DataFest Tbilisi-სა და ევროპის საბჭოს ორგანიზებით, გაიმართება ბუთქემფი “ციფრულ სივრცეში გენდერის ნიშნით ძალადობის გაშუქების” შესახებ. ბუთქემფი განკუთვნილია ჟურნალისტებისთვის, რომლებიც მუშაობენ ან დაინტერესებული არიან გენდერული თანასწორობისა და ადამიანის უფლებების საკითხებით.

მონაწილეები გაეცნობიან:

• რა არის ტექნოლოგიების გამოყენებით ჩადენილი გენდერული ძალადობა ქალებისა და გოგოების მიმართ და როგორ ვლინდება ის;
• როგორ შეიძლება ციფრული ძალადობის იდენტიფიცირება და მონიტორინგი;
• როგორ უნდა გააშუქონ ამბები ეთიკურად — ისე, რომ დაიცვან დაზარალებულთა ღირსება და შეეწინააღმდეგონ საზიანო ნორმებს;
• როგორ მუშაობს პრევენციისა და დაცვის მექანიზმები და პასუხისმგებლობის ინსტრუმენტები;
• როგორ შეიძლება მონაცემების, ნარატივებისა და ციფრული გამოძიების გამოყენება ამ თემაზე ცნობიერების ასამაღლებლად.

ორგანიზატორების განმარტებით, ბუთქემფი მოიცავს მენტორობას, ვორკშოპებსა და პრაქტიკულ მუშაობას. მონაწილეები შექმნიან მასალებს, რომლებიც ხელს შეუწყობს დისკუსიას ციფრულ სამყაროში არსებულ ძალადობაზე და ისაუბრებს პრობლემის გადაჭრის გზებზე.

შერჩეული 10 მონაწილე ბუთქემფის მეორე ეტაპზე შეუერთდება DataFest Tbilisi 2025-ს. მათ შესაძლებლობა ექნებათ, იმუშაონ ინდივიდუალურ მენტორთან, წარადგინონ იდეები და შექმნან თავისი ნამუშევრები. 28 ნოემბერს მონაწილეები საბოლოო მასალებს წარადგენენ, 29-ში კი ჟიური ორ გამარჯვებულს გამოავლენს. გარდა ამისა, შერჩეული ჟურნალისტები დაესწრებიან 3-დღიან ფესტივალს და წამყვან მედიაპროფესიონალებსა და ციფრული უფლებების ექსპერტებს მოუსმენენ.

DataFest Tbilisi-ის ინფორმაციით, ბუთქემფის დასრულების შემდეგ, საბოლოო ნამუშევრები შერჩეულ მედიაპლატფორმებზე გამოქვეყნდება, ხოლო თითოეული გამარჯვებული სიმბოლურ პრიზს — 500 ლარს მიიღებს.

ჟურნალისტები შეიძლება წარადგენდნენ მედიასაშუალებას ან განაცხადი გააგზავნონ, როგორც დამოუკიდებელმა პირებმა. განაცხადის მიღების ბოლო ვადა 29 ოქტომბერი, 23:59 საათია. დეტალურ ინფორმაციას შეგიძლიათ გაეცნოთ ბმულზე: https://forms.gle/VrLhwE3FLqKdH79Q8

რა უნდა იცოდეთ DataFest Tbilis-ზე

DataFest Tbilisi აღმოსავლეთ ევროპისა და ცენტრალური აზიის ყველაზე დიდი მონაცემთა ფესტივალია და ის წელს უკვე მეცხრედ ტარდება. 27-29 ნოემბერს სტუმრებს შესაძლებლობა ექნებათ, მოუსმინონ საინტერესო სპიკერებს და გაეცნონ მონაცემთა სამყაროს მიმდინარე ტრენდებსა და მომავლის ტექნოლოგიებს.

წლევანდელი DataFest Tbilisi-ის ფოკუსია ხელოვნური ინტელექტი — როგორ გამოიყენება ის სხვადასხვა სფეროში (ბიზნესი, კომუნიკაციები, ჯანდაცვა, მმართველობა) და რა გამოწვევებს უკავშირდება მისი რეგულირებისა და ეთიკური საკითხები.

DataFest Tbilisi აცხადებს, რომ გასული წლების მსგავსად, წელსაც მათი სცენა მნიშვნელოვანი პლატფორმა იქნება გლობალურ და ლოკალურ პრობლემებზე სასაუბროდ.

DataFest Tbilisi 2025-ის ორგანიზატორია ForSet, მთავარი პარტნიორები კი არიან — ევროკავშირის წარმომადგენლობა საქართველოში, გაეროს განვითარების პროგრამა (UNDP), საქართველოს ბანკი და ევროპის საბჭოს ოფისი საქართველოში. გარდა ამისა, ფესტივალის პარტნიორები არიან: გაეროს მოსახლეობის ფონდი (UNFPA), Epam, ნიდერლანდების სამეფოს საელჩო საქართველოში, IBCCS TAX საქართველო, Autodraft, Alliance of Democracies, Social Lab. მხარდამჭერები არიან: The Image, გრანთ თორნთონ საქართველო. ხოლო ქომუნითი პარტნიორებია: საქართველოს ხელოვნური ინტელექტის ასოციაცია (GAIA), ProductTank Tbilisi, EBA – ევროპის ბიზნეს ასოციაცია, დიზაინის ინსტიტუტი, DevTherapy, Axel;

წელს DataFest Tbilisi-ის მედია პარტნიორებს შორის არის მედია აპრილიც.

ფესტივალის შესახებ დეტალური ინფორმაცია შეგიძლია ნახოთ აქ: https://www.datafest.ge/