საქართველოს სხვადასხვა რეგიონში რამდენიმე დღეა უწყვეტად თოვს. განსაკუთრებულად რთულია ვითარება აჭარასა და გურიაში. დიდთოვლობის გამო სოფლების ნაწილი გარესამყაროსაა მოწყვეტილი. მოქალაქეები სოციალურ ქსელში წერენ, რომ საკვების, მედიკამენტებისა და ელექტროენერგიის გარეშე არიან. ისინი უწყებებისგან რეაგირებას, ყურადღებასა და დახმარებას ითხოვენ.
მოქალაქე ლუკა ხომერიკი ოზურგეთის რაიონის სოფელი შრომადან ფოტოს აქვეყნებს, სადაც ჩანს, რომ თოვლის საფარი რამდენიმე მეტრზეა და ჭიშკარს ფარავს. ის ევაკუაციის საჭიროებაზე წერს: “შეძლებთ თუ არა ზედუბანში ხალხის ევაკუაციას? დავიჯერო, რომ არ არის ამ ქვეყანაში ისეთი ტრანსპორტი, რომ ხალხი გაიყვანოს სოფლიდან?”.
გურიიდან ვიდეოს აქვეყნებს ანა ინწკირველიც. მისი თქმით, სოფლებში ვითარება კატასტროფულია და ხალხი ვერ ახერხებს სახლებიდან გამოსვლას.
რადიო თავისუფლებასთან ინტერვიუში გურიის სოფელ ნატანების მაცხოვრებელი, ნათია მუჯირი ამბობს, რომ მცირეწლოვანი შვილები და სახლში ორი ხანდაზმული ოჯახის წევრი ჰყავს, უამინდობის გამო კი საკვების გარეშე არიან დარჩენილი.
“წინა დღეებში დენიც არ გვქონდა, ერთი საათით მოდიოდა, წავიდოდა, დღეს მოვიდა, როგორც ჩანს ძალიან შევაწუხეთ, იმდენი ვრეკეთ და ეს ელექტროენერგია გაგვიკეთეს. არავინ პატრონი არ გვყვავს, საშინელი მდგომარეობაა. მეზობელს მიცვალებული ჰყავს, ადგილობრივ ხელისუფლებასთან რომ დარეკა, იმან უთხრა ხვალ გაწვიმდება და დადნება თოვლი, მოიცადეო. ერთი ტრაქტორიც არ შემოსულა სოფელში, რომ ფეხით მაინც ვიაროთ. ასეთი თოვლი 1985 წლის მერე არ ყოფილა აქ”, — ამბობს ის.
დილის საათებში ლანჩხუთის მუნიციპალიტეტის მერია წერდა, რომ მობილიზებულია 25 ერთეული ტექნიკა, თუმცა რთული მეტეოროლოგიური პირობების გამო დროულად ვერ გადაადგილდება. განცხადებაში ნათქვამია, რომ ამოქმედებულია ცხელი ხაზი და მოქალაქეებს შეუძლიათ დარეკონ ნომრებზე: 599 111 437; 591 19 23 66; 577 39 83 22. ამავე განცხადებით, მათ მოუწოდეს მოსახლეობას, თავი შეიკავონ გადაადგილებისგან და “გაგებით მოეკიდონ შემქნილ სიტუაციას”. პოსტის კომენტარებში არაერთმა მოქალაქემ უკმაყოფილება გამოხატა.
დიდთოვლობამ პრობლემები შექმნა აჭარაშიც. თორნიკე რიჟვაძის თქმით, მიიღეს გადაწყვეტილება, რომ მომდევნო ორი დღის განმავლობაში ბაღებსა და სკოლებში სასწავლო პროცესი შეჩერდეს. გარდა ამისა, შეჩერებულია ფრენები ბათუმის აეროპორტში, ხოლო საქართველოს რკინიგზამ, რამდენიმე მიმართულებით რეისები გააუქმა.
ქვეყნის სხვადასხვა რეგიონში დიდთოვლობის შედეგად წარმოქმნილ მძიმე პრობლემებს ირაკლი კობახიძე კანცელარიაში სხდომაზე მხოლოდ ზოგადი შინაარსის კომენტარით გამოეხმაურა და განაცხადა, რომ “ყველა ზომა იქნება მიღებული” მოქალაქეების დასახმარებლად.
საგანგებო სიტუაციების სამსახურს საკუთარ ფეისბუქგვერდზე ამ დრომდე არ გამოუქვეყნებია ოფიციალური განცხადება, თუ რა სამუშაოები მიმდინარეობს პრობლემის აღმოსაფხვრელად. მედია აპრილის კითხვაზე, რას აკეთებენ მოქალაქეების დასახმარებლად, საგანგებოში გვითხრეს, რომ “ახორციელებენ შეტყობინებებზე გასვლას”.