პრეზიდენტმა, სალომე ზურაბიშვილმა BBC-თან ინტერვიუში რუსული კანონი კიდევ ერთხელ გააკრიტიკა და განაცხადა, რომ ის პუტინის იმ კანონის ასლია, რომელიც 2012 წელს მიიღეს.
“ეს [რუსული კანონი] შეშფოთების საგანია, რადგან ის პუტინის კანონის ასლია, რომელიც 2012 წელს მიიღეს და შემდეგ თანდათან გამკაცრდა და განვითარდა. ეს არის კანონი არასამთავრობო ორგანიზაციებისების საქმიანობის, მედიის საქმიანობის წინააღმდეგ, ეს არის კანონი ჩვენი პარტნიორი ქვეყნების იმ საერთაშორისო ორგანიზაციების წინააღმდეგ, ევროპული ქვეყნების, აშშ-ისა და გაერთიანებული სამეფოს წინააღმდეგ, რომლებიც მხარს უჭერენ საქართველოს დამოუკიდებლობას, სახელმწიფო ინსტიტუტების მშენებლობას, ეკონომიკის განვითარებას ბოლო 30-ზე მეტი წელია. შეშფოთების საგანია.ამიტომაც იყო, რომ კანონი შარშან მასობრივი დემონსტრაციების შედეგად ვერ მიიღეს და ახლა ამ კანონის განმეორება ქართული საზოგადოების პირდაპირი პროვოკაციაა”, — განაცხადადა ზურაბიშვილმა ინტერვიუში.
ამასთან, ზურაბიშვილმა ისაუბრა არასამთავრობო ორგანიზაციების გამჭვირვალობაზე და განაცხადა, რომ საერთაშორისო ორგანიზაციების მიერ მიღებული დაფინანსება სრულად გამჭვირვალეა, ხოლო, რაც არაა გამჭვირვალე, ესაა ფაქტი, ვინ მიიღო კანონის ხელახლა ინიციირების გადაწყვეტილება.
“იმ საერთაშორისო ორგანიზაციებს, რომლებიც მხარს უჭერენ საქართველოს, ძალიან მკაცრი წესები აქვთ, როცა ორგანიზაციებს აფინანსებენ, ამიტომ ყველაფერი ცხადია. არსებობს ვებგვერდები, რომლებზეც ყველას შეუძლია ამ დეტალების ნახვა. რაც გამჭვირვალე არა, ეს კორუფციაა მთავრობის მაღალ დონეებზე. რაც არ არის გამჭვირვალე ესაა ის, თუ როგორ გადაიდგა ეს ნაბიჯები, განსაკუთრებით ეს გადაწყვეტილება კანონის ხელახლა ინიციირების შესახებ, ვინ გადაწყვიტა, რომ კანონი ხელახლა წარედგინათ? ეს მოხდა საქართველოში, თუ მის საზღვრებს გარეთ? მოსკოვში იყო ეს გადაწყვეტილება მიღებული? ეს არის მთავარი კითხვები გამჭვირვალობის შესახებ”, – განაცხადა სალომე ზურაბიშვილმა.
პრეზიდენტმა ასევე განაცხადა, რომ რუსულ კანონს ვეტოს დაადებს. ზურაბიშვილი აცხადებს, რომ მისი ვეტო იქნება ხალხის ხმა, რომელსაც აუცილებლად გაიგებენ.
“რა თქმა უნდა, ვეტოს დავადებ ამ კანონს, ისე, როგორც სხვა კანონებს ვადებ ვეტოს, რადგან ეს არაა მხოლოდ ერთი კანონი, ეს არის მთელი სტრატეგია, რომელიც ეწინააღმდეგება ევროკავშირის რეკომენდაციებს. ჩემს ვეტოს აუცილებლად დაძლევენ, რადგან პარლამენტში არის უმრავლესობა, რომელთა ხმებიც საკმარისია ჩემი ვეტოს დასაძლევად, თუმცა ჩემი ვეტო იქნება ხალხის ხმა და ამ ხმას გაიგებენ”, – განაცხადა სალომე ზურაბიშვილმა.