ბათუმის სახელმწიფო უნივერსიტეტში გუშინ დაწყებულ პროტესტს სხვადასხვა უნივერსიტეტის სტუდენტების ნაწილი უერთდება. სტუდენტური მოძრაობები განცხადებებს აქვეყნებენ და ამბობენ, რომ ხმის მოპარვის საშუალებას არავის მისცემენ.
შავი ზღვის საერთაშორისო უნივერსიტეტის სტუდენტურმა თვითმმართველობამ დაწერა, რომ არ აღიარებენ არჩევნების ლეგიტიმურობას და ისტორიის სწორ მხარეს დგომას არჩევენ.
თსსუ-ს სტუდენტურმა მოძრაობამ კი დაწერა, რომ მხარს უჭერენ ბათუმის სახელმწიფო უნივერსიტეტის ბრძოლას მოპარული ხმისთვის.
“ჩვენ, სტუდენტები, როგორც საქართველოს აქტიური მოქალაქეები და დამკვირვებლები, რომლებიც თავადვე შევესწარით, როგორ ყალბდებოდა საქართველოს არჩევანი, მონაწილეობას მივიღებთ ყველა მშვიდობიან აქციასა და მსვლელობაში, რათა დავიბრუნოთ ჩვენი ხმა და ევროპული მომავალი! ვიბრძვით თავისუფლებისთვის! გავიმარჯვებთ სახელოვნად!” — აღნიშნულია თსსუ-ს სტუდენტური მოძრაობის განცხადებაში.
ბსუ-ში დაწყებულ პროტესტს სოლიდარობა გამოუცხადა და შეუერთდა ჯიპას სტუდენტების ნაწილიც.
“აკადემიური სფერო იქნება ცოცხალი და დამოუკიდებელი, რისთვისაც საჭიროა, რომ ქართველმა ხალხმა დავიბრუნოთ ჩვენი არჩევანი. ამ ბრძოლაში თითოეული სტუდენტის ხმა მნიშვნელოვანია. ვიმედოვნებთ, რომ ბათუმელი სტუდენტების გამბედავი და სამართლიანი პროტესტი განაახლებს ახალგაზრდების შემართებას და საერთო ძალისხმევით საქართველო დაუბრუნდება თავის ისტორიულ — ევროპულ გზას”, — ნათქვამია განცხადებაში.
პროტესტს ინფორმაციის გავრცელებიდან მალევე შეუერთდა ილიაუნის სტუდენტური მოძრაობა, რომელმაც უნივერსიტეტში ღამის გათენებით გადაწყვიტა სოლიდარობის გამოხატვა.