განათლების ხარისხის განვითარების ეროვნულმა ცენტრმა დღეს დილიდან გაავრცელა განცხადება, რომლითაც “ზოგიერთ საგანმანათლებლო დაწესებულებაში სასწავლო პროცესის შეჩერებისა და გადავადების შემთხვევებს” გამოეხმაურა. ცენტრი აღნიშნავს, რომ საგანმანათლებლო დაწესებულების ადმინისტრაცია ვალდებულია წინასწარ, მის მიერ განსაზღვრული სასწავლო/აკადემიური კალენდრის შესაბამისად, უზრუნველყოს სასწავლო პროცესის შეუფერხებლად წარმართვა.
გარდა ამისა, განცხადების მიხედვით, “მნიშვნელოვანია, რომ სასწავლო პროცესის შეფერხებამ, მისმა შეჩერებამ ან გადაწევამ საფრთხე არ შეუქმნას საგანმანათლებლო პროგრამებით გათვალისწინებული მიზნებისა და სწავლის შედეგების მიღწევას, რაც, თავის მხრივ, გამოიწვევს მოსწავლეების, პროფესიული სტუდენტების, სტუდენტების კანონიერი ინტერესების შელახვას.
“არსებული სტანდარტების მიხედვით, საგანმანათლებლო დაწესებულებას ინსტიტუციაში მიმდინარე ძირითადი პროცესების უწყვეტობის უზრუნველსაყოფად შემუშავებული უნდა ჰქონდეს სასწავლო პროცესის შეუფერხებლად წარმართვის გეგმა, რომელიც ითვალისწინებს ყველა შესაძლო რისკს, ასევე, მათი სრულად ან ნაწილობრივ თავიდან აცილების საშუალებებს. შესაბამისად, მნიშვნელოვანია, საგანმანათლებლო დაწესებულებებში, ადმინისტრაციის მხრიდან უზრუნველყოფილი იყოს სასწავლო პროცესის შეუფერხებელი განხორციელება, რათა არ მოხდეს აკრედიტაციისა და ავტორიზაციის სტანდარტების დარღვევა”, — აღნიშნულია განცხადებაში.
ხარისხის ცენტრის განცხადებას მალევე გამოუხმაურნენ მისი თანამშრომლები. წერილში აღნიშნულია, რომ განათლების ხარისხის განვითარების ეროვნული ცენტრის უმაღლესი განათლების ხარისხის უზრუნველყოფის სამსახურის თანამშრომელთა უმრავლესობა და ზოგადად, ცენტრის თანამშრომელთა ნაწილი, კატეგორიულად ემიჯნება დღევანდელ განცხადებას. მათი თქმით, ამ განცხადებით ჩრდილი ადგება საქართველოს ახალგაზრდობის ნათელ, გულწრფელ და სამართლიან პროტესტს ჩვენი ქვეყნის ევროპული მომავლისა და ევროატლანტიკური მისწრაფებების მხარდასაჭერად.
“ქვეყანაში შექმნილია უმწვავესი მდგომარეობა, საფრთხე შეექმნა მოსახლეობის ცალსახა არჩევანს, რასაც ცენტრის თანამშრომლები დაარსების დღიდან ვემსახურებით. ჩვენი ყოველდღიური საქმიანობა ეყრდნობა სახელმწიფოს მიერ 33 წლის მანძილზე გაცხადებულ ევროატლანტიკურ დღის წესრიგს, ჩვენი წილი პასუხისმგებლობის ფარგლებში, გასული ორი წლის მანძილზე დაუღალავად ვმუშაობდით სამინისტროსთან ერთად ევროკავშირის წევრობის კანდიდატის სტატუსის მოსაპოვებლად და სტუდენტებთან, პროფესორებთან, უნივერსიტეტების ადმინისტრაციებთან თუ სამოქალაქო საზოგადოებასთან ერთად ვიზეიმეთ მიღებული შედეგი”, — აღნიშნულია წერილში.
ცენტრის თანამშრომლები ასევე წერენ, რომ ხელმძღვანელობენ რა უმაღლესი განათლების ევროპული სტანდარტებითა და სახელმძღვანელო პრინციპებით, მათი უმთავრესი ღირებულებებია სტუდენტზე ორიენტირება, საგანმანათლებლო პროცესის მოქნილობა, ინდივიდუალური სასწავლო გეგმები, სწავლა-სწავლების მეთოდოლოგიის მრავალფეროვნება, აკადემიური თავისუფლება და ინსტიტუციური ავტონომია.
“მზად ვართ ვემსახუროთ განათლების ხარისხის განვითარების მიზნებს როგორც ამას ვაკეთებდით პანდემიის პირობებში და გვწამს, რომ საუნივერსიტეტო სივრცე ღირსეულად უზრუნველყოფს საგანმანათლებლო პროცესის ადეკვატურად წარმართვას, სწავლის შედეგების მიღწევას და საზოგადოების მსახურებას, რადგან არასდროს ასე საჭირო და დროული არ ყოფილა უნივერსიტეტის მესამე მისიის აღსრულება”, — წერენ თანამშრომლები.
ისინი ასევე აღნიშნავენ, რომ საქართველო უმაღლესი განათლების ევროპული სივრცის ნაწილია, განათლების ხარისხის განვითარების ეროვნული ცენტრი კი უმაღლესი განათლების ხარისხის უზრუნველყოფის სააგენტოების ევროპული ქსელის სრული წევრია, აღიარებულია სამედიცინო განათლების მსოფლიო ფედერაციის მიერ, ჩართულია ბოლონიის პროცესის განგრძობითი სამუშაო ჯგუფების მუშაობაში. გარდა ამისა, თანამშრომლები წერენ, რომ ცენტრი ხელს უწყობს ევროპული და ამერიკული კვლევითი გრანტების ქვეყანაში შემოდინებას, ქართული საგანმანათლებლო სისტემის მუდმივ ინტერნაციონალიზაციას და “ათიათასობით საერთაშორისო სტუდენტიც ამ დამსახურებების საფუძველზე გვიერთდება ყოველწლიურად, რაც ამავდროულად მილიონობით დოლარის კონტრიბუციას უდრის ქვეყნის ეკონომიკაში”. ისინი ხაზს უსვამენ, რომ ეს ყველაფერი საბოლოო ჯამში ემსახურება ქართველი სტუდენტების დაწინაურებას და თანასწორობას მსოფლიო ასპარეზზე.
“ღრმად გვწამს, რომ უნივერსიტეტი უნდა იყოს ავტონომიური, თითოეული პროფესორი და სტუდენტი კი თავისუფალი საკუთარი სინდისის წინაშე. ჩვენ ვდგავართ ჩვენი უნივერსიტეტების, სტუდენტების, პროფესორების, ექსპერტების გვერდით ჩვენი ევროპული მომავლის დასაცავად”, — წერენ ხარისხის ცენტრის თანამშრომლები.
წერილს ამ დროისთვის 35 ადამიანი აწერს ხელს (სია განახლებადია).
განახლება: 16:15 საათისთვის განცხადებაზე ხელმომწერთა რაოდენობა 82-ია:
- ნიკოლოზ ფარჯანაძე
- რუსუდან სანაძე (ცენტრის საკოორდინაციო საბჭოს თავმჯდომარე)
- ქეთევან ინანაშვილი
- თორნიკე ბაქაქური
- ლალი ოდიშვილი
- ნინო შიოშვილი
- გვანცა ძიძიგური
- ნინო შეყილაძე
- ანა ჯუღელი
- დეა ღადუა
- ქეთი პავლიაშვილი
- გიორგი ირემაშვილი
- ანი ჯავახიშვილი
- თათია მამრიკიშვილი
- სოფიკო ქურასბედიანი
- თამთა მოხევიშვილი
- თამთა ანთიძე
- ანი ბილანიშვილი
- ნინო სარჯველაძე
- ქრისტინე აბულაძე
- ნინო ღაჭავა
- ქეთევან ფანჩულიძე
- ნინო გოგლიჩიძე
- სოფო გაფრინდაშვილი
- სოფო მგალობლიშვილი
- ნინო ხითარიშვილი
- ხატია ბერიძე
- ნინო საამიშვილი
- მარიამ გოგინაშვილი
- ნინო დვალიშვილი
- ელისაბედ ებრალიძე
- თემურ თექთუმანიძე
- მზია ყანჩელი
- ნინო გაბიძაშვილი
- თეა ლილუაშვილი
- გვანცა მეტრეველი
- თამარ ბიბილაშვილი
- ლაშა მაჭარაშვილი
- ციცინო ბერიძე
- სალომე აბრამიშვილი
- ნინო ქადაგიშვილი
- ანა კამლაძე
- ნინო ცხოვრებაძე
- ელენე ცირამუა
- ნია გრიგალაშვილი
- გვანცა ნინიძე
- თამარ აფრასიძე
- ლუკა თოდუა
- ნონა ჭოლაძე
- თინა ფარეულიძე
- ლაშა გორგიაშვილი;
- თამთა კიკნაძე;
- ლევან კაკიაშვილი;
- სალომე წულუკიძე;
- ეკატერინე ნოზაძე;
- ნათია მედულაშვილი;
- ნათია გოგილაძე;
- დარეჯან გვრიტიშვილი;
- ლელა ლომაძე;
- თამარ რაზმაძე;
- მარიამ კურტანიძე;
- მარიამ მოდებაძე;
- მარიამ მიქავა;
- ანი ნადირაძე;
- ნანუკა სიმონიშვილი;
- ნინო ბიგვავა;
- ნიკა ზიბზიბაძე;
- სოფიკო ხურცილავა;
- ნონა ფირანიშვილი;
- დავით მღებრიშვილი;
- თათია გლურჯიძე;
- ნუგზარ სიჭინავა;
- თინათინ მანაგაძე.
- შიო ბერიძე
- ანი ქოჩლაძე
- ნინო კოტრიკაძე
- თათია ღერკენაშვილი
- ედიშერ ჩუბინიძე
- მადინა მარღანია
- კახა ცირეკიძე
- დავით ჯინჭარაძე
- პაატა ნამორაძე
ერთ თვეზე მეტია ქვეყანაში რუსული კანონის საწინააღმდეგო აქციები მიმდინარეობს. პროტესტში ერთ-ერთი ყველაზე აქტიურები სწორედ სტუდენტები არიან, რომლებიც სხვადასხვა უნივერსიტეტში სწავლობენ. რამდენიმე დღის წინ მათ გაფიცვები დაიწყეს და ლექციებზე არ დადიან. უნივერსიტეტების ნაწილმა სტუდენტების მხარდამჭერი განცხადება გაავრცელა, ნაწილმა კი — წერილი, რომლითაც სტუდენტებისა და ლექტორების ნაწილის პროტესტს გემიჯნა. აღსანიშნავია, რომ ერთი დღით ადრე ფაქტობრივად იდენტური შინაარსის წერილი გაავრცელა მთავარმა არხმა, რომელიც წერდა, რომ ეს დოკუმენტი განათლების სამინისტრომ უნივერსიტეტებში დაგზავნა და მასზე ხელმოწერა მოითხოვა.