სამშობლოს ღალატს წიგნი არ სჭირდებაო, გვითხრა მიხეილ ყაველაშვილმა პარლამენტიდან ჯერ კიდევ დეპუტატობისას. მაშინ უკვე ვიცოდით, რომ საკანონმდებლო ორგანოში მისი უმაღლესი განათლების დამადასტურებელი დოკუმენტი არ იძებნებოდა.

ამის შემდეგ ყაველაშვილმა არაერთხელ გამოიჩინა თავი, იქნებოდა ეს რუსული კანონის ინიციატივა, საქართველოს სტრატეგიულ პარტნიორებზე თავდასხმა, ღიად ანტიდასავლური და ანტიევროპული ნარატივების გავრცელება თუ სხვა. მის ამ მოღვაწეობას თან სდევდა სხვადასხვა აქციის მონაწილეთა პოსტერებზე გამოტანილი ფრაზა “სამშობლოს ღალატს წიგნი არ სჭირდება”.

მერე იყო ჰომოფობიური და ცენზურის კანონი. ყაველაშვილმა ყველა ტრიბუნა გამოიყენა ჰომოფობიური, ტრანსფობიური, სექსისტური განცხადებების გასავრცელებლად და იმაზე სალაპარაკოდ, რომ “ქალი ქალია და კაცი კაცია”. მისი განათლების დამადასტურებელი ველი პარლამენტის ვებგვერდზე ისევ ცარიელი დარჩა, მაგრამ მაინც შეუპოვრად და მოურიდებლად ილაპარაკა კვლევებზე, რომელიც თითქოსდა “ლგბტ პროპაგანდის” საფრთხეებს ამტკიცებს.

ახლა საქართველოს პრეზიდენტობის კანდიდატია. უმაღლესი განათლება ისევ არ აქვს და თუ დეკლარაციას ვენდობით, არც ქონება და ფული. სამაგიეროდ აქვს მდიდარი გამოცდილება გინების, ჩხუბის, კოლეგების შეურაცხყოფის და პარტნიორებზე თავდასხმის.

რა განათლება და გამოცდილება (არ) აქვს ყაველაშვილს

ბიძინა ივანიშვილმა ხაზგასმით გვითხრა, რომ ყაველაშვილი მხოლოდ ბუნებით კი არა, ჰაბიტუსიც ქართველი კაცის განსახიერებაა. გამოდის, რომ ქართული ოცნების საპატიო თავმჯდომარე ნამდვილი ქართველი კაცის ხატად და მსგავსად განათლების არ მქონე, აგრესიულ, საკანონმდებლო ორგანოში სხვების გინებისა და დაგინების მოყვარულ, მაღალ და ბლანჟიან ადამიანს ხედავს.

პარლამენტის ვებგვერდზე რამდენიც არ უნდა აწკაპო, ყაველაშვილის განათლების ველი არა და არ იტვირთება. ეს ვებგვერდის ტექნიკურ ხარვეზად არ ჩათვალოთ, 2023 წელს IDFI-ის აღმასრულებელმა დირექტორმა, გიორგი კლდიაშვილმა პარლამენტს საჯარო წერილით მიმართა და დეპუტატის განათლების დამადასტურებელი დოკუმენტები ითხოვა, საიდანაც ასეთი პასუხი მიიღო.

უნდა აღვნიშნოთ ისიც, რომ როგორც პარლამენტის ეროვნული ბიბლიოთეკის ბიოგრაფიულ ლექსიკონში ვკითხულობთ, 1989 წელს ყაველაშვილი ჩაირიცხა თბილისის სახელმწიფო უნივერსიტეტის ეკონომიკის ფაკულტეტზე, თუმცა სხვა ინფორმაცია იმაზე, გააგრძელა ან დაამთავრა თუ არა სწავლა, არ ჩანს.

უდიპლომო პრეზიდენტი არ ეხამუშება თავად მმართველ გუნდს. დღეს მამუკა მდინარაძემ განაცხადა, რომ ეს პრობლემა არ არის, რადგან კონსტიტუციაში არ წერია და “სამშობლოს სიყვარულს, სამშობლოს ერთგულებას დიპლომი არ სჭირდება. ბევრზე მეტად განათლებულია დიპლომის გარეშეც მიხეილ ყაველაშვილი”.

საინტერესოა, რომ მაშინ, როცა დიპლომი არ სჭირდება ქვეყნის პრეზიდენტობას, ის აუცილებელია ფეხბურთის ფედერაციის პრეზიდენტობისთვის. 2015 წელს ყაველაშვილმა ფედერაციის პრეზიდენტის არჩევნებში მონაწილეობა ვერ შეძლო და სასამართლოში მიმართვას აპირებდა იმ მუხლის გაუქმების მოთხოვნით, რომელიც უმაღლეს განათლებას ითხოვდა.

“საბჭოთა კავშირის პერიოდში ისეთი სისტემა იყო, რომ წარმოუდგენელი იყო, ფეხბურთელს უმაღლესი განათლება მიეღო. ეს პრაქტიკა არსებობს მთელს მსოფლიოში. უეფას პრეზიდენტს, პლატინსაც არ აქვს უმაღლესი განათლება. მე ვფიქრობ, რომ ეს არის განზრახ მიღებული გადაწყვეტილება, რომელიც მიმართულია ჩემს წინააღმდეგ. ამიტომ ამ გადაწყვეტილებას აუცილებლად გავასაჩივრებ სასამართლოში და ვეცდები ჩემი სიმართლის დამტკიცებას. დებულება ორი წლის შინ მიიღო ფეხბურთის ფედერაციამ და მოვითხოვ მის გაუქმებას”, — ამბობდა ის 2015 წელს.

რაც შეეხება ყაველაშვილი სამუშაო გამოცდილებას, 12 სამსახურიდან 11-ში ფიგურირებს სიტყვა “ფეხბურთი” და მე-12-ც ფეხბურთთან დაკავშირებულია.

• 2016 – 2016 — საზოგადოებრივი მაუწყებელი, საფეხბურთო ექსპერტი;

• 2009 – დღემდე  — FiFPro, დამფუძნებელი და საპატიო პრეზიდენტი;

• 2005 – 2006 — “გაზელი” ფეხბურთელი;

• 2004 – 2005 — “არაუ” ფეხბურთელი;

• 2004 – დღემდე — “ალანია-ვლადიკავკაზი” ფეხბურთელი;

• 2003 – 2004 — “სიონი” ფეხბურთელი;

• 2002 – 2003 — “ლუცერნი” ფეხბურთელი;

• 1999 – 2002 — “ციურიხი” ფეხბურთელი;

• 1997 – 1999 — “გრასჰოფერი” ფეხბურთელი;

• 1995 – 1997 — “მანჩესტერ-სიტი” ფეხბურთელი;

• 1994 – 1995 — “ალანია-ვლადიკავკაზი” ფეხბურთელი;

• 1988 – 1995  — “დინამო თბილისი” ფეხბურთელი.

მხოლოდ სპორტული გამოცდილების მქონე პირების პოლიტიკაში ჩართვა ქართული პოლიტიკისთვის ახალი არ არის, მით უფრო, ქართული ოცნებისთვის. დედაქალაქის ფეხბურთელ მერს რომ თავი დავანებოთ, პარტიას პარლამენტში სხვადასხვა სპორტის სფეროს არაერთი წარმომადგენელი ჰყავდა და ჰყავს, იქნება ეს ძიუდო, კალათბურთი, ძალოსნობა თუ სხვა. გარდა ამისა, პოპულარობის ზენიტში ყოფნისას ეროვნული ნაკრების მოქმედი ფეხბურთელები პარტიის 2024 წლის საარჩევნო რეკლამაში მოგვევლინენ.

რა ქონებას (არ) ფლობს ყაველაშვილი

იმ ადამიანის ქონება, რომელიც რუსული კანონის ინიციატორი იყო და ასე აქტიურად ლობირებდა შემოსავლების “გამჭირვალობას”, თავად აჩენს კითხვის ნიშნებს გამჭვირვალობასთან დაკავშირებით — ან უნდა დავიჯეროთ, რომ დეპუტატ არ აქვს არც სახლი და არც მანქანა, ან ვივარაუდოთ, რომ ქონებას მალავს.

პარლამენტში ყაველაშვილი პირველად 2016 წელს გამოჩნდა. წლის ბოლოს შევსებული ქონებრივი დეკლარაციით თუ ვიმსჯელებთ, მხოლოდ თბილისში, გაბაშვილის ქუჩაზე მდებარე 88 კვ.მ-ის ავტოაფარეხი ჰქონდა. მის გერს, გიორგი ივანიშვილს კი თბილისში, ჭავჭავაძეზე 134 კვ.მ ბინა.

მაშინ ყაველაშვილის ანგარიშებზე ბაზის ბანკსა და თიბისიში ჯამურად 491 ლარის დებეტი იყო. პარლამენტში საქმიანობისთვის კი 7 647 ლარი ჰქონდა გამომუშავებული. გარდა ამისა, ყაველაშვილი პარტნიორი იყო შვეიცარიაში რეგისტრირებულ კომპანია GTL Oil trade and invest gmbh-ში, საიდანაც წინა წლის შემოსავალში 0 დოლარი ჰქონდა მითითებული.

2017 წლის დეკლარაციაში უკვე გამოჩნდა, რომ ზევით ხსენებული ავტოფარეხი ყაველაშვილს 2007 წელს 22 000 დოლარად ჰქონდა შეძენილი, მის გერს, გიორგი ივანიშვილს კი ჭავჭავაძეზე მდებარე ბინა 2015 წელს — 80 000 დოლარად. დეკლარაციის შევსების დროს ყაველაშვილისა და მისი ოჯახის წევრების სახელფასო და საკრედიტო ანგარიშებზე თანხის რაოდენობა გაზრდილი იყო. დეპუტატის საკრედიტო ანგარიშებზე 111 491 ლარი იყო. გარდა ამისა, ჰქონდა სამომხმარებლო სესხი, ლიზინგი და სესხი ჯამში — 95 135 ლარის ოდენობით. ამავე წლის დეკლარაციაში დაზუსტდა, რომ ყაველაშვილი შპს GTL Oil trade and invest gmbh Switzerland Zug-ის 24,5%-იან წილს ფლობდა, დანარჩენს კი გია და გოჩა მახათაძეები.

2018 წლის დეკლარაციის მიხედვით, ყაველაშვილის ქონებასა და ანგარიშებში მნიშვნელოვანი მატება ან კლება არ გამოვლენილა. სიახლე იყო მხოლოდ ის, რომ მისი ცოლი, თამარ ბაგრატიონი შპს გეომაკი საქართველოს 40%-იანი წილის მფლობელი გახდა. გარდა, ამისა ის მოსწავლე-ახალგაზრდობის სასახლეში პროექტების მენეჯერი იყო, სადაც 2017 წლის 15 იანვრიდან 31 დეკემბრამდე 8 551 ლარი ჰქონდა გამომუშავებული.

დაახლოებით იგივე სიტუაცია შენარჩუნდა 2019 წლის დეკლარაციაში, იმ განსხვავებით, რომ ყაველაშვილის სამუშაო საქმიანობაში სსიპ საზოგადოებრივი მაუწყებლის კონსულტანტობა გამოჩნდა, რაშიც ივნისი-ივლისის შუალედში 3 000 ლარი გამოიმუშავა.

როგორც ფლანგვის დეტექტორი საჯარო სამსახურის ბიუროდან გამოთხოვილ ინფორმაციაზე დაყრდნობით წერს, 2019 წელს უწყებამ ყაველაშვილის დეკლარაციაში რამდენიმე დარღვევა დაადგინა. მათი ინფორმაციით, პირველი ხარვეზი ხელშეკრულების საგნის ღირებულებას და ხელშეკრულების საფუძველზე მიღებულ მატერიალურ შედეგს ეხება. ხარვეზი ფიქსირდება თანამდებობის ბირის საბანკო ანგარიშებთან დაკავშირებითაც. სავარაუდოდ, ყაველიშვილმა არასწორად მიუთითა ინფორმაცია მის საბანკო ანგარიშებზე განთავსებული ფინანსების შესახებ.

“კიდევ ერთი ხარვეზი 2019 წლის დეკლარაციაში ოჯახის წევრის მიერ მიღებულ ანაზღაურებასთან იყო დაკავშირებული. აღნიშნულ დეკლარაციაში, შემოსავლების შესახებ ინფორმაცია წარმოდგენილია ყაველიშვილის გერის (გიორგი ივანიშვილი) და მეუღლის (თამარ ბაგრატიონის) მიერ. გიორგი ივანიშვილის წლიური შემოსავალი 45 018 ლარს შეადგენდა, ხოლო თამარ ბაგრატიონის 3600 ლარს. სავარაუდოდ, ერთ-ერთი ოჯახის წევრს იმაზე ნაკლები შემოსავლი ჰქონდა მითითებული დეკლარაციაში, ვიდრე  ეს იყო დაადეკლარირა”, — აღნიშნავს ორგანიზაცია.

საკრედიტო ბარათების, სესხების და ანგარიშებზე არსებული თანხები უმნიშვნელოდ შეიცვალა 2020 წლის დეკლარაციაში. სიახლე მხოლოდ ის იყო, რომ დეპუტატის შვილი, მარიამ ყაველაშვილი ინდმეწარმე გახდა. 2021 წლის დეკლარაციაში კი მარიამ ყაველაშვილის სახელზე 30 000 ლარის ოდენობის ბიზნესსესხი გაჩნდა.

2021 წელს მიხეილ ყაველაშვილის დეკლარაციიდან ოჯახის წევრების ჩამონათვალიდან გაქრა გერი, გიორგი ივანიშვილი, 2022 წლის დეკლარაციაში კი უკვე შვილი მარიამ ყაველაშვილიც აღარ ჩანს. ამის ერთ-ერთი მიზეზი შესაძლოა საცხოვრებელი მისამართის შეცვლა იყოს, რადგან დეკლარაციის მიხედვით, ოჯახის წევრებად მითითებული უნდა იყოს მეუღლის, არასრულწლოვანი შვილის, გერის, მუდმივად მცხოვრები პირის მონაცემები. ამავე წლიდან აღარ არის ინფორმაცია არც დეპუტატის და არც მისი ცოლის წილებზე კომპანიებში.

მმართველობის მონიტორინგის ცენტრი შვეიცარიის ბიზნეს რეესტრის მონაცემებზე დაყრდნობით წერს, რომ ყაველაშვილის კომპანიის, GTL Oil trade and invest gmbh Switzerland Zug, საქმინობის სფერო ნავთობით ვაჭრობა იყო. მათივე ინფორმაციით, 2020 წელს კომპანიამ დაიწყო ლიკვიდაციის პროცესი, გაკოტრების საფუძველზე. თუმცა გამომდინარე იქიდან, რომ კომპანიას არანაირი აქტივი არ გააჩნდა, 2021 წლის 5 იანვარს შვეიცარიის სასამართლოში მოსამართლის გადაწყვეტილებით გაკოტრების საქმის წარმოება შეწყდა. შვეიცარიის საჯარო რეესტრის ამონაწერის თანახმად, 2023 წლის 23 მარტს, კომპანია GTL Oil Trade and Invest GmbH -ის ლიკვიდაცია მოხდა.

გარდა ამისა, ორგანიზაცია ხაზს უსვამს, რომ 2022 წლის დეკლარაციით არ ფიქსირდება, რომ თამარ ბაგრატიონმა თავის კომპანიაში შპს გეომაკი საქართველო წილები გაასხვისა. საჯარო რეესტრის ჩანაწერების მიხედვით, ის კვლავ ფლობს წილების 40%-ს, რაც დეკლარაციაში არ ჩანდა.

“აღსანიშნავია, რომ 2020-2021 წლის მონაცემებით შპს გეომაკმა, როგორც მე-4 კატეგორიის კომპანიამ, სახელმწიფოს ანგარიშგების  პორტალზე კანონის შესაბამისად ფინანსური დოკუმენტი წარადგინა. მეოთხე კატეგორიის საწარმო სუბიექტის კატეგორიას მიეკუთვნება კომპანია, რომლის მაჩვენებლები საანგარიშგებო პერიოდის ბოლოს შემდეგი სამი კრიტერიუმიდან სულ მცირე ორ კრიტერიუმს აკმაყოფილებს: აქტივების ჯამური ღირებულება 1 მილიონ ლარს არ აღემატება, შემოსავალი 2 მილიონ ლარს არ აღემატება, საანგარიშგებო პერიოდში დასაქმებულთა საშუალო რაოდენობა 10-ს არ აღემატება.

შესაბამისად,  კომპანიას ამ წლების განმავლობაში ჰქონდა შემოსავალი და ბუნებრივია კომპანიიდან სარგებელი უნდა მიეღო მესაკუთრეებსაც. თუმცა, 2021 წელს შევსებულ დეკლარაციაში სადაც 2020 წლის განმავლობაში კომპანიიდან მიღებული შემოსავალი უნდა იყოს ასახული,  კომპანიიდან მიღებულ სარგებელში თამარ ბაგრატიონი 0 ლარს უთითებს”, — ვკითხულობთ ანგარიშში.

კიდევ ერთი საინტერესო დეტალი უკავშირდება შვილს, მარიამ ყაველაშვილს. როგორც GMC წერს, მას შემდეგ რაც მარიამ ყაველაშვილი დეკლარაციაში აღარ ფიქსირდება, მან კომპანია დააფუძნა. კერძოდ, შპს მელთფრანჩაიზე, რომლის 100% მესაკუთრე და დირექტორი თავად არის. კომპანია ბაზარზე მომხმარებლებისთვის ცნობილია, როგორც MELT.

ბოლო, 2023 წლის დეკლარაციით, მიხეილ ყაველაშვილს ისევ მხოლოდ ავტოფარეხი აქვს და მისი ცოლი ისევ შპს გეომაკი საქართველოს 40%-იანი წილის მფლობელია.

“აღსანიშნავია, რომ 2016 წელს დეპუტატის მიერ შევსებული დეკლარაციის მიხედვით, მას უფრო მეტი შემოსავალი და ქონება უფიქსირდებოდა ვიდრე 2022 წელს. შესაბამისად, ყაველაშვილი იმ იშვიათ დეპუტატს შორის არის, ვისი ქონებაც არა თუ გაიზარდა წლების მანძილზე, არამედ შემცირდა”, — წერს მმართველობის მონიტორინგის ცენტრი (GMC).

გარდა ამისა, საერთაშორისო გამჭვირვალობა საქართველო წერდა, რომ ანტიკორუფციულმა ბიურომ 2023 წლის დეკლარაციის მონიტორინგის შედეგები დამალა, რომელშიც მიხეილ ყაველაშვილის დეკლარაციაც შედიოდა.

ყაველაშვილის სექსიზმი, ჰომოფობია, ტრასნფობია და ანტიდასავლური განცხადებები

ყაველაშვილზე ზოგადი წარმოდგენის შექმნაში მისი რამდენიმე განცხადებაც დაგეხმარებათ. დეპუტატმა კარიერის განმავლობაში ძირითადად გინებით, ჩხუბით და კოლეგების შეურაცხყოფით დაგვამახსოვრა თავი. პარლამენტის შენობაში მუშტი-კრივის გარდა, ყაველაშვილის წარსულში არაერთი დისკრიმინაციული განცხადება იძებნება.

მედია აპრილი სრულიად ემიჯნება ყაველაშვილის განცხადებების შინაარს. ჩვენი მიზანი მათი ტირაჟირება არ არის და მხოლოდ და მხოლოდ მაღალი საზოგადოებრივი ინტერესიდან გამომდინარე გთავაზობთ. 

• 2019 წელი: “როგორც კი ძალას კარგავენ, ზუსტად ასეთ ქილიკს მიმართავენ და სიცრუის ტირაჟირებას, როგორც კაკოია ბობოხიძე ტირაჟირებდა. ამ სიცრუის… შე ნაბო**რო”.
• 2019 წელი: “ქალი ხარ და არაფერს გეუბნები”.
• 2022 წელი: “არ გვინდა, უცხო ქვეყნები უხეშად ერეოდნენ ჩვენი ქვეყნის შიდა საქმეებში, სასამართლო გადაწყვეტილებების რევიზია კეთდებოდეს საელჩოებში, ხელოვნურად ხდებოდეს არჩეული ხელისუფლების ცვლილების წახალისება და სანქციების შემოღებით შეურაცხყოფდნენ ქართველი ხალხისთვის უზომოდ მოამაგე, უდიდეს ქველმოქმედს”.
• 2023 წელი: “ამ სამარცხვინო ქალების ქცევა კომიტეტის სხდომაზე მთელმა საქართველომ იხილა, რა არის ველურობა და როგორ არ უნდა იქცეოდეს, მითუმეტეს, ქალი”.
• 2023 წელი: “მე და შენში მოღალატის დედა მოვ**ან”.
• 2023 წელი: “წიგნი რა შუაშია. სამშობლოს ღალატს წიგნი არ სჭირდება. […] შენ რა იცი, მე რამდენი წიგნი… ან რა იცი ჩემი განათლების შესახებ. […] შენ განათლება გგონია წიგნების წაკითხვა და არ არის მარტო ეგ”.
• 2024 წელი: “ლგბტ პროპაგანდა დღეს შეფარული პროპაგანდა კი არა, ღია პროპაგანდაა. უკვე იმდენად შეაღწია ლგბტ პროპაგანდამ ყველა სფეროში, მათ შორის ხელოვნებაში, სოცქსელებში და ა.შ. რომ ამაზე საჭიროა ხმამაღლა საუბარი და განგაშის ზარების შემოკვრა”.

ახალი პრეზიდენტის არჩევის თარიღი ქართული ოცნების პარლამენტმა 14 დეკემბერს ჩანიშნა, იმის მიუხედავად, რომ თავად ამ პარლამენტის ლეგიტიმურობა და კონსტიტუციურობაც კითხვის ნიშნის ქვეშ დგას, რადგან საკონსტიტუციო სასამართლო განიხილავს პრეზიდენტის სარჩელს არჩევნების გაყალბებასთან დაკავშირებით.

წელს პრეზიდენტს საყოველთაო ხმის მიცემით არა მოქალაქეები, არამედ ღია კენჭისყრით საარჩევნო კოლეგიის წევრები აირჩევენ. ამ კოლეგიის წევრები იქნებიან პარლამენტის დეპუტატები, აფხაზეთისა და აჭარის ავტონომიური რესპუბლიკების წარმომადგენლობითი ორგანოების ყველა წევრი, საკრებულოების შემადგენლობიდან პოლიტიკური პარტიების მიერ დასახელებული პირები.