საქართველოში მცხოვრები ამერიკელი იურისტი, ტედ ჯონასი რუსული კანონის საპროტესტო აქციის დარბევისას სცემეს და დააკავეს. ამაზე თავად ჯონასმა პირად Facebook გვერდზე დაწერა.
“ათასობით ადამიანი რჩება ქუჩებში, სპეცრაზმის ცრემლსადენი გაზითა და წყლის ჭავლით შეტევის მიუხედავად”, — ეს პოსტი ჯონასმა თავის პირად Facebook გვერდზე გააზიარა. მოგვიანებით კი, 01:12 საათზე კომენტარში განახლების სახით დაწერა, რომ ნაცემია.
“პოლიციის მანქანაში ვარ. მაგრად მცემეს“, — დაწერა მან.
“რადიო თავისუფლების” ინფორმაციით, ტედ ჯონასი, რომელიც რომელიც საქართველოში 1994 წლიდან ცხოვრობს, 2023 წელსაც ეწინააღმდეგებოდა რუსულ კანონს.
რუსული კანონის საპროტესტო აქცია პარლამენტში მიმდინარე პლენარული სხდომის პარალელურად დაიწყო. სხდომაზე რუსულ კანონს მეორე მოსმენით მუხლობრივად განიხილავდნენ.
აქციის მონაწილეებმა პარლამენტის სხვადასხვა შესასვლელისკენ გადაინაცვლეს, საიდანაც ქართული ოცნების დეპუტატები უნდა გამოსულიყვნენ, თუმცა პოლიციამ ჩიტაძის ქუჩა ჩაკეტა.
შსს-მ მოქალაქეებს მოუწოდა, დაეტოვებინათ პარლამენტის შენობის შესასვლელი და გამოსასვლელი სივრცეები.
მოგვიანებით, გავრცელდა კადრები, რომლებშიც მკაფიოდ ჩანდა, როგორ ძალადობდა სპეცრაზმი მოქალაქეებზე და გაფრთხილების გარეშე, სხვადასხვა სპეციალურ საშუალებას იყენებდა.
ტერიტორიაზე გაუშვეს წყლის ჭავლიც. ამ შემთხვევაში იმ განსხვავებით, რომ რამდენიმე წამით ადრე ადგილზე შეკრებილი მოქალაქეები გააფრთხილეს.
დაშავებულები არიან აქციის მონაწილეები და ჟურნალისტები, ასევე, არიან დაკავებულებიც, რომელთა ზუსტი რაოდენობის შესახებ შსს-ს ინფორმაცია ამ დრომდე არ გაუვრცელებია.