ამერიკის შეერთებული შტატები ქართული ოცნების წევრებსა და მათი ოჯახის წევრებს სანქციებს, კერძოდ სავიზო შეზღუდვებს უწესებს. შესაძლოა, ამ სიაში მმართველი გუნდის დეპუტატების და ნათესავების გარდა სხვა პირებიც მოხვდნენ.
სახელმწიფო მდივნის, ენტონი ბლინკენის განცხადებით, სავიზო შეზღუდვის პოლიტიკა გავრცელდება მათზე, ვინც პასუხისმგებელია საქართველოში დემოკრატიისთვის ძირის გამოთხრაზე. ასევე, აღნიშნავს, რომ ეს უკავშირდება ქართული ოცნების მიერ შეთავაზებულ რუსულ კანონსაც.
“ვაანონსებ ახალ სავიზო შეზღუდვის პოლიტიკას მათთვის, ვინც პასუხისმგებელია საქართველოში დემოკრატიისთვის ძირის გამოთხრაზე, მათ შორის, ქართული ოცნების მიერ ინიციირებულ “უცხოეთის გავლენის” კანონმდებლობასთან დაკავშირებით”, — დაწერა ბლინკენმა X-ზე.
I am announcing a new visa restriction policy for those responsible for undermining democracy in Georgia, including in connection with the Georgian Dream’s proposed “foreign influence” legislation.
— Secretary Antony Blinken (@SecBlinken) May 23, 2024
რამდენიმე წუთში კი სახელმწიფო დეპარტამენტის ვებგვერდზე გამოქვეყნდა ბლინკენის განცხადება, სადაც ვკითხულობთ, რომ შეზღუდვა ეხებათ იმ პირებსაც, რომლებიც არამხოლოდ პასუხისმგებელნი, არამედ თანამონაწილეები არიან საქართველოში დემოკრატიისთვის ძირის გამოთხრაზე, ასევე მათი ოჯახის წევრებს.
“ბოლო რამდენიმე თვის განმავლობაში მმართველმა პარტია “ქართულმა ოცნებამ” შეიმუშავა და მიიღო კანონი “უცხოური გავლენის” შესახებ, რომელიც შეკრებისა და გამოხატვის თავისუფლებას ჩაახშობს; იმ ორგანიზაციების სტიგმატიზებას მოახდენს, რომლებიც ემსახურებიან საქართველოს მოქალაქეებს და ხელს შეუშლის დამოუკიდებელ მედია ორგანიზაციებს, რომლებიც მოქალაქეების მაღალი ხარისხით ინფორმირებაზე მუშაობენ. მას შემდეგ, რაც საქართველოს მოქალაქეებმა კანონის წინააღმდეგ ხმა აღიმაღლეს, მშვიდობიანი, თავისუფალი აზრის ჩასახშობად დაშინებისა და ძალადობის აშკარა ნიშნები ვიხილეთ. როგორც “ეროვნული უსაფრთხოების კანონი”, ასევე რეპრესიული ტაქტიკა, გამოიყენება ლეგიტიმური უთანხმოების ჩასახშობად, ეს ძირს უთხრის საქართველოს დემოკრატიას და ფუნდამენტურ თავისუფლებებს, რისი ქონის უფლებაც ქართველ ხალხს აქვს და ეწინააღმდეგება საქართველოს გრძელვადიან მიზანს, ევროატლანტიკურ ინტეგრაციასა და შეერთებულ შტატებთან სტრატეგიულ პარტნიორობაზე, რაც მის კონსტიტუციაშია ასახული.
ამ ქმედებების პასუხად, სახელმწიფო დეპარტამენტი საქართველოსთვის სავიზო შეზღუდვის ახალ პოლიტიკას იღებს და ის გავრცელდება იმ პირებზე, რომლებიც პასუხისმგებელნი არიან ან თანამონაწილეობენ საქართველოში დემოკრატიისთვის ძირის გამოთხრაში, ასევე მათი ოჯახის წევრებზე. ეს მოიცავს პირებს, რომლებიც პასუხისმგებელნი არიან საქართველოში სამოქალაქო საზოგადოებისა და მშვიდობიანი შეკრების თავისუფლების შეზღუდვაში ძალადობის ან დაშინების კამპანიის გზით.
აშშ-ის დახმარება საქართველოს დემოკრატიაზე ძველი და ფუნდამენტურია ჩვენი ქვეყნების ორმხრივ ურთიერთობაში. ნებისმიერი, ვინც ძირს უთხრის დემოკრატიულ პროცესებს ან ინსტიტუტებს საქართველოში — მათ შორის, 2024 წლის ოქტომბრის არჩევნების წინ, მიმდინარეობისას, ან შემდეგ — შეიძლება გამოცხადდეს პირად, რომელსაც არ აქვს აშშ-ს ვიზის მიღების და შტატებში გამგზავრების უფლება ამ პოლიტიკის მიხედვით. ეს შეზღუდვები შეიძლება გავრცელდეს ამ პირების ოჯახის წევრებზეც.”, — აღნიშნავს სახელმწიფო მდივანი.
ბლინკენი წერს იმასაც, რომ დღესვე იწყებს შეერთებულ შტატებსა და საქართველოს შორის ორმხრივი თანამშრომლობის მიმოხილვას.
“ჩვენ ისევ ვიტოვებთ იმედს, რომ საქართველოს ლიდერები გადახედავენ კანონპროექტს და გადადგამენ ნაბიჯებს მათი ერის დემოკრატიული და ევროატლანტიკური მისწრაფებების წინსვლისთვის. ჩვენს ორ ქვეყანას შორის ურთიერთობის განხილვისას, გავითვალისწინებთ საქართველოს ქმედებებს გადაწყვეტილების მიღებისას”.