მედია აპრილის ფოტორეპორტიორს, ვახო ქარელს, რომელიც ცენტრალური საარჩევნო კომისიიდან ქალების საპროტესტო მსვლელობას აშუქებდა, პოლიციამ ჟურნალისტურ საქმიანობაში ხელი შეუშალა და ის ძალის გამოყენებით გადაიყვანა გზიდან.
ვახო ქარელის თქმით, პოლიციელს არაერთხელ მიაწოდა ინფორმაცია, რომ მედიის წარმომადგენელი იყო, რასაც სამართალდამცავმა ასე უპასუხა: “მერე რა, რომ ჟურნალისტი ხარ, თავხედი არ უნდა იყო”.
როგორც ფოტორეპორტიორი იხსენებს, მან სამართალდამცავს სთხოვა განმარტება, თუ რატომ გადაჰყავდა გადაკეტილი ქუჩიდან, რაზეც პასუხი ვერ მიიღო.
“გზის სავალი ნაწილი იყო გადაკეტილი და კუთხეში, მანქანის სიახლოვეს ვიდექი მეც, ისევე, როგორც მედიის სხვა წარმომადგენლები. პოლიციის ერთ-ერთმა თანამშრომელმა, სავარაუდოდ, ადგილზე გადაწყვეტილების მიმღებმა პირმა, ლაშა სალუქვაძემ რატომღაც გადაწყვიტა, რომ მედიას არ უნდა ემუშავა, და ხელს გვიშლიდა. კითხვაზე, რატომ უნდა გადავსულიყავი გადაკეტილი ქუჩიდან, ვის ან რას ვაფერხებდი, არ მიპასუხა და ძალით სცადა ჩემი გადაყვანა”, — ამბობს ვახო ქარელი.
მან სპეციალურ საგამოძიებო სამსახურს უკვე მიმართა
დღეს, 13 ნოემბერს ცენტრალურ საარჩევნო კომისიასთან ქალთა აქცია გაიმართა. ისინი ინდივიდუალური საჩივრების შესატანად, ცესკოს შენობაში შესვლას ითხოვდნენ, თუმცა ადგილზე მობილიზებული პოლიცია თავდაპირველად მათ ამის საშუალებას არ აძლევდა. საბოლოოდ, პროტესტის მონაწილეებმა განცხადებების შეტანა მაინც შეძლეს.
აქციის შემდეგ, ცესკოს შენობიდან აღმაშენებლის ძეგლამდე ქალების საპროტესტო მსვლელობა გაიმართა. პოლიცია მსვლელობის მონაწილეებს მაგისტრალის სამანქანო ნაწილზე გადასვლისა და გზის გადაკეტვის საშუალებას არ აძლევდა, რის გამოც ადგილზე პერიოდულად ვითარება რამდენჯერმე დაიძაბა.