პროკურატურის ინფორმაციით, ლაგოდეხში კაცს სიცოცხლის მოსპობის მუქარით ქალის ტანსაცმლის ჩაცმა აიძულეს და სოფლის ქუჩებში გაატარეს. დამამცირებელი მოპყრობის ფაქტზე სამ პირს ბრალი წარუდგინეს.
“ბრალდებულებმა იმ მოტივით, რომ დაზარალებულმა მათი შეფასებით სამარცხვინო საქციელი ჩაიდინა, მისთვის დამამცირებელი ქმედების განხორციელება, ქალის ტანსაცმლის ჩაცმა მოსთხოვეს, წინააღმდეგ შემთხვევაში კი სიცოცხლის მოსპობით დაემუქრნენ. ფსიქიკური იძულების შედეგად, დაზარალებულმა მათი მოთხოვნა შეასრულა, რის შემდგომაც ბრალდებულებმა ის სოფლის ქუჩებში გაატარეს, რითაც პატივისა და ღირსების შემლახავ მდგომარეობაში ჩააყენეს”, — აღნიშნულია განცხადებაში.
ბრალდებულები პირველ ნოემბერს დააკავეს და ბრალი სისხლის სამართლის 144 ტერცია მუხლის მეორე ნაწილის ე ქვეპუნქტით წარუდგინეს, რაც ჯგუფურად ჩადენილ დამამცირებელ მოპყრობას გულისხმობს, რომელმაც დაზარალებულს ფსიქიკური ტკივილი და მორალური ტანჯვა მიაყენა. დანაშაული 5-დან 10 წლამდე თავისუფლების აღკვეთას ითვალისწინებს.
გურჯაანის რაიონულმა სასამართლომ სამივე ბრალდებულს აღკვეთის ღონისძიების სახით პატიმრობა შეუფარდა. უწყებაში ამბობენ, რომ დანაშაულის ჩამდენი სხვა პირების მხილების მიზნით გამოძიება გრძელდება.