27 ივნისს, გალერეა “ართბითში” გამოფენა — ბროწეულისფერი გაიხსნა. გამოფენა, რომელიც 8 სექტემბრამდე გასტანს, ადგილობრივი და საერთაშორისო ხელოვანების ნამუშევრებს აერთიანებს. გამოფენა თემატურად ეხმიანება საქართველოში ჰომოფობიური, ადამიანის უფლებების დამაზიანებელი კანონების ინიციირებას, რომელიც პარლამენტმა პირველი მოსმენით უკვე მიიღო.
გამოფენის სახელის შთაგონებად სერგო ფარაჯანოვის ფილმი და შემოქმედის ცხოვრების გზა იქცა. ფარაჯანოვი საბჭოთა რეპრესიული პრაქტიკის სამიზნედ იქცა, იგი “ჰომოსექსუალიზმის” ბრალდებით იყო დაკავბული, დღევანდელ საქართველოში კი ისევ აქტუალურია სახელმწიფო დევნა ქვიარების მიმართ.
ოცნების ჰომოფობიური კანონიც რუსულია და ეხება ყველას, მათ შორის, შენც — აგიხსნით რატომ
“გამოფენის სათაური სიმბოლურ მნიშვნელობასაც ატარებს, ვინაიდან კარგად ასახავს ადგილობრივ სოციალურ სივრცეში ათწლეულების განმავლობაში დამკვიდრებულ პოლიტიკას გენდერული იდენტობებისადმი, ასევე ეხმიანება სერგო ფარაჯანოვის კინემატოგრაფიულ შედევრსაც, რომლის ნამუშევრებიც საბჭოთა ხელისუფლებამ ცენზურას დაუქვემდებარა, შემდგომ კი მისი ავტორი ჰომოსექსუალიზმის ბრალდებით დაიჭირა. მსგავსი ტიპის პრაქტიკები დღევანდელ რეალობასთან ახლოს დგას, რაც ფიზიკური და სოციალური ძალადობის ფორმით მანიფისტირდება, როგორც სახელმწიფოს, ისე საზოგადოების მიერ”.
გამოფენაზე შეძლებთ ნახოთ როგორც სერგო ფარაჯანოვის კოლაჟი — ლეგენდა სურამის ციხისა, რომელიც იმავე სახელწოდების ფილმისთვის შეიქმნა, ისე სხვა ადგილობრივი ხელოვანების — დავით აფაქიძის, ანდრო დადიანის, გიორგი კარტოზიას, გიორგი მიმინოშვილისა და მარიკა ქოჩიაშვილის ნამუშევრები. ამასთან, გამოფენაზე წარმოდგენილია საერთაშორისო ხელოვანების ნამუშევრებიც.