ქალთა მოძრაობის ორგანიზებით, 25 ნოემბერს, 15:00 საათზე საქართველოს პარლამენტთან, ბავშვთა ქორწინების წინააღმდეგ აქცია აიმართება.
ღონისძიების აღწერის თანახმად, მიუხედავად იმისა, რომ ქორწინების უფლება საქართველოში მხოლოდ სრულწლოვანებს აქვთ, გვესმის ბავშვთა ქორწინების, იძულებითი ნიშნობის, 16 წლამდე გოგოების მშობიარობისა და ბოლოს “ქმრის” მიერ 14 წლის აითაჯის მკვლელობის შემზარავი ამბები. აქციის ორგანიზატორები აცხადებენ, რომ ქვეყანაში ბავშვთა ქორწინების არსებობა სახელმწიფოს პასუხისმგებლობაა, რომელიც არ იცავს ბავშვებს და არ ებრძვის პედოფილიას.
“ჩვენ, ყველამ ერთად, ვისაც ამ სასტიკი რეალობის ცვლილება გვსურს, ახლავე უნდა გადავდგათ ქმედითი ნაბიჯები და სახელმწიფოს მკაცრად მოვთხოვოთ ეფექტური რეაგირება. ბავშვები თავს ვერ დაიცავენ, ბავშვები ჩვენ უნდა დავიცვათ! 25 ნოემბერს, ქალთა მოძრაობა, აქტივისტები აზერბაიჯანული თემიდან და ექსპერტები საპროტესტო აქციაზე გელოდებით! გელით ყველას, ვისთვისაც ბავშვები, მათი ცხოვრება, განვითარება და ბედნიერება მნიშვნელოვანია”, — აღნიშნულია ღონისძიების აღწერაში.
25 ნოემბერი ქალთა მიმართ ძალადობასთან ბრძოლის საერთაშორისო დღეა. თარიღი 1981 წელს დაფუძნდა და აქტივისტ ქალებს, დებ მირაბალებს უკავშირდება. ეს დღეც სწორედ მათ პატივსაცემადაა შერჩეული, რადგან ქალები რეჟიმის წინააღმდეგ ბრძოლას შეეწირნენ.
ქალთა მიმართ ძალადობასთან ბრძოლის დღეს, საერთაშორისო ორგანიზაციებთან ერთად, ადგილობრივებიც უერთდებიან. გენდერული ნიშნით ძალადობის წინააღმდეგ მიმართულ კამპანია ყოველწლიურად კონკრეტული თემისკენაა მიმართული. მიმდინარე წლის 25 ნოემბრის თემა კი ბავშვთა ქორწინების წინააღმდეგ ბრძოლაა.