ონლაინ მედიების წარმომადგენლებმა საერთო ბრიფინგი გამართეს, სადაც რუსული კანონის ხელახლა ინიცირება დაგმეს. ჟურნალისტებმა ხაზი გაუსვეს, რომ ამ კანონის მთავარი მიზანია დამოუკიდებელი საზოგადოებრივი და მედია ორგანიზაციების განადგურება და სიტყვის თავისუფლების ჩახშობა.
ასევე აღნიშნეს, რომ არ დაუშვებენ რუსული კანონის მიღებას და ბოლომდე გაუწევენ მას წინააღმდეგობას.
“ხელისუფლებამ კიდევ ერთხელ მოგვატყუა და მწვავე სახალხო პროტესტის შედეგად ერთი წლის წინ ჩაგდებული რუსული კანონი წინასაარჩევნოდ უკან დააბრუნა. რუსული კანონის მთავარი მიზანია დამოუკიდებელი საზოგადოებრივი და მედია ორგანიზაციების განადგურება, თავისუფალი სიტყვის ჩახშობა, ტოტალური კონტროლის დამყარება საზოგადოებრივ აზრზე, იმ მედიის გაქრობა, რომელიც ხელისუფლებას მუდმივად ამხელს კორუფციაში, ნეპოტიზმში, სიღატაკეში, ადამიანის უფლებების დარღვევაში, დაპირებების შეუსრულებლობაში.
ქართული ოცნების მიერ ინიცირებული კანონი გარიყავს ჩვენს ქვეყანას ევროპული ოჯახისგან, ასამარებს დასავლურ მომავალს. რუსულმა კანონმა რუსეთში უკვე გაანადგურა დამოუკიდებელი მედია და საზოგადოებრივი ორგანიზაციები, ჩაახშო კრიტიკული აზრი, რუსი ჟურნალისტები და აქტივისტები დააპატიმრეს, მოკლეს და ვინც ცოცხალი დარჩა, ქვეყნიდან განდევნეს. რეჟიმის წინაშე რუსეთში საზოგადოება დარჩა სრულიად დაუცველი.
ჩვენ არ დავუშვებთ რუსული კანონის მიღებას, ბოლომდე გავუწევთ მას წინააღმდეგობას და დამოუკიდებელი მედია მოვუწოდებთ ქართულ ოცნებას, შეწყვიტოს თავისუფლებაზე თავდასხმა”, — აცხადებენ მედიები.
ბრიფინგზე პუბლიკის რედაქტორმა, ლიკა ზაკაშვილმა აღნიშნა, რომ კანონის მიზანი ევროპული მომავლის საბოტაჟია და ასეთ კანონით ქვეყნებს ევროპული მომავალი არ აქვთ.
“ეს არის კანონი, რომელიც საქართველოში დამოუკიდებელ მედიას გააქრობს. დამოუკიდებელი მედიის გარეშე არ არის დემოკრატია, არ არის სიტყვის თავისუფლება”, — აღნიშნა მან.
ბრიგინგი მედიის წარმომადგენლებმა დაასრულეს შეძახილებით: “არა რუსულ კანონს”!
ქართული ოცნება რუსულ კანონპროექტს პარლამენტში ხელახლა დააინიცირებს. ამის შესახებ უმრავლესობის ლიდერმა მამუკა მდინარაძემ დღეს, 3 აპრილს გამართულ ბრიფინგზე განაცხადა.
ქართული ოცნების ვრცელ განცხადებაში, რომელიც მდინარაძეს საზოგადოებას გააცნო, აქცენტები კვლავ არასამთავრობო სექტორს მიემართებოდა. მდინარაძის მტკიცებით, სამოქალაქო სექტორი რჩება ყველაზე გაუმჭვირვალე სექტორად საქართველოში და უცნობია, არასამთავრობო ორგანიზაციების 90%-ზე მეტის დაფინანსების შესახებ.
ბრიფინგისას ასევე ცნობილი გახდა, რომ ახალი კანონპროექტი იმავე ტექსტით დაინიცირდება, რომელსაც პარტია შარშან იყენებდა.
“კანონპროექტი დაინიცირდება ზუსტად იგივე ტექსტით, როგორც შარშან იყო დაინიცირებული. ერთადერთი განსხვავებით — ჩვენ მიერ დაინიცირებულ კანონპროექტში ნაცვლად ტერმინისა “უცხოური გავლენის აგენტი” გამოყენებული იქნება ტერმინი “უცხოური ძალის ინტერესების გამტარებელი ორგანიზაცია”, — აცხადებს მდინარაძე.
მდინარაძემ ბრიფინგისას აშშ-ის ყოფილი ელჩი, კელი დეგნანი საზოგადოების შეცდომაში შეყვანაშიც დაადანაშაულა და აღნიშნა, რომ ელჩმა საქართველოში ხალხს “სამარცხვინო ტყუილი აკადრა”, რადგან ამერიკული კანონიდან გადმოწერილი კანონპროექტი, რომელსაც რუსულ კანონთან არაფერი ჰქონდა საერთო, რუსულ კანონად მონათლა.
მდინარაძის განცხადებით, ეს გადაწყვეტილება 2 აპრილს გამართულ უმრავლესობის სხდომაზე მიიღეს.
“საპარლამენტო უმრავლესობამ პარტიის პოლიტიკურ საბჭოსთან კონსულტაციის შედეგად მიიღო გადაწყვეტილება, ხელახლა წარადგინოს კანონპროექტი უცხოური გავლენის გამჭვირვალობის შესახებ”, — აცხადებს მდინარაძე.
იდენტური კანონპროექტი ქართულმა ოცნებამ შარშან 2023 წლის მარტშიც დაინიციირა, თუმცა ამ ინიციატივამ საზოგადოებაში პროტესტი გამოიწვია, რაც მასობრივი აქციებით გაგრძელდა.
საზოგადოების წინააღმდეგობის შედეგად, პარტიის ლიდერებმა მიიღეს გადაწყვეტილება, რომ კანონპროექტი აღარ განეხილათ, ხოლო მოგვიანებით, მთელი წლის განმავლობაში აცხადებდნენ, რომ ამ კანონპროექტს არც ერთი ფორმით აღარ დააბრუნებდნენ, თუმცა დღეს ცნობილი გახდა, რომ მათ აზრი შეიცვალეს.