წალენჯიხაში ფერადი ქოლგები, რომლებიც წალენჯიხა-ტერენტობის სადღესასწაულო დეკორაციის ნაწილი იყო, რამდენიმე კაცმა ამწის დახმარებით ჩამოხსნა, რადგან მათი თქმით, ამგვარად ეწინააღმდეგებიან “ლგბტ პროპაგანდას”.
რედაქციის შენიშვნა: “ლგბტ პროპაგანდა” არ არსებობს. მეტიც, თავად ეს სიტყვათშეთანხმება პროპაგანდისტული ნარატივებით შეიქმნა და მიზანი დეზინფორმაციისადმი მოწყვლად ჯგუფებში არარაციონალური შიშების დათესვა, ხოლო ჰომოფობიურ ჯგუფებში აგრესიის გაღვივებაა.
- წაიკითხეთ ვრცლად: 5 ტყუილი, რომელსაც ლგბტქია+ ადამიანებზე ავრცელებენ
მედიაში გავრცელებული ინფორმაციით, აგრესიულად განწყობილი ადამიანები ძალადობრივი, ჰომოფობიური და პრორუსული ალტინფოს წარმომადგენლები იყვნენ. ერთ-ერთმა დამრბევმა მთავარ არხს უთხრა, რომ “წალენჯიხას არ სჭირდება არცერთი ქოლგა. ჩვენ მთიელი ხალხი ვართ და არა ქოლგის ხალხი”.
ამასთან, აგრესიულად განწყობილმა კაცებმა სიტყვიერი შეურაცხყოფა მიაყენეს ჟურნალისტებს. ფორმულას ჟურნალისტის თქმით, კაცებს, რომლებიც სადღესასწაულო დეკორაციას აპროტესტებდნენ, ქოლგების ჩამოხსნაში სამართალდამცავებიც ეხმარებოდნენ.
წალენჯიხის მერის მოადგილემ, თამარ ბელქანიამ რადიო თავისუფლებასთან განაცხადა, რომ ჰომოფობიური და პრორუსული ძალადობრივი დაჯგუფება ალტ-ინფოს წევრებმა ქოლგები მერიის დაუკითხავად ჩამოხსნეს.
“ბოლო წელიწად-ნახევარია სულ ესენი ეფინება წალენჯიხის მუნიციპალიტეტში სხვადასხვა დღესასწაულზე. ამხელა სახალხო დღესასწაულია და ამ ორ ქოლგაზე საუბარი არის უკიდურესად უხერხული. ქოლგებზე, რომელიც არის უბრალოდ ფერადი”, — განაცხადა თამარ ბელქანიამ რადიო თავისუფლებასთან საუბრისას.
აღსანიშნავია ისიც, რომ წალენჯიხა საქართველოს ერთადერთი მუნიციპალიტეტია, რომლის მერი ოპოზიციური პარტიის წარმომადგენელია.
დეზინფორმაცია, მანიპულაცია, პროპაგანდა და მითები საზოგადოების სამართავად ერთ-ერთი ყველაზე ძლიერი იარაღია. ამაში წვლილი მხოლოდ ჰომოფობიურად განწყობილ, პროკრემლისტურ და ძალადობრივ ჯგუფებს არ მიუძღვით — მათზე არანაკლებ მავნე როლს თამაშობს პოლიტიკური ჰომოფობია, რომელიც ხშირად პირდაპირ სახელისუფლებო ტრიბუნიდან ჟღერდება.
არარსებულ “ლგბტ პროპაგანდას” აქტიურად ებრძვიან რუსეთში. აგრესორი სახელმწიფოს მეთაურები კრძალავენ ფილმებს, წიგნებს და ფეისბუქპოსტებსაც კი, რომელიც ადამიანის ფუნდამენტურ უფლებებს ეხება. ამტკიცებენ, თითქოს ამაზე საუბარიც კი ლახავს სხვის უფლებებს და თავს ახვევს მათი ცხოვრების წესს, რაც ცალსახა ტყუილია. მაგრამ ეს ნარატივები არც საქართველოსთვისაა უცხო — ჰომოფობები ხან ქვიარ ფილმების ჩვენების გამო შფოთავენ, ხან ლგბტ დროშის ჩამოკიდების.
ალტ-ინფო პრორუსული ძალადობრივი დაჯგუფებაა, რომელიც 2021 წლის 5-6 ივლისს მომხდარი ძალადობრივი თავდასხმებისა და 2023 წელს თბილისი პრაიდის კვირეულისას დაგეგმილი ფესტივალის ტერიტორიის დარბევის ორგანიზატორი იყო. ძალადობრივი თავდასხმების ორგანიზატორები, რასაც ოპერატორ ლექსო ლაშქარავას გარდაცვალება მოჰყვა, დღემდე არ დასჯილან.