თბილისში, ჭავჭავაძის გამზირზე, სადაც ხელახალი არჩევენების მოთხოვნით მოქალაქეები და პოლიტიკოსები მეორე ღამეს ათენებდნენ, გამთენიისას საპოლიციო ძალები გამოჩნდნენ. თსუ-ის მიმდებარედ მობილიზებული იყო სპეცრაზმი და სპეცტექნიკა, თუმცა უშუალოდ დაშლის პროცესში რობოკოპები და წყლის ჭავლის მანქანა არ გამოუყენებიათ.
ამავდროულად, სოციალურ ქსელში გავრცელდა შსს-ს განცხადება: “შეკრებისა და გამოხატვის თავისუფლება არ მოიცავს ავტოსაგზაო მოძრაობისა და მოქალაქეთა ცხოვრების ჩვეული რიტმის მიზანმიმართული შეფერხების უფლებას. საზოგადოებამ ნათლად იხილა, რომ შეკრების მონაწილეებს საკმარისად მიეცათ დრო, რათა გამოეხატათ საკუთარი აზრი და დაეფიქსირებინათ პროტესტი.”
შსს-ს წარმომადგენლებმა ოპოზიციის ლიდერებს ტერიტორიის დატოვება მოსთხოვეს, რაზეც პოლიტიკოსებმა მათ უარი უთხრეს. საპოლიციო ძალების გამოყენების შემდეგ, საპროტესტო აქციის მონაწილეებმა მელიქიშვილის გამზირისკენ გადაინაცვლეს, ამ პროცესის დროს კი, პოლიციელები ფიზიკურად გაუსწორდნენ შეკრებილ მოქალაქეებს, პოლიტიკოსებს, მედიის წარმომადგენლებს.
მუშაობაში ხელი შეუშალეს OC MEDIA-ს ჟურნალისტს, დაარტყეს “პუბლიკის” ჟურნალისტ მინდია გაბაძეს. გადაღების დროს ხელი შეუშალეს, ფიზიკურად იძალადეს და დააკავეს “მთავარი არხის” ოპერატორი, სერგი ბარამიძე. “მთავარი არხმა” განაცხადა, რომ სოლიდარობას უცხადებს სერგი ბარამიძეს და აქციის დარბევისას დაზარალებულ თუ დაკავებულ სხვა მოქალაქეებს, ხოლო შინაგან საქმეთა სამინისტროს შეახსენებს, რომ ჟურნალისტისთვის პროფესიულ საქმიანობაში უკანონო ხელშეშლა სისხლის სამართლის დანაშაულია.
“მოვუწოდებთ ხელისუფლებას, დაუყოვნებლივ გაათავისუფლოს ჩვენი კოლეგა, გამოიძიოს ეს საქმე და პასუხისგებაში მისცეს თითოეული დამნაშავე პოლიციელი” — ვკითხულობთ “მთავარი არხის” განცხადებაში.
პოლიციამ რამდენიმე მოქალაქე დააკავა, მათ შორის იყვნენ ქალები. სამართალდამცავების აგრესიის შედეგად არაერთი ადამიანი დაშავდა. მათი ნაწილი ამბობს, რომ პოლიციამ წიწაკის სპრეი შეასხა.
დაკავებულების ზუსტი რაოდენობა ამ დროისთვის ცნობილი არ არის. მიუხედავად საპოლიციო ძალების ძალადობრივი ქმედებებისა, მოქალაქეები და პოლიტიკოსები მელიქიშვილის გამზირზე რჩებიან და განაგრძობენ 17 ნოემბერს დაწყებულ უწყვეტ პროტესტს.