თითქოს მშვიდობიანი პროტესტის უფლება საქართველოში დაცულია და ამას მიმდინარე აქციებიც მოწმობს. თუმცა მას “გამორჩა” აქციაზე სპეცრაზმის მხრიდან არაპროპორციული ძალის გამოყენება და ჟურნალისტებისა და აქტივისტების. შემდეგ მან ძველი პროპაგანდისტული ნარატივი გამოიყენა და თქვა, თითქოს “რადიკალური ოპოზიცია და მის გარშემო ჩამოყალიბებული ძალადობრივი დაჯგუფებები მოქმედებენ აკერმანისა და კანვასის ძალადობრივი პროტესტის ინსტრუქციის შესაბამისად და რეგულარულად მიმართავენ მოქმედების ძალადობრივ და სხვა კანონსაწინააღმდეგო ფორმებს, აღვივებენ ზიზღს, ამკვიდრებენ მტრულ რიტორიკას”.
ასეთი ქმედების მაგალითად პაპუაშვილმა გზის გადაკეტვა და მოქალაქეების მხრიდან ცნობილი ადამიანებისთვის მხარდამჭერი პოსტებისკენ მოწოდებაც კი დაასახელა. მისი ნარატივები მიანიშნებდა, რომ ამ ბაზის პირდაპირი მიზანი პროტესტის მონაწილეების დისკრედიტაციაა.
“ბოლო კვირების განმავლობაში საზოგადოებამ იხილა პარლამენტის შენობის ძალადობრივი შტურმი, სამართალდამცავებზე თავდასხმა, კანონსაწინააღმდეგო ფორმით მოქალაქეების გადაადგილების შეზღუდვა და ამით უკმაყოფილო მოქალაქეებზე ფიზიკური და სიტყვიერი ძალადობა. აგრეთვე მუქარა და შანტაჟი, რომელსაც ისინი ხელოვანების, სპორტსმენების, პოლიტიკოსების და საზოგადოების სხვა ცნობილი წარმონადგენლების და მათი ოჯახის წევრების მიმართ იყენებენ”, — თქვა მან.
გარდა ამისა, პაპუაშვილმა განიხილა 20 ივნისის საქმეზე სტრასბურგის გადაწყვეტილება და განაცხადა რომ ევროპულმა სასამართლომ პარლამენტზე შტურმის მცდელობა დაადასტურა. მას არ უხსენებია, რომ სტრასბურგის სასამართლომ კონვენციის მე-3 მუხლის დარღვევა დაადგინა, რომელიც წამებასა და არასათანადო მოპყრობას გულისხმობს და სახელმწიფოს დაშავებული მოქალაქეებისა და ჟურნალისტებისთვის ზიანის ანაზღაურება დააკისრა. აქვე პაპუაშვილმა აღნიშნა, რომ ევროსასამრთლოს ამ გადაწყვეტილებით, ნაციონალური მოძრაობა “არამხოლოდ მოძალადე ხელისუფლებად, მოძალადე ოპოზიციად არის აღიარებული”. მადესკრიდიტირებელი ბაზის შექმნის საჭიროება, მან სწორედ “ამ მოცემულობით” ახსნა.
“სახელმწიფო სტრუქტურებთან ერთად, მმართველ პარტიასაც ეკისრება პასუხისმგებლობა, დაიცვას მოქალაქეების, სამართალდამცავებისა და საზოგადოების გამორჩეული წევრების ლეგიტიმური ინტერესები. ამ მიზნით, ქართული ოცნების პოლიტსაბჭოს გადაწყვეტილებით, პარტიული სტრუქტირების მეშვეობით, ვიწყებთ მონაცემთა ბაზის შექმნას, სადაც თავს მოიყრის ინფორმაცია ყველა იმ პირის შესახებ, რომელიც ძალადობაში, სხვა კანონსაწინააღმდეგო ქმედებაში, მუქარასა და შანტაჟში არის ჩართული, ან ამგვარ ქმედებებს საჯაროდ იწონებს” – განაცხადა პაპუაშვილმა.
ამის შემდეგ კი მან შესაძლო რეპრესიები დააანონსა:
“ამ პირთა წინააღმდეგ კონსტიტუციისა და კანონის ფარგლებში მიღებული იქნება ყველა ზომა, რათა კანონდარღვევა, ძალადობა და მუქარა არ დარჩეს სახელმწიფოს თუ საზოგადოების რეაგირების გარეშე”.
გაურკვეველია, რა იგულისხმება “საზოგადოების რეაგირებაში”. ეს განსაკუთრებით სახიფათოა იმის ფონზე, რომ მმართველი გუნდის მხარდამჭერები ბოლო დღეებში სხვადასხვა ლოკაციაზე ფიზიკურად უსწორდებიან აქციის მონაწილეებს და ჟურნალისტებს, ურეკავენ მათ, აგინებენ და ემუქრებიან.
ბრიფინგის შემდეგ, კითხვის პასუხად პაპუაშვილმა დააზუსტა, რომ “მუქარასა და შანტაჟში” ჩართულ ადამიანებს ამხელენ და შემდეგ “საზოგადოება განსჯის და ჩამოაყალიბებს თავის აზრს მათთან დაკავშირებით”. აღსანიშნავია, რომ “მუქარასა და შანტაჟში” ჩართულობა ქართული ოცნების შეფასებაა და არა ფაქტი.
“სოციალურ ქსელში როდესაც ჩვენ ვხედავთ განსაკუთრებულ მოწოდებას ძალადობისკენ, ზიზღის ენას, შანტაჟს, მუქარას, ადამიანებს აქვთ ჩამოყალიბებული ხანდახან ანონიმურობის ყალბი შეგრძნება, თითქოს კერძო საუბარია. არადა, ეს იგივე არის, ეს გამოსვლები და მოწოდებები სოციალურ ქსელში იქნება, თუ სხვა ასეთ ღონისძიებებზე. იგივე არის, რაც საჯაროდ”, — თქვა პაპუაშვილმა და ინტერნეტზე სახელმწიფო კონტროლი ვერა, მაგრამ საჯარო პოსტების გამო პარტიული რეპრესიები ნამდვილად დააანონსა, რასაც “საზოგადოების მხრიდან რეაქცია და მორალური შეფასება” უწოდა.
”ვინც არის ჩართული ბულინგში, შანტაჟში, ზეწოლაში, ზიზღის ენის გაღვივებაში და ა.შ. ეს ყველაფერი არის საჯარო პოზიციები მათი, თუ ეს საჯარო პოზიცია აქვთ და არ ერიდებათ დაფიქსირება, დაე ყველა ადამიანმა იხილოს, ვინ არიან ეს ადამიანები”.
კითხვას, ახალისებენ თუ არა ამით მათი მხარდამჭერების მხრიდან ძალადობას, პაპუაშვილმა კითხვითვე უპასუხა: “რანაირად ვახალისებთ ძალადობას?!” შემდეგ კი დაამატა, რომ არის დანაშაული, რომელიც ჯდება სისხლის სამართლის კატეგორიაში და ამაზე სამართალდამცავი უწყებები იზრუნებენ, ხოლო სხვა ქმედებებზე მორალური შეფასებებია საჭირო.
პაპუაშვილმა ახსენა სუს-ის გამოძიება ე.წ. ტრენინგების საქმეზე და თქვა, რომ დღეს საქართველოს ქუჩებში კანვასის სცენარის ინსპირირება ხდება და პარალელებია მაიდანთან. აღსანიშნია, რომ ხელისუფლების “დამხობის” მცდელობაზე და მაიდნის სცენარზე უწყებამ დღევანდელ განცხადებაშიც ისაუბრა.
“აბსოლუტურად იგივე ვიზუალის და რიტუალების ჩატარება და დადგმა ქორწინებიდან, დაქორწინებული წყვილი. ადამიანი, რომელიც ფორტეპიანოზე უკრავს და სხვა ასეთი ვიზუალები, რომლებსაც ისინი ქმნიან იმისთვის, რომ იყოს გარკვეული შეფუთვა იმ ძალადობრივი აქციებისა, რომლებიც სინამდვილეში ხდება”.