სპეციალური საგამოძიებო სამსახურის ინფორმაციით, ცოლზე ფიზიკური ძალადობისთვის უწყების უფროსი ინსპექტორი პ.გ. დააკავეს. უწყების ცნობით, კაცი ძალადობის, მუქარისა და იძულების ბრალდებითაა დაკავებული.
“გამოძიებით დადგინდა, რომ 2023 წლის ოქტომბრის თვეში, ნასვამ მდგომარეობაში მყოფმა, პ.გ.-მ, ქ. ზესტაფონში, სამსახურში მიაკითხა მეუღლეს, ჩაისვა ავტომანქანაში და ეჭვიანობის ნიადაგზე ფიზიკურად იძალადა. აღნიშნულის შემდეგ იგი დაზარალებულს ავტომანქანის დაწვით და სიცოცხლის მოსპობით დაემუქრა. იმავე დღეს, სახლში დაბრუნებისას, პ.გ-მ, მეუღლის ნების საწინააღმდეგოდ, თითქოსდა მისი დამშვიდების მიზნით, ფიზიკური ძალის გამოყენებით, რამდენიმე აბი წამალი დაალევინა. გამოძიებით ასევე დადგინდა, რომ ბრალდებული მეუღლეზე არასრულწოვნის თანდასწრებითაც ძალადობდა”, — აღნიშნულია უწყების მიერ გავრცელებულ განცხადებაში.
მათივე ინფორმაციით, დაზარალებული ქალის მიმართვის შემდეგ, გამოძიება მყისიერად დაიწყო და პროკურატურასთან თანამშრომლობით მოპოვებული იქნა სამართალდამცავის დანაშაულში მამხილებელი მტკიცებულებები, რის შემდეგაც სასამართლოს განჩინების საფუძველზე იგი დააკავეს.
უწყებაში ასევე ამბობენ, რომ სამართალდამცავს ბრალდება 48 საათში წარედგინება და დანაშაული 3-წლამდე თავისუფლების აღკვეთას ითვალისწინებს. მათივე ინფოფრმაციით, სპეციალური საგამოძიებო სამსახური საქმეზე გამოძიებას აგრძელებს.