თუ ახალი წლის მარტო აღნიშვნას გეგმავ, ეს სტატია შენთვისაა

Medium

დეკემბრის ბოლო დღეები ილევა. შობამ უკვე ჩაიარა და თითქოს, ჰაერშიც საახალწლო განწყობა უნდა სუფევდეს — სახლებში გამოკიდული ფერადი გირლანდები და ქუჩებში გამოფენილი ციმციმა განათებები თვალს, ხოლო მოლებში ხმამაღლა ჩართული სადღესასწაულო სიმღერები ყურს გვჭრიან. ტრადიციულად, ადამიანისთვის ახალი წელი ოჯახის წევრებსა და მეგობრებთან გაზიარებულ წლის პირველ წუთებსა და მისგან გამოწვეულ ჯადოსნურ შეგრძნებებს უკავშირდება, რომლებიც ზოგიერთ სკეპტიკოსსაც კი არწმუნებს, რომ სასწაულები ნამდვილად ხდება. მიუხედავად ამისა, ბევრ ადამიანს შობა-ახალი წლის უბრალოდ გადაგორებისკენ უჭირავს თვალი, ხოლო ზოგისთვის ეს დრო საკმაოდ რთულ პერიოდთანაც კი ასოცირდება.

დიახ, ნამდვილად არსებობენ ადამიანები, რომელთათვისაც რეალობა მშვენიერი არ არის. მათ შორის, მიმდინარე გლობალური კონფლიქტებისა და ომების შედეგად დაზარალებული და დახოცილი ადამიანები და მათი ოჯახის წევრები, რომლებმაც სამყაროს მიერ უგულებელყოფა, ჩაგვრა, შიმშილი, სიღარიბე, წამება და ხოცვა გამოიარეს; მათ შორის, ჩაგრული ჯგუფების წევრები, რომლებიც საზოგადოებისგან გარიყულად და იზოლირებულად გრძნობენ თავს. ადგილობრივი კონტექსტიდან გამომდინარე კი, განსაკუთრებით ქვიარები, რომელთათვის რთულია მიკუთვნებულობის გრძნობა იმგვარ ოჯახებთან ჰქონდეთ, რომელთათვისაც ისინი მიუღებლები აღმოჩნდნენ.

ცხადია, უგუნებობა დღესასწაულებზე მხოლოდ მწვავე სოციალური ფონისა და სხვა მძიმე პრობლემების ბრალი არ არის — ზოგიერთი ადამიანი ახალი წლისა და, მით უმეტეს, ახალი და ძველი წლის აღნიშვნას ნონსენსად მიიჩნევს, ხოლო ზოგი კი — უბრალოდ ბუნებით გრინჩია.

ასეა თუ ისე, ნებისმიერ შემთხვევაში, ყველას მოგვიწევს ახალი წლის მოსვლასთან შეგებება. მედია აპრილი ბედნიერ ახალ წელს გისურვებთ და გთავაზობთ რამდენიმე იდეას, როგორ შეხვდეთ 2024 წლის პირველ დღეს, თუ ამ დროს მარტო გიწევთ ყოფნა ან თუ ეს თქვენი არჩევანია.

მოამზადეთ ეგზოტიკური კერძი

მიუხედავად იმისა, რომ ზოგისთვის მზადება წარუმატებლობას, დამწვარ ტაფებსა და, რიგ შემთხვევაში, ხანძარსაც უკავშირდება, ზოგისთვის ეს საქმიანობა დამამშვიდებელია — ახალი რეცეპტების მოძიება, ინგრედიენტების შეძენა და შემდეგ მისი მომზადება ბევრი ადამიანისთვის, შესაძლოა, თვითზრუნვის ნაწილიც იყოს.

ახალი წლის ექსპერიმენტებით დაწყება არასდროსაა ცუდი იდეა. ამიტომ ნუ შეგეშინდებათ, თუ სამზარეულოში ყოფნის ან მზადების გამოცდილება არ გაქვთ. უბრალოდ, თქვენივე უსაფრთხოებისთვის, ძალიან გალესილ დანებსაც ნუ გამოიყენებთ.

მოძებნეთ საყვარელი ქვეყნის სამზარეულოდან რომელიმე კერძი და მისი მომზადება ერთგვარ გამოწვევად მიიღეთ. კარგ შემთხვევაში, შეგეძლებათ, რომ კერძი გააზიაროთ და იმით დაიტრაბახოთ, რომ თქვენი მომზადებულია, ხოლო ცუდ შემთხვევაში, უგემური ვახშამი გამოგივიდეთ, რაც სამყაროს დასასრული ნამდვილად არ იქნება.

თუ თქვენთვის ამ სიის საჭმლის მზადებით დაწყება სრულიად წარმოუდგენელი და შესაძლოა, სასაცილოც კია, შეგიძლიათ გამოძახების აპლიკაციებს მიმართოთ და უბრალოდ განსხვავებული კერძების დაგემოვნების საღამოს მოწყობით შემოიფარგლოთ.

იზრუნეთ სხეულზე

სხეულზე ზრუნვასთან მრავალი აქტივობა ასოცირდება. შესაძლებელია, სპა საღამო მოიწყოთ ან სულაც თმის ფერი შეიცვალოთ. უპირველესად, დაგეგმეთ, სხეულის რომელ არეებზე გინდათ კონცენტრირდეთ და მისი მდგომარეობა უკეთესი გახადოთ ან სრულიად შეცვალოთ იგი. მაგალითად, ვიღაცისთვის ეს შესაძლოა, გამომშრალი სახის კანის ან სხეულის საფუძვლიანად დატენიანება იყოს, რაც წელიწადის ამ დროს განსაკუთრებით აქტუალური ხდება ხოლმე, ვიღაცისთვის — მანიკიურისა და პედიკიურის ახალი დიზაინის მორგება, ხოლო ვიღაცისთვის — თმის ფერის რამდენიმე ანდაც ბევრი ტონით შეცვლა.

დაგეგმეთ, სხეულის რომელი ნაწილები გინდათ იყოს თქვენს ფოკუსში, მოიმარაგეთ სასურველი პროდუქტები და ხელები დაიკაპიწეთ — მთელი ღამე გაქვთ იმისთვის, რომ თქვენს სხეულზე იზრუნოთ და 2024 წლის პირველ დღეს სამყაროს მეტად თქვენეული პიროვნების ექსპრესია შესთავაზოთ.

ჟურნალში გადაიტანეთ თქვენი განცდები

ე.წ. ჟურნალინგი, რაც გრძნობებისა და ფიქრების აღწერას გულისხმობს, თერაპიის ერთ-ერთი გავრცელებული და წარმატებული მეთოდია. ბევრი ადამიანისთვის ეს მეთოდი შფოთვის შემცირებასა და დამშვიდებას უკავშირდება. იდეა იმაში მდგომარეობს, რომ გონებაში არსებული ფიქრები, რომლებიც ახალ-ახალი შფოთვის პოტენციურ კერებად გვევლინებიან, ფურცელზე გადავიტანოთ და სხეულიდან “განვდევნოთ”. ამგვარად შეგვიძლია, ხილული გავხადოთ შფოთვის წყაროები და რაციონალურად ვიმსჯელოთ, რა არის რეალურად საფრთხისშემცველი და რა გვაღელვებს უსაფუძვლოდ.

ჟურნალინგისას შეგვიძლია, მადლიერება გამოვხატოთ მომხდარი ამბების ან ადამიანების მიმართ, რომლებიც ჩვენ გარშემო არიან; შესაძლებელია, წინა წლის განხილვა და დასწავლილი გაკვეთილების საკუთარი თავისთვის შეხსენება. ასევე, იმ მოლოდინებსა და გეგმებზე დაწერაც, რომლებსაც მომდევნო წლისთვის აგროვებთ. გაითვალისწინეთ, რომ ჟურნალინგმა ხანდახან შესაძლოა ღრმა და ძლიერი ემოციები ამოატივტივოს ზედაპირზე და უეცრად ტირილიც კი დაიწყოთ. გახსოვდეთ, ეს აბსოლუტურად ნორმალურია. ნებისმიერ შემთხვევაში, წერა და დროის პერსონალურ განცდებზე ფიქრსა და აღწერაში გატარება საკუთარ თავთან დაახლოებაში დაგეხმარებათ, რაც ახალი წლის დასაწყებად მშვენიერია.

უყურეთ თქვენი საყვარელი სერიალის ბევრ სერიას

ცხოვრების რთული პერიოდების ხელოვნებით ტკბობის მეშვეობით გადატანა ახალი ნამდვილად არ არის, თუმცა მსგავს მომენტებში მდარე ხარისხის ე.წ. “თრეშის” ყურებაც არ არის დანაშაული. შეგიძლიათ, თქვენი საყვარელი სერიალი ამოარჩიოთ და მისი ბევრი სერია ნახოთ, თანაც ისე, რომ სინდისმა არ შეგაწუხოთ მომდევნო დღეს აუცილებლად გასაკეთებელი საქმის გამო.

მოიმარაგეთ საყვარელი სასუსნავები და განწყობის შექმნა სერიალებს მიანდვეთ. აქვე უნდა ითქვას, რომ აუცილებელი არ არის კარგი და სადღესასწაულო განწყობა შეგექმნათ — ხანდახან ტირილი და ემოციების გარეთ გამოტანა ყველაზე ჯანსაღია, რისი გაკეთებაც თქვენი მენტალური ჯანმრთელობისთვის შეგიძლიათ.

იზეიმეთ კლუბში/ბარში

შესაძლოა, კლუბში/ბარში წასვლა და ახალი წლის უცხო ადამიანების გარემოცვაში აღნიშვნა პირველი არ არის, რაც გონებაში მოგდით, თუმცა არ დაიწუნოთ ეს იდეა მხოლოდ იმიტომ, რომ წინა წლებში თქვენს ტრადიციებში არ ჯდებოდა.

რადგან ახალია, ეს არ ნიშნავს, რომ ცუდია. პირიქით, უკეთესია კომფორტის ზონიდან გამოხვიდეთ და სამყაროს შანსი მისცეთ, რომ ახალი სივრცეები აღმოგაჩენინოთ და შეგაყვაროთ. მიმოიკვლიეთ მიმდინარე ღონისძიებები, რომლებიც 31 დეკემბრის ღამეს იგეგმება და გადაწყვიტეთ, პოპ სიმღერების ფონზე ბევრი ციმციმათი გადანათებულ პაწაწინა ბარში გინდათ ახალი წლის აღნიშვნა თუ ჩაბნელებულ სივრცეში ელექტრონული მუსიკის ფონზე. შედეგად, ახალი წლის საღამოს გატარების მშვენიერ გეგმას მიიღებთ.

ცეკვისა და კარაოკეს საღამო

თუ ცეკვა გინდათ, მაგრამ სოციალური შფოთვა გაქვთ ან უბრალოდ ხალხთან ურთიერთობის ერთი წლის რესურსი სრულად ამოწურეთ, ამის გაკეთება სახლშიც შეგიძლიათ. სიმღერა, ისევე როგორც ნებისმიერი ფიზიკური აქტივობა, მათ შორის, ცეკვა, ბევრი ადამიანისთვის თერაპიულია. ამიტომ მოუყარეთ თქვენს საყვარელ სიმღერებს თავი ერთ ფლეილისტში და ცეკვისა და სიმღერისთვის მოემზადეთ. სიმღერების არჩევის გარდა, შეგიძლიათ, ერთი ნაბიჯით წინ წახვიდეთ და მიკროფონიც კი იყიდოთ — დიახ, კარაოკეც შეიძლება მეტად პროფესიონალური გახადონ მათ, ვისაც ყველაფრის დაგეგმვა და მომდევნო ზედა დონეზე აყვანა უყვართ.

განწყობის შესაქმნელად მოიმარაგეთ საყვარელი სასმელიც, რომელიც მოდუნებასა და მხიარულობაში დაგეხმარებათ.

უყიდეთ თავს საჩუქარი

მართალია, უამრავი საჩუქრის შეძენის ისტერიკა საყოველთაო სადღესასწაულო სტრესს კიდევ უფრო ამძაფრებს, თუმცა ეს აქტივობა შესაძლოა, ჩვენთვის სასარგებლოდ გამოვიყენოთ და საკუთარ თავს არა არასაჭირო კომპულსიური შენაძენი გავუკეთოთ, არამედ ის ვიყიდოთ, რაც ნამდვილად გვსურს და გვჭირდება.

არ არის საჭირო, რომ საზოგადოების მოლოდინები გაამართლოთ და ახალ წელს საოცარი აქტივობების ფონზე შეხვდეთ. ონლაინ შოპინგი და საკუთარი თავისთვის საჩუქრის გაკეთება, შესაძლოა, ამ მომენტში ყველაზე სასარგებლო იყოს, რაც შეგიძლიათ, რომ გააკეთოთ. დიდი ხანია, რაც რომელიმე არც ისე იაფფასიან ნივთს დაადგით თვალი, თუმცა მის ყიდვამდე ვერასდროს მიხვედით? ახალი წლის პირველი დღე სწორედ ის დროა, როცა ადამიანების ცხოვრებაში საჩუქრებით დატვირთული სანტა კლაუსი გამოჩნდება ხოლმე და წელს, თქვენდა გასაოცრად, შესაძლოა, საკუთარი სანტა თავადვე აღმოჩნდეთ.

დაკავდით იოგით

დიახ, ნამდვილად სწორად კითხულობთ — იოგით. არ არის საჭირო იოგას ექსკლუზიურ კლუბებში სიარულის გამოცდილება ან გასაოცრად კომფორტული მატი გქონდეთ იმისთვის, რომ იოგას მარტივი პოზების გაკეთება მოსინჯოთ.

სიტყვა იოგა გაერთიანებას ნიშნავს და იგი სპირიტული და ფიზიკური პრაქტიკაა უმაღლესი გასხივოსნების მისაღწევად. მაშინ, როცა არა სამყაროსთან, არამედ სხეულთანაც ვერ ვგრძნობთ კავშირს, იოგა კარგი პრაქტიკაა იმისთვის, რომ ამის გამოსწორება დავიწყოთ. ჩაიცვით კომფორტული ტანსაცმელი და მიჰყევით დამწყებთათვის რომელიმე ტუტორიალს, რომლებიც ინტერნეტში მრავლადაა. ამით გაიჯანსაღებთ და დაუახლოვდებით სხეულს და მოიმატებთ თვითრწმენას იმის თაობაზე, რომ თქვენი სხეულის შესაძლებლობებს ლიმიტები არ აქვს. გარდა ამისა, ნუ გამორიცხავთ, რომ ამ აქტივობით შესაძლოა, ახალი ჰობიც აღმოაჩინოთ, რომელსაც 2024 წლიდან დროს დაუთმობთ.

დაჯავშნეთ ნომერი სასტუმროში

თუ ჯერ კიდევ არ გაგიაზრებიათ, რომ აუცილებელი არ არის სასტუმროს დასაჯავშნად მიზეზი გქონდეთ, მაშინ ახლა უკვე იცით, რომ ეს ასეა. შეგიძლიათ, ახალი წელს სასტუმროს ნომერშიც შეხვდეთ და ფილმების ყურების, თვითზრუნვის ან კარაოკე საღამო სწორედ ამ გარემოში მოიწყოთ. დიდწილად თქვენს ბიუჯეტზეა დამოკიდებული, როგორ ნომერს დაჯავშნით, თუმცა დიდი და მდიდრული სასტუმროს ნომერს, შესაძლოა, ვიღაცები პაწაწინა, ლამაზად გაფორმებული ჰოსტელში ყოფნით შექმნილ იდილიას ამჯობინებდნენ.

შეგიძლიათ, თან წაიყოლოთ იდეები, რომელი ფილმების ნახვა გინდათ და ეს აბაზანის სურნელოვან ქაფებში ჩაფლულმა გააკეთოთ. რაც მთავარია, არ დაგავიწყდეთ შუაღამეს ნომრის მომსახურების გამოძახება და საშუალოზე ძვირად შეფასებული კერძების გასინჯვა, თუ თქვენი ბიუჯეტი ამის საშუალებას გაძლევთ, იმიტომ, რომ ამგვარად ახალ წელს ყოველთვის ვერ შეხვდებით.

დაგეგმეთ სოლო მოგზაურობა

რადგან ახალი წელი სურვილების ასრულების პერიოდად მიიჩნევა, იქნებ დროა, რომელიმე ქვეყანაში დიდი ხნის ოცნებად ქცეული მოგზაურობა რეალობად აქციოთ. ცხადია, ეს შესაძლებლობა, არსებული ეკონომიკური მდგომარეობიდან გამომდინარე, არამხოლოდ ყველასთვის ხელმისაწვდომი არ არის, არამედ — თავზე ჭერის ქონაც პრივილეგიაა, თუმცა, თუ ამის საშუალება გაქვთ, აუცილებლად გაახარეთ საკუთარი თავი და ახალი წელს სხვა ქვეყანაში სოლო მოგზაურობით გამოწვეული შეგრძნებები სრულად განიცადეთ. ნაკლები ბიუჯეტის პირობებში კი, სხვა ქალაქის აღმოჩენა ქვეყნის ფარგლებს შიგნითაც შეგიძლიათ.

ეს იქნება უნიკალური გამოცდილება, რომლითაც ბევრი ადამიანი ვერ დაიკვეხნის, იმიტომ, რომ მოგზაურობას, როგორც წესი, მეგობრებთან ან ოჯახის წევრებთან ერთად გეგმავენ ხოლმე. სოლო მოგზაურობას კი, მით უფრო ახალ წელს, სხვა ხიბლი შეიძლება ჰქონდეს. ამ ქვეყანაში მოგზაურობა მეტის გაგების შესაძლებლობას მოგცემთ ადგილობრივი ტრადიციების, სადღესასწაულო კულტურის, სამზარეულოსა და სხვა საზეიმო ღონისძიებების შესახებ ახალ წელთან მიმართებით.

ამასთან, მარტო მოგზაურობისას შეგეძლებათ ახალი, მეტად ავთენტური “მე” გაიცნოთ და აღმოაჩინოთ, რა მოსწონს და როგორია ის, როცა თავისი ქვეყნის, ნაცნობი ადამიანებისა და მათი განსჯის მიღმა აღმოჩნდება. გარდა ამისა, არავისთან მოგიწევთ კერძების გაზიარება და არც იმაზე იძულებით დაყაბულება, ტურისტული თუ არატურისტული არეებიდან, რომელს გინდათ, ესტუმროთ.

შეცვალეთ საცხოვრებელი გარემო

ბევრი ადამიანისთვის რეორგანიზაცია საძულველი საქმეების სიის სათავეშია, თუმცა ზოგიერთისთვის ეს წმინდად თერაპიული აქტივობაა და ახალ დასაწყისებთან ასოცირდება. რა შეიძლება მსგავსი ადამიანებისთვის იყოს წელიწადის პირველივე დღის ახლად ორგანიზებული სახლით ტკბობაზე უკეთესი? ცხადია, ბევრი რამ, თუმცა არც ეს აქტივობა იქნებოდა მათთვის ურიგო, ვისაც სიახლეები და თანაც ნივთების მოწესრიგება და ორგანიზება უყვარს.

ჩართეთ მუსიკა და მის ფონზე გადაახალისეთ სახლი, შეუცვალეთ ნივთებსა და ავეჯს ადგილები. გაოცდებით, რამდენად სასიამოვნო შეიძლება იყოს ეს, ერთი შეხედვით, მოსაწყენი აქტივობა — ნაცნობ გარემოში ჯერ კიდევ დაუტესტავი ავეჯის კომბინაციების აღმოჩენა. ბონუს ქულები მათთვის, ვინც სახლისთვის ახალ ნივთებსაც შეიძენს. აუცილებელი არ არის, ეს შენაძენი ათასობით ლარი დაგიჯდეთ. უბრალო ყვავილების ვაზის ან ახალი საყვარელი ფინჯნის ყიდვა არასდროსაა ცუდი აზრი იმისთვის, რომ გუნება გამოგიკეთდეთ.

გააკეთეთ ის, რაც ბედნიერს გხდით

ის, რაც ადამიანებს ბედნიერებად აქცევს, ყველასთვის განსხვავებული შეიძლება იყოს. დახუჭეთ თვალები, დაუკავშირდით თქვენში მცხოვრებ შიდა ბავშვს და გაიხსენეთ ან სულაც მას ჰკითხეთ, რა აბედნიერებს.

ვიღაცისთვის ეს ფეხით სიარული და მუსიკის მოსმენაა, ვიღაცისთვის — სიმღერა, ვიღაცისთვის — ხელსაქმე, ვიღაცისთვის — ფიზიკური აქტივობა და სხვა. ამ სიის გაგრძელება უსასრულოდ შეიძლება, თუმცა მიზანი ისაა, რომ პასუხი საკუთარი თავისგან მიიღოთ — რა გაბედნიერებთ. ცხადია, სრულ ბედნიერებასა და სამყაროსთან ჰარმონიას ერთჯერადი აქტივობებით ვერ შეიქმნით, თუმცა აუცილებლად სცადეთ ისინი, რომლებიც კითხვის დასმისას თავში მოგივათ და ისინიც, რომლებიც მეტისმეტად თამამად გეჩვენებათ.

შეუერთდით იმ ადამიანებს, რომლებთანაც მიკუთვნებულობის შეგრძნება გაქვთ

თუ თქვენი ოჯახის წევრები სხვადასხვა ნიშნის გამო მხარს არ გიჭერენ ან უბრალოდ მათთან კონტაქტი არ გაქვთ, გახსოვდეთ, რომ სამყაროში ყოველთვის მოიძებნებიან ისეთი ადამიანები, რომლებიც იმგვარს მიგიღებენ და შეგიყვარებენ, როგორიც ამ მომენტში, მისხლის შეუცვლელად ხართ. სწორედ ასეთ ადამიანებთან გვიჩნდება მიკუთვნებულობის საოცარი განცდა, რაც ბედნიერად გვაგრძნობინებს თავს.

ამგვარი ადგილები შეგიძლიათ ადგილობრივად, ფიზიკურ სივრცეებში ან ონლაინაც აღმოაჩინოთ. მაგალითად, ქვიარების შემთხვევაში, ეს შეიძლება სათემო ორგანიზაციები და მათი წევრების თავშეყრის ადგილები იყოს.

მოიძიეთ ინფორმაცია იმ თემის წევრების მიერ ორგანიზებული ღონისძიებების შესახებ, რომელთანაც თავს მიკუთვნებულად გრძნობთ. მიენდეთ სამყაროს, რათა ახალი ადამიანები გაგაცნოთ და თვალსაწიერი გაგაფართოებინოთ იმის თაობაზე, რამდენად ბევრი ადამიანისთვის შეიძლება აღმოჩნდეთ ძვირფასი და რამდენი ადამიანი გაატარებდა თქვენთან ერთად დღესასწაულების პერიოდს, თქვენი გაცნობის შანსი რომ ჰქონოდა.


თუ თქვენი მენტალური ჯანმრთელობა გაუარესდა დღესასწაულების პერიოდში და მხარდაჭერის ნაკლებობას განიცდით, მიმართეთ სათემო ორგანიზაციების ფსიქოთერაპევტისა და ფსიქიატრის სერვისს. მომსახურება უფასო და ანონიმურია:

  • “თანასწორობის მოძრაობა” – ტელ: 0322 47 97 48; ელ-ფოსტა: [email protected];

  • “თემიდა” — ტელ: +995 599 42 83 31, ელ.ფოსტა: [email protected];

  • “ქალთა ინიციატივების მხარდამჭერი ჯგუფი” (WISG) – ტელ: 595190303, ელ-ფოსტა: [email protected]