“ეს არის სტრატეგიული გადაწყვეტილება და დღე, რომელიც ჩვენი კავშირის ისტორიაში დარჩება. ვამაყობთ, რომ შევასრულეთ ჩვენი დანაპირები და მოხარულები ვართ ჩვენი მეგობრებისა და პარტნიორების გამო”, — ასე ეხმიანება ევროკომისია და პრეზიდენტი ურსულა ფონ დერ ლაიენი ევროპული საბჭოს გადაწყვეტილებას.
ევროკავშირის 27 წევრი ქვეყნის გადაწყვეტილებით, საქართველოს ევროკავშირის წევრობის კანდიდატის სტატუსი მიენიჭა, უკრაინასა და მოლდოვასთან კი გაწევრიანების მოლაპარაკებები დაიწყება.
“საქართველოს კანდიდატის სტატუსი მიენიჭა. ამ ისტორიულ დღეს, ევროკავშირსა და წევრ ქვეყნებს ერთი გზავნილი აქვთ საქართველოს მოსახლეობისთვის: გილოცავ საქართველო”, — ამბობს ევროკავშირის ელჩი პაველ ჰერჩინსკი მისალოც ვიდეოში.
მილოცვა, უფრო ზუსტად ერთი სიტყვა “გილოცავთ” დაპოსტა პრემიერმინისტრმაც. ამის გარდა მის ფეისბუქგვერდზე მხოლოდ ის წერია, რომ სტატუსი მოგვანიჭეს. თუმცა X-ზე (ყოფილ ტვიტერზე) ღარიბაშვილმა მადლობა გადაუხადა ევროკავშირის ლიდერებს ქართველების ისტორიული არჩევანის აღიარებისთვის და აღნიშნა, რომ მოუთმენლად ელიან წინსვლას ინტეგრაციის გზაზე.