KHIDI კლუბებში ე.წ. „სფაიქინგის“ (ინგლ. Spiking) გაზრდილი შემთხვევების შესახებ საუბრობს და კლუბის სტუმრებს უსაფრთხოებისკენ მოუწოდებს. „სფაიქინგი“ არის შემთხვევა, როდესაც ვინმე ალკოჰოლს ან ნარკოტიკულ ნივთიერებას ურევს სხვის სასმელში (ან შეჰყავს პირდაპირ სხეულში) იმ ადამიანის ცოდნის და/ან თანხმობის გარეშე.
„გვსურს მოგმართოთ საკლუბო სივრცეებში გაზრდილ ნეგატიურ ტენდენციასთან დაკავშირებით. დაფიქსირებულია სასმლისგან მოწამვლის არაერთი შემთხვევა, განსაკუთრებით ისეთი ნივთიერებებით, როგორიცაა GHB. კლუბის სტუმრების უსაფრთხოება ჩვენი უდიდესი საზრუნავია და ინფორმირებულობისა და პრევენციული ზომების მეშვეობით ერთობლივად შეგვიძლია ვებრძოლოთ ამ მზარდ საფრთხეს. ჩვენი, როგორც კლუბის, საერთო პასუხისმგებლობაა, შევქმნათ ისეთი გარემო, სადაც თითოეულ სტუმარს შეუძლია თავი უსაფრთხოდ იგრძნოს“, — აცხადებს KHIDI.
გარდა ამისა, კლუბი ავრცელებს ინფორმაციას გამაფრთხილებელი ნიშნებისა და პრევენციული საშუალებების შესახებ. მედია აპრილი გთავაზობთ მათ ჩამონათვალს.
გამაფრთხილებელი ნიშნები
- უეცარი ინტოქსიკაცია — თუ თქვენ ან თქვენს გარშემო მყოფი იწყებს ინტოქსიკაციური ნიშნების გამოვლენას ალკოჰოლის ზომიერი რაოდენობით მიღების მიუხედავად, იყავით ფრთხილად. აუხსნელი ძილიანობა, დაბნეულობა შეიძლება იყოს ნარკოტიკული ნივთიერებით გაჯერებული სასმლის მიღების ნიშანი;
- ცნობიერების დაკარგვა — გონების სწრაფი დაკარგვა ერთ-ერთი მთავარი და საფრთხილო ნიშანია. აღნიშნული სიმპტომების შემჩნევის შემთხვევაში მნიშვნელოვანია მოიძიოთ დახმარება;
- უჩვეულო გემო ან სუნი — მიუხედავად იმისა, რომ ისეთი ნივთიერება, როგორიცაა GHB, უმეტესწილად არის უფერო და უსუნო, მოსალოდნელი გამოცდილებიდან ნებისმიერი უცხო შეგრძნება არის საფრთხილო.
პრევენციული საშუალებები
- მოუფრთხილდით თქვენს სასმელს — უსაფრთხოების ფუნდამენტური პრინციპი მდგომარეობს იმაში, რომ არ დატოვოთ თქვენი სასმელი უყურადღებოდ, რაც უცხო ადამიანის მხრიდან მასში უცხო ნივთიერების ჩაყრის პრევენციული მექანიზმია;
- სანდო ადამიანთან ერთად ყოფნა — კლუბში სანდო ადამიანთან ერთად ყოფნა ჰქმნის მნიშვნელოვან უსაფრთხოების გარანტს, ვინაიდან შეგვიძლია ყურადღების მიქცევა ერთმანეთისთვის;
- გქონდეთ კომუნიკაცია კლუბის პერსონალთან — თუ თქვენ შეესწარით ან განიცდით ვინმეს მხრიდან რაიმე სახის საეჭვო აქტივობას ან თავს უჩვეულოდ, ცუდად გრძნობთ, შეატყობინეთ ამის შესახებ კლუბის პერსონალს ან დაცვას. ამასთან ერთად, წაახალისეთ სხვები, მიმართო იმავე ტიპის ზომებს უსაფრთხო გარემოს შექმნისთვის.
კლუბი ასევე აღნიშნავს, რომ „თითოეული ჩვენგანის კოლექტიური და ინდივიდუალური ძალა მდგომარეობს ინფორმირებულობასა და უსაფრთხო გარემოს ხელშეწყობის ვალდებულებაში. ამისათვის მნიშვნელოვანია, გვქონდეს ინფორმაცია და მივიღოთ პრევენციული ზომები, რათა უსაფრთხო ღამეების შექმნა უზრუნველვყოთ“.