ქვიარ-ასოციაცია „თემიდა“ ქვიარ-აქტივისტური, მემარცხენე ტრანს სათემო ორგანიზაციაა, რომელიც ორგანიზდება, მუშაობს და იბრძვის ტრანს და ქვიარ ადამიანებისთვის უსაფრთხო, თანასწორი და ღირსეული პოლიტიკური, უფლებრივი და სოციალური გარემოს შესაქმნელად.
წარმოგიდგენთ „თემიდას“ 2023 წლის ნოემბრის მიმოხილვას:
- პროექტი „ბიანკას“ ფარგლებში, რომელსაც „თემიდა“ ნიდერლანდების სამეფოს საელჩოს მხარდაჭერით ახორციელებს, ტრანს* ბრძოლის უკეთ გააზრებისთვის ორგანიზაციამ ნოემბრის თვეში ჩაატარა ტრანსკონფერენცია „ცხოვრება არსებობის მიღმა“.
- ასევე, ნოემბრის თვეში გამოაქვეყნა პრაქტიკული გზამკვლევი ტრანს და გენდერულად არაკონფორმული ადამიანებისათვის. პუბლიკაცია მიმოიხილავს ქვეყანაში არსებული სახელის და გენდერული მარკერის ცვლილების არსებულ პრაქტიკას, ტრანსჯანდაცვის სერვისებს და სხვა სასარგებლო ინფორმაციას, რომელიც ტრანს პირებს დაეხმარება გენდერულ აფირმაციაში. ნოემბრის თვეში „თემიდამ“ ასევე გამოსცა პუბლიკაცია სქესობრივი გზით გადამდები ინფექციების შესახებ. პუბლიკაციაში ხშირად დასმული შეკითხვების FAQ ფორმატში განხილულია გავრცელებული სგგი-ები, მათი ნიშნები, პრევენციის და მკურნალობის შესახებ ინფორმაცია. პუბლიკაციები ბუკლეტის სახით გამოიცა და მათი აღება თბილისისა და ბათუმის სათემო ცენტრებშია შესაძლებელი. პუბლიკაციები ასევე მოყვება Selftest.ge-ზე „თემიდას“ აივ-ზე თვითტესტირებისა და პრევენციის ნაკრებს, T-PACK-ს.
- „თემიდამ“ გამართა შეხვედრა მედიკამენტური აბორტის შესახებ, რომელიც „ქალთა ფონდის“ მიერ დაფინანსებული პროექტის „სექსუალური და რეპროდუქციული ჯანმრთელობის საჭიროებები ტრანს* ადამიანებში“ ფარგლებში განხორციელდა. ეს იყო პირველი საინფორმაციო შეხვედრების ციკლიდან, რომელიც შეეხება სექსუალური და რეპროდუქციული ჯანმრთელობის საკითხებს და მიზნად ისახავს აღნიშნულის შესახებ ტრანს* ადამიანებში ინფორმირებულობის გაზრდას.
- ნოემბერში ორგანიზაციის სოციალურ მედიაში განთავსდა კამპანიის „ღირსეული დასაქმება ჩვენი უფლებაა“ ფარგლებში მომზადებული რამდენიმე ვიდეო და საინფორმაციო პოსტერი, რომელიც დამსაქმებელსა და დასაქმებულს აცნობს მათ უფლებებს, ღირსეული შრომის პირობებს, ანტიდისკრიმინაციული პოლიტიკის მნიშვნელობას დასაქმების ადგილზე და რჩევებს, რომლებიც მნიშვნელოვანია ინკლუზიური და თანასწორი სამუშაო გარემოს შესაქმნელად. პროექტი ხორციელდებოდა ევროკავშირის (EU) და გაეროს განვითარების პროგრამის (UNDP) მხარდაჭერით. საინფორმაციო პოსტერები და ვიდეოები შეგიძლიათ იხილოთ „თემიდას“ Facebook და Instagram გვერდებზე.
გარდა ამისა, აღსანიშნავია, რომ ნოემბერში საქართველოში პირველი HR კონგრესი გაიმართა, რომელშიც ქვიარ ასოციაცია „თემიდაც“ მონაწილეობდა. ორგანიზაციამ დამსწრეებს გაუზიარა ინფორმაცია იმ გამოწვევების შესახებ, რაც ქვიარ ადამიანებს სამუშაოს ძიებისას და დასაქმების ადგილზე აქვთ. კონგრესის მთავარი თემა იყო ადამიანები ბიზნეს სტრატეგიის ცენტრში, როგორც პასუხი ტალანტების გამოწვევაზე. ღონისძიებას მსხვილი ბიზნესების, საჯარო, კერძო და არასამთავრობო სექტორის, დონორი ორგანიზაციებისა და მედიის წარმომადგენლები ესწრებოდნენ. პირველ დეკემბერს გამართული კონგრესის ორგანიზატორი HR პროფესიონალთა ასოციაცია იყო.
კონგრესი მიზნად ისახავდა ბიზნესებისა და დასაქმების ხელშეწყობის მიმართულებით, შრომით უფლებებზე მომუშავე ორგანიზაციების ერთ სივრცეში შეკრებას, ახალგაზრდა დასაქმების მაძიებლების მოზიდვისა და შენარჩუნების გამოწვევებზე საუბარს. ასევე, დასაქმების ადგილზე მრავალფეროვნების, თანასწორობისა და ინკლუზიის საკითხებზე მსჯელობასა და გლობალური ტენდენციების განხილვას.
თემიდას გუნდი მონაწილეობდა გამოფენაში, რომელიც კონგრესის სივრცეში პანელური დისკუსიების პარალელურად იმართებოდა. ამასთან, ორგანიზაციის სპიკერმა, პოლო ქებაძემ მონაწილეობა მიიღო პანელურ დისკუსიაში — Gen Z პანელი | ახალი ტალღა.