წლის შემაჯამებელი Drag Ball-ის სტუმარი ნანი ბრეგვაძე იქნება

განახლება: სტატიაში ჩასწორდა ინფორმაცია ნანი ბრეგვაძის მიერ დრეგ ბოლის გახსნის შესახებ, რადგან The Drag Ball-ის ინფორმაციით, ჯანმრთელობის პრობლემების გამო, ნანი ბრეგვაძე ვეღარ გახსნის ღონისძიებას.

"გვინდა უღრმესი მადლობა გადავუხადოთ და მალე გამოჯანმრთელება ვუსურვოთ ქალბატონ ნანის, რომელიც ამ პერიოდის განმავლობაში მთელი გულით ემზადებოდა ჩვენთან შესახვედრად. ჩვენ ამ პროცესის თითოეულ ეტაპზე ვგრძნობდით მის გულწრფელ მხარდაჭერასა და სურვილს, რომ კიდევ ერთხელ დამდგარიყო სამართლიანობისა და სიყვარულის მხარეს", - წერენ დრეგ ბოლის ორგანიზატორები.

მათივე ინფორმაციით, The Drag Ball: All Stars ჩვეულებრივ ტარდება. ორგანიზატორები სტუმრებს თავბრუდამხვევ, დაუვიწყარ და გასაოცარ ღამეს ჰპირდებიან.

მანამდე ორგანიზატორებმა The Drag Ball-მა და თბილისი პრაიდმა გაავრცელეს ინფორმაცია, რომ 2023 წლის ბოლო Drag Ball-ის სტუმარი მომღერალი ნანი ბრეგვაძე იქნებოდა.

“The Drag Ball: All Stars ბრუნდება, უფრო დიდი, უფრო თავბრუდამხვევი, უფრო დაუვიწყარი, ვიდრე ოდესმე. ჩვენი ვარსკვლავები ერთმანეთს დრეგ ოლიმპიადაში გამოიწვევენ:

KY CYGNI
TASHA DIVINE
NINJA LI
OTARAANT QUEER
GALLINA BLANCA
BETH HOE VAN
NOT SO VIRGIN MARI
HOT PAFLOTSKI

All Star-ს გახსნის ერთადერთი და განუმეორებელი, ქართული ესტრადის კაშკაშა ვარსკვლავი, ლეგენდარული ნანი ბრეგვაძე”, – აღნიშნულია ღონისძიების ანონსში.

გარდა ამისა, დახურვის პერფორმანსს წარმოგიდგენთ ბზიკები, სპეციალურ დრეგ პერფორმანსს კი Gerilyn Stone.

Pre-party: Lucrezia
After party: Knaughty

დრეგ ბოლი 29 დეკემბერი, 21:00 საათზე გაიმართება. ბილეთების შეძენა შესაძლებელია ამ ბმულზე. ღონისძიებაზე დაიშვებიან მხოლოდ 18 წელს მიღწეული ადამიანები და ერთ ვერიფიცირებულ მომხმარებელზე მხოლოდ ერთი ბილეთი გაიცემა. ორგანიზატორების ინფორმაციით, Ბილეთების რაოდენობა შეზღუდულია და კარზე არ გაიყიდება.

The Drag Ball, იგივე დრეგის მეჯლისი, თბილისი პრაიდისა და საინიციატივო ჯგუფის მიერ ორგანიზებული ქვიარ ღამეების სერიაა, რომელიც 2022 წლის მარტში შეიქმნა და ქალაქის მნიშვნელოვან კულტურულ და სოციალურ მოვლენად იქცა. The Drag Ball-ის მიზანი ლგბტქ+ ხელოვანების მხარდაჭერა, გაძლიერება და მათთვის უსაფრთხო სივრცის შეთავაზებაა, სადაც თვითგამოხატვას შეძლებენ. The Drag Ball ღამეები განსხვავებული თემატიკისაა, შემსრულებლები მაყურებელს მრავალფეროვან შოუს სთავაზობენ და ყოველთვის ეხმაურებიან მიმდინარე სოციალურ-პოლიტიკურ თემებს.

გასული წლის შემაჯამებელი დრეგ ბოლის სტუმარი გიული ჩოხელი იყო. გარდა ამისა, დრეგ ბოლს სტუმრობდა არაერთი მომღერალი, მათ შორის, ლელა წურწუმია, ნინო ქათამაძე და ნიკოლოზ რაჭველი, სტეფანე, Nini Nutsubidze &Nikala, Skazz და სხვა.