პროსამთავრობო ტელევიზიებით გავრცელდა ინფორმაცია, რომ ტრანსგენდერ ქალზე, ნატა ტალიკიშვილზე თავდასხმისთვის კოალიცია “ლელო ძლიერი საქართველოს” წარმომადგენელი დააკავეს, რომელიც საპარლამენტო სიაშიცაა.
როგორც მედია აპრილს კოალიციაში განუცხადეს, გავრცელებულ ინფორმაციასთან დაკავშირებით დეტალები მათთვის ამ დრომდე უცნობია. ლელოს თქმით, სამართალდამცავი ორგანოებისგან იციან, რომ ფაქტთან დაკავშირებით მიმდინარეობს გამოძიება.
“ისინი ახორციელებენ შესაბამის ღონისძიებებს და ჩვენც მათგან ველოდებით ინფორმაციას. ცალსახად უნდა ითქვას, რომ ვგმობთ ყოველგვარ ძალადობას და ძალოვან უწყებებს მოვუწოდებთ ფაქტის სასწრაფოდ და ობიექტურად გამოძიებისკენ, ჩვენც საზოგადოებასთან ერთად ველოდებით შესაბამის საგამოძიებო დასკვნას. ჩვენ მზად ვართ მივიღოთ ყველა საჭირო პოლიტიკური ზომები, მას შემდეგ რაც ობიექტური გამოძიების შედეგები იარსებებს”, — აცხადებენ ლელოში.
ნატა ტალიკაშვილს თავს 20 ოქტომბერს დაესხნენ. ნატა მედია მედია აპრილთან ჰყვება, რომ მას შემდეგ, რაც პროპაგანდსიტულმა, პროსახელისუფლებო მედია POSTV-მა პროევროპულ მარშთან დაკავშირებით სიძულვილის გამაღვივებელი, ტრანსფობიური ქვეტექსტის მქონე ქარდი გამოაქვეყნა, სადაც მარში “ოპოზიციის პრაიდად” იყო მოიხსენიებული და ნათქვამი იყო, რომ მას “ცნობილი ტრანსგენდერები”, მათ შორის, ნატა ტალიკიშვილიც ესწრებოდა, მან მარში დატოვა. ნატას თქმით, უცნობი პირი კი მას თავს სწორედ მაშინ დაესხა, როცა აქციიდან ბრუნდებოდა. ნატა ამბობდა, რომ კაცი მას უკნიდან მიეპარა და თავში ქვა ჩაარტყა, შემდეგ კი წიხლი.
“სასწრაფო გამომიძახეს და არ გახდა საჭირო გადაყვანა, იმიტომ, რომ ტვინის შერყევა მქონდა და მე თვითონ განვაცხადე უარი საავადმყოფოში გადაყვანაზე. მქონდა პატარა ჰემატომები, კოპები და ნაკაწრები და ტვინის შერყევა. უბრალოდ ცოტა შოკში ვიყავი, მოულოდნელი იყო, უკნიდან მომეპარა და ჩამარტყა”, — ამბობდა ნატა ტალიკიშვილი მედია აპრილთან.
მისივე თქმით, კაცს ტრანსფობიური, ჰომოფობიური და სიცოცხლის მოსპობის მუქარის შემცველი რეპლიკები ჰქონდა.