თბილისი პრაიდი აგრძელებს ამაყი ოჯახების პროექტს, რომელიც მიზნად ისახავს ლგბტქ+ ადამიანების ოჯახების წევრების მხარდაჭერასა და გაძლიერებას. ამაყი ოჯახების მიზანია, ლგბტქი+ ადამიანების ოჯახის წევრების მხარდამჭერი ჯგუფების ჩამოყალიბება და მათი ფუნქციონირების ხელშეწყობა.
“მაშინ, როდესაც ქვეყანაში გაჭირვების დონე მაღალია და ადამიანებს არ აქვთ დამოუკიდებლად ცხოვრების შესაძლებლობა, სახლს მიღმა სამყარო კი უსამართლობებითა და საფრთხეებით არის სავსე, ოჯახი, ხშირ შემთხვევაში, ერთადერთ საყრდენად რჩება. და თუკი ოჯახიც, ნაცვლად მხარდაჭერისა, ზურგს გაქცევს, რჩები სრულიად მარტო და სასოწარკვეთილი”, — აღნიშნულია აპლიკაციაში.
ამაყი ოჯახები ქვიარებს და მათ ოჯახებს სთავაზობს უსაფრთხო სივრცეს, სადაც მსგავსი გამოცდილების მქონე ადამიანების გაცნობისა და მათთან დამეგობრების საშუალება ექნებათ. ამასთან, ლგბტქი+ საკითხებზე სასარგებლო ინფორმაციის მიღების, განსჯის გარეშე კითხვების დასმისა და პასუხების მიღების, სურვილისამებრ პირადი გამოცდილების გაზიარებისა და პროფესიონალი ფსიქოლოგებისგან თუ უკვე ჩართული ლგბტქი+ ადამიანების ოჯახის წევრების რჩევების მიღების შესაძლებლობაც იქნება.
“მნიშვნელოვანია, რათა ოჯახის წევრებმა თავად შეძლონ გამკლავება სოციალურ წნეხთან, საკუთარ თავთან სირცხვილის, შიშისა და სხვა ნეგატიური ემოციების დაძლევა, შემდეგ კი თავიანთი ლგბტქ+ შვილების, შვილიშვილების, და-ძმის, ახლობლების გაძლიერება. ჩვენ გვჯერა, რომ ძლიერი ოჯახი ჯანსაღი საზოგადოების საწინდარია, ამიტომ პროექტს ამაყი ოჯახები ვუწოდეთ. ოჯახებში არ უნდა იყოს შუღლი, ძალადობა, შური და საიდუმლოები. ამ ყველაფერს უნდა დავუპირისპიროთ სიყვარული, სოლიდარობა და ღიაობა”, — აღნიშნავს თბილისი პრაიდი.
პროექტი ტრენინგებს, საინფორმაციო შეხვედრებს, პიკნიკებს, ექსკურსიებს, ინდივიდუალური ინიციატივებისთვის ფინანსურ რესურსებს, მხარდამჭერ სერვისებს, ჯგუფურ თერაპიასა და სხვა აქტივობებს მოიცავს.
თბილისი პრაიდი იმ ქვიარ ადამიანებს, რომლებსაც პროექტში ჩართვა სურთ, მაგრამ არ იციან, როგორ შესთავაზონ ოჯახის წევრებს, გუნდის წევრებისა და პროექტში ჩართული ქვიარ ადამიანების მშობლების დახმარებას სთავაზობს, რათა გზის გამონახვა შეძლონ. დაინტერესებულ ადამიანებს პროექტში მონაწილეობა ინდივიდუალური საჭიროებებისა და დროითი რესურსის გათვალისწინებით შეუძლიათ.
თუ დაინტერესებული ქვიარ ადამიანი ან ოჯახის წევრი ხარ, სარეგისტრაციო ფორმა უნდა შეავსო.