ლაზარე გრიგორიადისმა საპატიმროს დატოვების შემდეგ განაცხადა, რომ არ ნანობს შარშანდელ მარტის აქციებში მონაწილეობას და კვლავ შეუერთდება რუსული კანონის საწინააღმდეგო პროტესტს.
“ვაპირებ აქციაზე მისვლას. მგონი, ახალგაზრდებს მიმართვა არ სჭირდებათ, ისედაც აქტიურები არიან”, — თქვა ლაზარემ და აღნიშნა, რომ რუსული კანონი ქვეყნის დემოკრატიას უთხრის ფსკერს და არ შეიძლება, ევროკავშირის გზაზე ასეთი კანონები მივიღოთ.
მან მადლობა გადაუხადა როგორც მხარდამჭერებს, ასევე — საქართველოს პრეზიდენტს, სალომე ზურაბიშვილს შეწყალებისთვის: “შოკში ვიყავი. ერთადერთი რაც გავიგე, რომ მე ის შევიწყალეო და მაგის მერე არ მახსოვს არაფერი”.
ლაზარემ ჟურნალისტებთან ისაუბრა პროკურატურის მტკიცებულებებზეც და აღნიშნა, რომ ადვოკატებთან გაივლის, გაასაჩივრებს თუ არა სასამართლოს გადაწყვეტილებას.
“როგორც აქციებზე ხდება საერთოდ, სხვა პოლიციელები მოჰყავთ, რომლებსაც აქტივისტები არ დაუკავებიათ. იგივე სიტუაცია იყო აქაც. დასმული, პოლიტიზირებული პოლიციელები ჰყავდათ სასამართლოზეც. როგორც ვთქვი უკვე, ჩემი მეგობრის დაკავებით მემუქრებოდნენ და დავთანხმდი ყველაფერზე, სხვა გზა აღარ მქონდა. აღიარებით ჩვენებაზე ეგ იყო ზუსტად, ასეთი მუქარა. […]
4 ჩვენება იყო პოლიციელის და იყო ნავთოპროდუქტის კვალი, რაც მგონია, რომ დიდი ხელჩასაჭიდი მტკიცებულებები არ არის. ნავთობპროდუქტი ძალიან ბევრი რამ შეიძლება იყოს. არ იყო დასახელებული რამდენი ხანი იყო ჩემს ტანსაცმელზე ან რომელი იყო”, — განაცხადა მან.
კითხვაზე, რამდენად რთული იყო ციხეში და რა უჭირდა ყველაზე მეტად, ლაზარემ თქვა, რომ მუსიკის გარეშე ყოფნა.
გრიგორიადისს საპატიმროს დატოვებისას ადგილზე ოჯახის წევრები, მეგობრები და მხარდამჭერები დახვდნენ.
ლაზარე გრიგორიადისი 2023 წლის 29 მარტს დააკავეს. პროკურატურის მტკიცებით, მან 7-9 მარტის აქციებზე პოლიციელების წინააღმდეგ ქვები და ე.წ. მოლოტოვის კოქტეილები გამოიყენა. 31 მარტს სასამართლომ გრიგორიადისს აღკვეთის ღონისძიების სახით პატიმრობა შეუფარდა.
საქმის მიმდინარეობის პროცესში ლაზარეს ახალი ბრალიც წარუდგინეს, რომელიც 2021 წელს მამის დაჭრას ეხებოდა. აქტივისტს ბექა გრიგორიადისის განზრახ მსუბუქ დაზიანებასა და კუთვნილი ავტომანქანის დაზიანებას ედავებოდნენ. 25 სექტემბერს ლაზარე ამ საქმეზე სასამართლომ დამნაშავედ ცნო და 1 წლითა და 6 თვით თავისუფლების აღკვეთა მიუსაჯა. ბექა გრიგორიადისი ამბობდა, რომ ამ საქმის ახლა წამოწევა პოლიტიკური ნიშნით მოხდა.
სასამართლო პროცესების პარალელურად, ქართული ოცნება მუდმივად ცდილობდა ლაზარესთვის რეპუტაციული ზიანი მიეყენებინა და მის წინააღმდეგ დისკრედიტაციის კამპანიას აწარმოებდა. კერძოდ, “ქართული ოცნების” წევრებმა გრიგორიადისი მყისიერად დაუკავშირეს ოპოზიციას. გარდა ამისა, ჰომოფობიური ქვეტექსტით “ორიენტაციაარეულად” მოიხსენიებდნენ.
როგორც 24 არასამთავრობო ორგანიზაცია აცხადებდა, გრიგორიადისის გაჭიანურებული სასამართლო მისი საპროცესო უფლებების დარღვევით მიმდინარეობდა. სოციალური სამართლიანობის ცენტრის შეფასებით კი, ლაზარე გრიგორიადისის საქმეში პროკურატურის მტკიცებულებები ურთიერთსაწინააღმდეგო და არადამაჯერებელი იყო. ორგანიზაცია აცხადებდა, რომ საქმეში გამოძიებისა და სასამართლო სხდომების ფარგლებში სხვადასხვა სახის დარღვევები გამოვლინდა.
ერთწლიანი განხილვის შემდეგ, სასამართლო პროცესის დასკვნითი სხდომა, რომელიც არაერთხელ გადაიდო, 12 აპრილს გაიმართა. მოსამართლე ზვიად შარაძემ ლაზარე დამნაშავედ სისხლის სამართლის კოდექსის შემდეგი 2 მუხლით ცნო:
- 353-ე პრიმა მუხლის მეორე ნაწილით (პოლიციელის ჯანმრთელობის ხელყოფა მის სამსახურებრივ საქმიანობასთან დაკავშირებით);
- 187-ე მუხლის მეორე ნაწილის “ა” ქვეპუნქტით (სხვისი ნივთის განადგურება, ცეცხლის წაკიდებით).
საქართველოს პრეზიდენტმა, სალომე ზურაბიშვილმა გრიგორიადისის შეწყალების გადაწყეტილება იმავე დღეს მიიღო, როცა სასამართლომ ლაზარეს თავისუფლების 9 წლით აღკვეთა მიუსაჯა, მაგრამ შეწყალების აქტს ხელი დღეს, 24 აპრილს მოაწერა, რადგან მოსმართლემ დოკუმენტების მოსამზადებლად 2 კვირა აიღო.