გუშინ, 19 ოქტომბერს, ორგანიზაციამ — “პარტნიორობა ადამიანის უფლებებისთვის” გაავრცელა ინფორმაცია, რომ საქართველოს ფეხბურთის ფედერაციას კლუბ “მართვესა” და კლუბ “ნიკეს” სექსუალურ შევიწროებაში მხილებული მწვრთნელების უფლებამოსილების შეჩერების მოთხოვნით მიმართა. იმავე საღამოს PHR-მა განაცხადა, რომ ფეხბურთის ფედერაციის წარმომადგენლის ცნობით, კლუბ “მართვეს” ყოფილ მწვრთნელს, პაატა დოგრაშვილს, UEFA-ს მითითების შესაბამისად, ლიცენზია გაუუქმდა.
“ფედერაციამ ეს გადაწყვეტილება ფეხბურთელი ქალების მიერ დაწყებული სამართლებრივი ბრძოლის საფუძველზე მიიღო, რომელთაც სასამართლოში #PHR-ის ადვოკატები წარმოადგენდნენ”, — დაწერა ორგანიზაციამ.
PHR-ის ცნობით, ფედერაციისგან ელიან ინფორმაციას კლუბ “ნიკეს” მწვრთნელის, გივი კვარაცხელიას ლიცენზიის გაუქმების შესახებ, რომლის მიერ ჩადენილი სექსუალური შევიწროება სასამართლოს ორმა ინსტანციამ დაადასტურა.
2023 წლის 4 ივლისს, ქუთაისის საქალაქო სასამართლომ მართვეს მწვრთნელის მხრიდან 9 ქალი ათლეტის მიმართ სექსუალური შევიწროება დაადგინა. ნიკეს მწვრთნელის მხრიდან კი 3 ათლეტი გოგოს, მათ შორის არასრულწლოვანების, სექსუალური შევიწროება 2022 წლის 18 თებერვალს თბილისის საქალაქო სასამართლომ, ხოლო 2023 წლის 22 ივნისს თბილისის სააპელაციო სასამართლომაც დაადგინა. ქალი ფეხბურთელების სამართლებრივ ინტერესებს PHR იცავდა.