ქვიარ ასოციაცია “თემიდა” ახალ პროექტს იწყებს, რომლის მიზანი ტრანს და ქვიარ თემების გაძლიერებაა დასაქმებისთვის მნიშვნელოვანი სერვისების მიწოდების გზით, მათ შორის, სასწავლო პროგრამებზე ხელმისაწვდომობისა და დასაქმებისთვის საჭირო უნარების განვითარების თვალსაზრისით.
“თემიდას” გამოქვეყნებული განცხადების თანახმად, პროგრამის ფარგლებში მონაწილეები მიიღებენ ისეთ მნიშვნელოვან სერვისებს, როგორიცაა:
- დასაქმების კონსულტანტის მხარდაჭერა დასაქმებისთვის საჭირო უნარ-ჩვევების განვითარების მიზნით (მათ შორის CV/რეზიუმეს შემუშავება, სამოტივაციო წერილის მომზადება, პოტენციურ დამსაქმებელთან გასაუბრების პროცესისთვის მომზადება და მენტორინგი);
- კარიერული კონსულტირების 3 სესია, რომელიც საშუალებას მისცემს პროგრამის მონაწილეს მისი შესაძლებლობების და ინტერესების იდენტიფიცირება შეძლოს ეფექტურად დასაქმებისთვის და კარიერის კონსულტანტის დახმარებით შეიმუშავოს დასაქმებისთვის მნიშვნელოვანი განვითარების ინდივიდუალური გეგმა;
- კარიერის კონსულტანტის დახმარებით შემუშავებული განვითარების ინდივიდუალური გეგმის შესაბამისად სასწავლო ან/და სხვა აქტივობების სერვისის მიწოდება;
- პოტენციურ დამსაქმებლების მოძიება და პროგრამის მონაწილეების დასაქმების ხელშეწყობა.
პროექტში ჩართვის მსურველებმა უნდა შეავსონ ეს სარეგისტრაციო ფორმა. პროექტი ხორციელდება გაეროს განვითარების პროგრამისა (UNDP) და ნორვეგიის მხარდაჭერით, ინიციატივის “ლიდერობა, თანასწორობა, ადვოკატირება და დემოკრატია” (LEAD) ფარგლებში.