ძალადობაში ბრალდებული კაცი, რომელსაც სასამართლომ აღკვეთი ღონისძიების სახით გირაო შეუფარდა და გაათავისუფლა, დაზარალებულ ქალს სამსახურში მიუვარდა. ამის შესახებ ინფორმაცია ორგანიზაცია საფარმა გაავრცელა, რომელიც დაზარალებულის ინტერესებს იცავს.
ადვოკატი თამარ ლუკავა მედია აპრილთან ჰყვება, რომ დაზარალებული და ბრალდებული თანამშრომლები და პარტნიორები იყვნენ. მისი თქმით, კაცი ქალზე ფსიქოლოგიურად წლების განმავლობაში ძალადობდა, ბოლოს კი ქალს თავს სამუშაო საათებში, სამსახურში დაესხა. შედეგად, მან სახისა და თავის მრავლობითი დაზიანება და ტვინის შერყევა მიიღო.
ორგანიზაცია ითხოვდა, სასამართლოს კაცისთვის აღკვეთი ღონისძიების სახით წინასწარი პატიმრობა შეეფარდებინა, რაც მოსამართლემ არ გაითვალისწინა და ბრალდებული 7 მაისს, გირაოთი გაათავისუფლა.
“ეს იყო მაღალი რისკის შემცველი საქმე, ინდივიდუალურად შესწავლის შემთხვევაში, სასამართლოც დაინახავდა, რომ საჭირო იყო პატიმრობის შეფარდება. მივუთითებდით, რომ რადგან სამუშაო სივრცეში მოხდა თავდასხმა, სხვა მოწმეების თანდასწრებით, მომატებული საფრთხე იყო, რომ დანაშაული შესაძლოა განმეორებულიყო. ასევე, შესაძლოა, მტკიცებულებების მოპოვებასაც შეჰქმნოდა მომავალში რაღაც პრობლემა, თუმცა სასამართლომ არ გაითვალისწინა არც პროკურატურის მოთხოვნა და არც ჩვენი განაცხადი ამ საკითხთან დაკავშირებით. მოძალადეს შეეფარდა გირაო, რაც თავისთავად არ აღმოჩნდა აღმკვეთი ღონისძიება”, — აღნიშნავს ადვოკატი.
საფარის ცნობით, 19 მაისს ძალადობაში ბრალდებული, რომელსაც შემაკავებელი ორდერის საფუძველზე, ქალის საცხოვრებელ სახლთან და სამსახურთან მიახლოება აკრძალული აქვს, სამუშაო ადგილას ყვირილით, გინებითა და ლანძღვით მივიდა — დაზარალებული იმ მომენტში ადგილზე არ იმყოფებოდა. ადვოკატი განმარტავს, რომ კაცი ამავე სამსახურიდან 2 მაისს გაათავისუფლეს, შესაბამისად, მისი თქმით, მისვლის ერთადერთი მიზანი სავარაუდო ძალადობის ჩადენა შეიძლება ყოფილიყო.
“გირაოს შეფარდება, უმეტეს შემთხვევაში, ახალისებს მოძალადეს”
ადვოკატი თამარ ლუკავა, საფარის საქმეებზე დაკვირვებით, აღნიშნავს, რომ ბოლო პერიოდში მოძალადისთვის აღკვეთი ღონისძიების სახით გირაოს შეფარდება ხშირია, რასაც თან მოსდევს დანაშაულის განმეორებითი ჩადენის შემთხვევებიც. იხსენებს ერთ ასეთ ქეისს:
“დაახლოებით 2 თვის წინ საქმე პოლიციელის მხრიდან ჩადენილ დანაშაულს ეხებოდა და იქაც სასამართლომ აღკვეთი ღონისძიების სახით გირაო გამოიყენა, მიუხედავად იმისა, რომ ვეუბნებოდით, რომ იყო საკმაო რისკის შემცვლი ამ პირის გარეთ ყოფნა, რადგან მიუწვდებოდა ხელი იარაღთან, იყო თანამდებობის პირი, პოლიციაში მუშაობდა და შესაბამისად, მოწმეებთანაც შეიძლება ყოფილიყო ზეგავლენის მცდელობა. ეს არ გაითვალისწინა სასამართლომ და გირაო შეუფარდა. განცდა მიჩნდება, რომ წინასწარ იციან მოძალადეებმა, რომ ეს აღკვეთი ღონისძება არ არის ის, რასაც უნდა ელოდონ — პატიმრობაში არავინ გაუშვებს და გარკვეული თანხის სანაცვლოდ რჩებიან გარეთ”, — ამბობს ადვოკატი.
მისივე თქმით, გირაოს შეფარდების მეორე პრობლემა უკავშირდება იმას, რომ ასეთ დროს სასამართლოს ბევრად დიდი ვადა აქვს განსახილველად. მაგალითად, თუ პატიმრობის შემთხვევაში, საქმის განხილვა 9 თვეში უნდა დასრულდეს, გირაოს შემთხვევაში, პირველ ინსტანციაში საქმის განხილვა შესაძლოა, წლების განმავლობაში გრძელდებოდეს.
ადვოკატი აღნიშნავს, რომ საქმის განხილვის გაჭიანურება კიდევ ერთი გარემოებაა, რომელიც ახალისებს მოძალადეს და დაუსჯელობის განცდას უჩენს მას.
“[მოძალადე] ხშრად შედის კომუნიკაციაში მსხვერპლთან, ან ახორციელებს განმეორებით დანაშაულს, ან ისეთ ზემოქმედებას ახდენს მსხვერპლზე, რომ ზოგს არ აქვს უნარი, მივიდეს, მისცეს ჩვენება და დაიცვას თავისი პოზიცია, როგორც დაზარალებულის. იმიტომ, რომ ელემენტარულად, უნდობლობა აქვს გაჩენილი სახელმწიფო უწყებების მხრიდან ამ გაჭიანურებული განხილვების გამო და აქვს განცდა, რომ არავინ დაიცავს”, — აღნიშნავს უფლებადამცველი.
ორგანიზაცია გამოძიებას მოუწოდებს, განმეორებითი ძალადობის თავიდან ასარიდებლად, დროულად დააკავონ ბრალდებული. ამასთან ერთად, ადვოკატი ხაზს უსვამს, რომ არსებობს საფრთხე, ბრალდებულმა მოწმეებზე ირიბი ზემოქმედება მოახდინოს.
“ამ საქმეებზე მოწმეები არიან თანამშრომლები, იმიტომ, რომ ფაქტი სამუშაო სივრცეში მოხდა. ამ მივარდნებით არა მხოლოდ დაზარალებულის ფიზიკურ და ფსიქოლოგიურ ჯანმრთელობას უქმნის საფრთხეს, ასევე, მოწმეებზეც ზემოქმედებს ირიბად, იმიტომ, რომ ის ადამიანები იმ სამსახურში მუშაობენ და ხედავენ, ეს მოძალადე როგორ მიდის და სკანდალს აწყობს. შესაბამისად, არ გამოვრიცხავ, რომ მოწმეებზე ზემოქმედების გამო, მომავალში პოლიციასთან თანამშრომლობა და ჩვენების მიცემა ვერ შეძლონ”.
თამარ ლუკავა აღნიშნავს, რომ ბოლო ათწლეულის განმავლობაში არსებობს არაერთი საქმე, როცა პოლიციის, სასამართლოს, თუ პროკურატურის გულგრილობას ან არასწორ რეაგირებას სავალალო შედეგები მოჰყვა.
“ვფიქრობთ, რომ შსს-მა და პროკურატურამ უნდა მიიღოს შესაბამისი ზომები იმისი, რომ მოძალადე გარეთ არ იყოს. ეს ქალი სამსახურში ვერ მიდის, ეშინია სამსახურში მისვლის იმის გამო, რომ ფიქრობს, შესაძლოა იქ დახვდე ან მიუვარდეს”, — დასძენს ადვოკატი.