„თანასწორობის მოძრაობა“ ქვიარ-ორგანიზაციაა, რომლის მიზანიცაა, ხელი შეუწყობს LGBTQ+ თემისა და ქალების სრულფასოვან ინტეგრაციას საზოგადოებაში, ამავდროულად კი იმუშაოს საზოგადოებაში არსებული ჰომოფობიისა და სექსიზმის აღმოსაფხვრელად. ორგანიზაცია უზრუნველყოფს საჭიროებებზე დაფუძნებული სოციალური თუ სამართლებრივი სერვისების მიწოდებასა და თემის მობილიზაციას, ასევე მუშაობს საზოგადოების ცნობიერების შეცვლისა და პოლიტიკის ადვოკატირებისთვის.
წარმოგიდგენთ „თანასწორობის მოძრაობის“ 2023 წლის დეკემბრის მიმოხილვას:
- 2 დეკემბერს „თანასწორობის მოძრაობამ“ შიდსის კონფერენცია გამართა. კონფერენციის წლევანდელი დევიზი იყო „თემის ლიდერობით“, რაც ხაზს უსვამდა იმ თემების ჩართულობას აივ-პრევენციისთვის ბრძოლაში, ვისაც ყველაზე მეტად ეხება აივ-ინფექცია. კონფერენცია შედგებოდა ექვსი პანელისგან და მასში მონაწილეობდნენ LGBTQ+ თემის წევრები, „ინფექციური პათოლოგიის, შიდსისა და კლინიკური იმუნოლოგიის ცენტრის“ ექიმი-ინფექციონისტები, ეპიდემიოლოგები, სხვადასხვა სერვისის მიმწოდებელი, სათემო და LGBTQ+ ორგანიზაციები, რომლებმაც საკუთარი მოხსენებები დაუთმეს როგორც საქართველოში, ასევე მსოფლიოს სხვადასხვა რეგიონში შიდსთან დაკავშირებულ გამოწვევებს, ასევე ქვიარ თემის წევრების წინაშე არსებულ გამოწვევებს და თანაკვეთას შიდსის ეპიდემიასა და ჰომოფობიას შორის. კონფერენციას ესწრებოდნენ „თანასწორობის მოძრაობის“ სტრატეგიული პარტნიორები, ადგილობრივი და საერთაშორისო არასამთავრობო ორგანიზაციებისა და სახელმწიფო ინსტიტუტების წარმომადგენლები.
- 8 დეკემბერს ბრიუსელში „ილგა-ევროპის“ მიერ ორგანიზებული ევროკავშირის გაფართოების შეხვედრის ფარგლებში „თანასწორობის მოძრაობის“ წარმომადგენლობა შეხვდა LGBTQ+ აქტივისტებს უკრაინიდან, მოლდოვიდან და დასავლეთ ბალკანეთის ქვეყნებიდან; აგრეთვე, ევროკავშირის ინსტიტუტებს. ვიზიტის მიზანი ევროკავშირის კანდიდატ ქვეყნებში ქვიარ ადამიანების უფლებრივი მდგომარეობის განხილვა, კანდიდატ ქვეყნებს შორის გამოცდილებების გაცვლა და სამომავლო თანამშრომლობა იყო.
- 12 დეკემბერს „თანასწორობის მოძრაობის“ წარმომადგენელი „თბილისი პრაიდის“, „თემიდას“, „ქალთა ინიციატივების მხარდამჭერ ჯგუფისა“ (WISG) და „სოლიდარობის თემის“ წარმომადგენლებთან ერთად ევროკავშირის ელჩს პაველ ჰერჩინსკის შეხვდა. შეხვედრაზე LGBTQ+ ადამიანების უფლებრივ მდგომარეობასა და გამოწვევებზე ისაუბრეს.